解析港交所(388)業務、收費模式、中期業績預測

本身知道佢業務模式簡單,做個業績預測唔會太複雜,但係模式簡單,收費種類繁複。我係有啲睇小咗佢啲數嘅複雜性,所以攪咗好耐,今日先毆到篇文出嚟。
1. 港交所中期業績要8月17號先出,但係佢一至六月嘅經營指標七月上旬就會出晒。所以市場可以好早預計到佢盤數。
2. 今日我就以已公布一至五月嘅經營指標去推斷預測佢嚟緊嘅中期業績。當然七月上旬我會再重新檢視一次六月數據,不過得一個月影響已經唔大,個勢已經定咗。
3. 我成日覺得港交所嘅股價係最能夠反映佢業績情況,因為佢業績情況同埋業務模式,非常簡單同透明,而且好即時性,所以市場會比較容易去俾個估值佢。
4. 你其實每日收市,都會睇到佢嘅經營指標,就係每日成交金額。 同埋,每個月頭,你都可以去下面條link睇到佢月度嘅經營數據,咁樣你就好容易睇穿佢嘅業務狀態,幾時係入市時機。我覺得係幾有用可以去睇。

香港交易所每月市場概況
https://www.hkex.com.hk/Market-Data/Statistics/Consolidated-Reports/HKEX-Monthly-Market-Highlights?sc_lang=zh-HK&select=

業務模式
5. 話佢業務模式簡單,說穿了佢係一個喺香港壟斷嘅線上賭場。賭場賺啲咩?就係啲人賭完之後抽水嘅服務費。賭場點樣會賺得多?就係啲人賭得越多,佢就賺得越多。
6. 雖然佢收費名目好多,例如交易費,系統服務費,上市費,交易後服務費,市場數據使用費等。
7. 其實除咗市場數據使用費之外,其他收費根本就係股票市場唔同嘅證券及衍生工具產生嘅交易量同埋交易金額嘅交易服務收費。
8. 所以都係果句交易金額升,佢嘅收費會升,交易量升,佢嘅收費都會升。
9. 業務模式,除咗收入,就係成本開支,佢嘅成本相對更簡單。
10. 最主要就係人工成本,佔總經營開支65%,其次嘅可能你都估到,就係佢嘅系統維護成本,佔總經營開支嘅15%,加埋都超過80%㗎啦。

11. 即係成檔嘢,除咗辦公室同埋擺Server嘅位之外,其他基本上都可以虛擬操作。
12. 無論係投資者定投機者、散戶定機構,喺佢嘅場裏面買買賣賣,佢就開開心心收佣、收服務費。
13. 之後佢再請啲人維持個賭場嘅秩序,例如有冇人違反上市規則或者交易規則咁。嗰啲人通常都係律師、會計師或者IT專業人士。就係咁,已經可以開檔做生意啦。

收費模式
14. 下面呢條link詳細說明左港交所嘅收費種類同模式。有興趣同時間可以自己都去睇吓。不過你打開可能都唔係好想睇,因為太多。我睇完都有少少頭暈,不過係有用嘅。
https://www.hkex.com.hk/Services/Rules-and-Forms-and-Fees/Fees/Overview?sc_lang=zh-HK
15. 不過呢個收費模式,如果你明白到,其實好重要,因為你基本上可以準確預測佢嘅業績。
16. 呢度我可以概括佢嘅收費模式主要有三種:第一係按成交額收百分比收費、第二種係按成交宗數收固定金額收費、第三種係按時間使用佢嘅服務收費。
17. 例如現貨證券嘅收費模式,係按照買賣雙方成交金額,各自俾0.005%。所以現貨證券嘅交易費收入,完全係跟每日成交金額呢個經營指標。
18. 又例如衍生產品嘅收費模式,最主要係按每張合同收取固定金額收費。例如指數期權合同,買賣雙方每張要俾$10,股票期貨按合同種類,買賣雙方每張要比$0.6至$3.1。
19. 所以衍生產品嘅交易費收入指標係要跟衍生產品交易宗數,交易金額反而唔係最直接。不過下面關於牛熊證嘅收入,因為佢無公布成交量,所以我都用咗成交金額去攞個幅度變化百份比。
20. 又例如結算交收嘅服務費收入,雖然都有百分比部份(交易金額0.001%-0.002%),但係佢都有一個上限,每個交收或者結算嘅指示嘅$50或$100,視乎唔同種類交收結算指示,所以大部份嘅因素都係睇成交宗數。
21. 至於乜嘢係以時間釐定收費呢?就係一啲市場券商或者其他參與者使用港交所嘅設備託管服務或者係市場數據服務,呢個收入數,其實一直以來相對穩定唔會太大波動。
22. 最波動當然係交易費用收入以及交易結算及交收服務費收入,因為呢啲服務費收入係隨住市場嘅成交額以及成交量嘅上下波動而產生明顯變化。

