香港科技探索的業務更新

香港科技探索(1137)今日公佈年度業務更新，交代了未來幾年對Shoalter電商平台的目標，平台現時包括HKTVmall及由I.T營運的EESE，希望在三至五年內達到120億至150億元的交易額。

150億元交易額是甚麼概念呢？公司今日公佈，2022年的目標交易額是75-80億元，按年增長14-21%，換言之2021年就大約有65億元。睇返去年公司定下的目標，是66億至70億元，總算勉強達到了下限，不過2021年出現了兩件事，對HKTVmall達標起了重要作用，分別是消費劵及現金七折劵，前者是政府派錢，後者就是公司因應消費劵而推出搶客的促銷手段，有這兩劵谷起了公司的消費，最後都是勉強到了下限，其實唔算交到功課。

再睇返2020年的銷售額是59.5億元，2021年度是按年增9%，而2022年的目標係要增長14至21%，有雄心壯志，但能否實踐得到呢，要睇 I.T 的 EESE 搞成點，因為HKTVmall的增長，不容否認是放慢了，在2021年大家習慣生活在疫情新常態下，銷售已經谷唔起，最近出現的第五波，大家有冇因此而多訂貨？青冰作為忠實客戶，落單時都係慣常注碼無加碼，有理由相信，一月的銷售額只會是略有刺激，所以要發圍，真的不能靠HKTVmall了。

整個業務更新，有一點是市場未必會受落的，公司認為在2022年有幾個大計及新發展，會增加短期投資，為長遠帶來更佳回報，但短期的利潤就會受壓，2022年的EBITDA目標是不少於5,000萬港元。香港科技探索在11月曾發盈警，話2020年首9個月的盈利及EBITDA是1.86億元及2.81億元，而2021年的首9個月就按年下跌78.5%及57%，照咁計首9個月的EBITDA就是約1.2億元，2021年9個月都做到過億元EBITDA，你話2022年目標係不少於5,000萬元，真係嚇人一驚。即使唔當呢個係EBITDA，當係全年盈利，5,000萬元的盈利，就代表預測市盈率是百六倍！

為長遠發展而犧牲短期盈利，在HKTVmall身上並不是首次發生，早幾年堅持自設物流團隊及大型配送系統，燒了唔少錢，令到公司在2020年上半年才正式扭虧，疫情大爆發是幫了 HKTVmall 一把，但當日如不是有自設物流團隊，真係未必食得到呢一浸，王生的確是有遠見嘅，之不過戰友們又要睇返，當初燒錢期的股價長期在兩蚊至四蚊浮沉，現時雖從高位跌了一半，都仲有8.73元，股東聽到要犧牲短期盈利，會否有耐性和你睇遠啲呢？自己諗。

相關文章：
香港科技探索(1137)數據愈差愈夜公佈

聲明：以上內容純屬個人意見及分享，並不構成投資、買賣建議或推薦
Credit: 青冰投資