經營指標
23. 知道咗佢收費模式,下一步就要睇佢邊種收入佔比最大同埋波幅最多,最大佔比嘅收入種類係交易費收入及系統收費,另外就係結算交收費,分別佔總收入約41%同埋26%。
24. 其他收入種類,例如上市費、存管、托管、市場數據費,波幅同埋佔比都相對細,因為本身呢類服務使用量較為穩定,唔太受市況波動影響,所以理論上嚟緊嘅中期業績都唔會太大波動或者對總收入有太大影響。
25. 除咗睇佔比、波幅相對大嘅收入種類,經營指標同相關收入種類關係嘅correlation,我哋都可以用歷史數據來測試。
26. 下表就會見到各種收入波幅,無論係2022第一季或者係2021年全年,各自經營指標波幅,係同相對應嘅收入種類波幅好接近。
(除咗期貨同期權嘅經營指標同相關收入correlation 可能冇咁強,原因係佢哋有唔同種類嘅合同,收費標準唔一致,有機會造成低收費嘅合同成交數量增加,高收費嘅合同成交數量減少,造成總成交數量增加但係收入可能增加冇咁多)
港交所(0388)2022年收入數據
27. 當然呢個唔係麻木睇返百分比波幅接近,而係我細閱左佢嘅收費模式按金額嘅就係按金額,按成交量嘅,就按成交量。所以調返轉,係用呢個歷史數據驗證港交所喺官方網站收費模式資料講得準唔準確。

2022年中期業績預測
28. 我對388嚟緊中期業績嘅預測,個邏輯好簡單。
29. 由於有啲經營指標,同佢相關嘅服務收入種類係有高度關聯性,即係話經營指標嘅變化幅度會好接近相關服務收入種類嘅變化幅度。
30. 而佢已經公布咗2022年一至五月比較 2021年一至五月嘅經營指標,所以攞返呢個同比經營指標嘅變化幅度,就可以大概預測到佢幾個主要服務收入種類,喺今年中期業績嘅同比變化。
31. 之後,再將佢一啲相對波動冇咁大嘅服務收入種類假設維持不變,咁就可以大概計到,佢中期業績嘅總收入。
32. 再乘以佢都好穩定嘅EBITDA利潤率76%,我用咗2022年Q1未計投資收益及其他非經營收益前嘅EBITDA利潤率(因為投資收益及其他非經營收益無得預)。咁就會得出個2022年中期業績嘅EBITDA預測。
33. 下面個表我係以港交所已公布咗嘅一至五月經營指標數據去預測佢嚟緊2022年嘅中期業績。
港交所(0388)2022年中期業績預測

34. 嚟緊中期業績,總收入會跌大概12%,而EBITDA會跌大概22%。
35. 呢個跌幅已經比今年第一季嘅跌幅收窄。原因唔係佢中期做得好咗,而係因為同比2021年嘅第二季無2021年嘅第一季咁好。
36. 所以就算2022年第二季其實係差過2022年第一季少少,但整體2022年中期嘅跌幅會比第一季收窄。
37. 呢個收窄pattern喺嚟緊第三、第四季應該都會繼續。因為2021年嘅第三、第四季表現都慢慢走緊下坡,只要2022年第三、第四季,港交所可以做得好少少,全年嘅跌幅應該會比上半年都收窄。

長遠展望
38. 我覺得中概股退市,只係每次提一提,都有短期可以刺激佢股價嘅作用。
39. 但實際長遠效果我覺得有限,第一,就係話一啲優質嘅中概股,其實係未被擺入退市清單前,已經回歸咗港股。股價已經反映哂。
40. 第二,仲未回歸嘅,假設佢都係回歸港股,嗰啲質素應該都係麻麻,退咗市嚟香港上市,喺美國嘅資金,應該都唔會跟住嚟。
41. 所以實質上對港交所未必有太大正面作用,反而如果真係嚟港股上市,會分薄左其他港股資金分配。
42. 最近見到嘅真正利好消息,就係落實ETF互聯互通,即係增加北水投資港股嘅一個渠道。不過呢個理論上已經反映咗係而家嘅股價度。
43. 至於俄羅斯買港股,又係短期真係好似多咗啲新資金,對港交所係有正面作用。但係都要睇定啲,唔知會唔會轉個頭又俾美國制裁,我覺得個可能唔細。
44. 至於其他嘅因素暫時真係睇唔到或者諗唔到有啲咩嘢會令到佢業績突然間做得好好,恆指而家20,000頭,但係邊個話佢一定會上返30,000,你唔俾係橫行或者你唔俾佢又下跌返咩?而家好似連上交所都好過佢。
45. 仲有個LME嘅官司,市場反應唔大因為真係唔知邊個會贏,兩個Fund 告佢加埋差唔多要賠HKD 4 billion,可能下年無端端彈出嚟話要唔知最尾賠幾多錢,又係一個容易被人遺忘嘅隱形炸彈。LME其實一年都係收入都係得1個Billion多少少。

相關文章:
港交所沒受惠中概回流
波叔的中概股大計

聲明:以上內容純屬個人意見及分享,並不構成投資、買賣建議或推薦
Credit: CFO講年報