贛鋒鋰業(1772) 基本分析

市場定位

贛鋒主要係由鋰業產業鏈嘅中游起家,做嘅係將鋰原材料加工成鋰化學物,從而供應俾鋰電池生產商或者係其他板塊嘅生產商,例如醫藥(原來鋰可以做藥品嘅催化劑)或者一啲行天交通工具組件嘅組成原料。鋰原材料並不是直接可以用嚟生產鋰電池,而係要透過贛鋒鋰業將唔同嘅元素加工組成鋰化合物先至可以成為鋰電池嘅原材料。將鋰原材料加工組成鋰化合物,從而適合用嚟製造高效嘅鋰電池原材料就係贛鋒鋰業嘅技術含量所在。

佢自己都有做上游嘅鋰礦資源買賣同埋下游嘅鋰電池製造業務,但都唔係核心業務。做上游嘅鋰礦資源買賣同埋參股鋰礦公司(其中最大嘅係佔股50%,全球第二大鋰礦場,澳洲嘅Mount Marion),係為咗保障上游鋰礦原材料供應穩定,所以就算鋰化合物喺2021年上半年價格大幅上升,佢嘅原材料成本都冇上升從而拉闊左佢嘅毛利率1倍(19%升到39%)及而做下游電池,其實係策略性滲透鋰電池最新市場需求及技術情況,從而調整佢自己核心鋰化合物嘅供應種類同方向,因為其實佢嘅電池業務只係將下游客戶生產左鋰電池部件組裝成電池,實際電池生產技術含量唔多。

行業概況

佢係世界頭五大鋰化合物嘅供應商,國內最主要對手係天齊鋰業,外國嘅就係S Q M同埋AL B。大家市佔率都係十幾%,佢自己係純做關於鋰化合物嘅業務,同天齊係一樣,但係美股嘅A L B同SQM就有做其他Chemical所以定位又唔係完全一樣市場, 同埋上游嘅鋰礦資源,我見到大部份都係喺美洲或者澳洲有,反而國內係唔多。

主要增長點

佢嘅業績好受到鋰化學物個市場價格波動影響,就好似2021年上半年鋰化合物單價急升差唔多一倍,佢嘅毛利率亦都升咗接近一倍,因為成本相對穩定,所以價格上升就會成為佢淨賺嘅部份,當然如果以2020年嘅市場情況,鋰化合物嘅單價係下跌趨勢,所以佢都賺得少好多,所以佢係一間鋰化合物價格非常敏感嘅公司,咁而市場前景,除咗係不斷對電子消費產品鋰電池需求增加嘅元素之外,重點係電動車市場將來增長嘅憧憬,因為電動車市場而家嘅市場滲率不夠10%,但電動車電池供應商寧德時代老闆曾毓群因為公司股價大升,身家已經超過李家誠,可以想像市場對電動車電池嘅需求有幾大,對電動車電池嘅需求有幾大,就係代表緊對鋰化合物嘅需求有幾大,如果市場滲透率將來大大提升(其實呢個係必然會發生),鋰電池嘅需求亦都會大大提升,從而對鋰化合物嘅需求亦都會大大提升。呢個就係贛鋒食正條水同埋世界同埋個市場未來嘅趨勢。

另外市場都預期未來半年至一年鋰化合物嘅價格依然會有所上升,但喺上游鋰資源增加產量嘅情況下,預期喺2023年, 鋰化合物嘅價格就會變得穩定,但係由於市場對鋰化合物量嘅需求依然有好大嘅增長空間,所以整體盈利預期都會有增長。

鋰電池技術

現時鋰電池最主流嘅兩種產品係磷酸鐵鋰電池同埋三元電池,磷酸鐵鋰相對比較安全穩定成本低,但係動能效益不及三元電池,通常用於續航較短嘅電動車上,三元電池嘅續航力相對較長但裏面所用嘅成份有鎳、鈷、錳三種元素就係同鋰混合成鋰化合物,所以叫做三元。其中鈷嘅成本相當高,因此三元電池價格會比磷酸鐵鋰電池貴,但動能效益會高好多。

現時寧德代係主要供應三元電池比Tesla, 而比亞迪就係做磷酸鐵鋰電池。另外韓國LG亦都供應緊四元電池,四元比起三元,就係增加一個元素成份,增加嘅一個元素就係鋁,同時降低鈷嘅比例,從而降低整體成本。下一步,電池嘅技術發展將會係固態電池,但無論磷酸鐵鋰、三元電池,四元電池,固態電池亦都係採用緊鋰化合物作為原材料,都係要問贛鋒買。

行業風險

其實配合國策,全球大環境電動車需求將來會大大增加,呢個係無可否認,關鍵係將來嘅電動車電池係唔係一定係以鋰電池為主?目前為止都應該會係,因為最穩定最成熟最普及嘅電池都始終係鋰電池。而電動車電池技術發展嘅方向就係,增加效益,減低成本,提升安全。以上呢三個大方向嘅發展主要透過化合物組成嘅比例調整,例如有三元電池變四元電池就係調整化合物比例, 又例如刀片電池、固態電池就係改變電池物理狀態嘅技術。而仲有一種,就係透過使用其他化學元素取代鋰,作為化合物材料。

潛在嘅競爭有鈉離子電池,用鈉取代鋰好處係鈉喺地球蘊藏量超過2.75%而鋰嘅蘊藏量0.0065%,而且大部份喺美洲及澳洲,因此鈉嘅開採成本比起鋰係低好多,同時如果從中國嘅國策角度考慮,鋰礦物供應主要靠外國,如果同外國政治上有磨擦呢個供應鍊可能會有阻礙,咁樣就變成直接影響下游鋰電池供應商嘅供貨,影響整體中國嘅電動汽車市場嘅產量,例如好似如果澳洲同中國又有磨擦,之後唔俾Mount Marion 供貨俾贛鋒(唔係無可能架),咁贛鋒就GG,所以國家係想扶持鈉電池嘅產業發展,呢個係國家係國際層面嘅策略性考慮。

另外,八月嘅時候,寧德時代亦都發佈左佢哋會正式研發鈉離子電池,預期目標2023年正式開展鈉離子電池嘅產業鏈。不過按目前嘅技術,鈉離子電池嘅動能效益係不及鋰離子電池,通常適用於續航要求低或者較低端嘅電動汽車種類或者係使用於儲能嘅作用。始終技術未突破。寧德時代發佈鈉離子電池嘅發展方案亦都係秉承住佢想從多方面研究電池技術,但並唔係要完全取代鋰電池,因為佢哋亦都發佈左叫A B電池就係混合鈉同鋰一齊製造一個混合電池,取其鈉嘅低成本、鋰嘅高效益。所以,目前技術層面鈉離子係仲未真正威脅到鋰離子,但再過幾年,如果鈉離子嘅動能效益可以突破而家限制,咁對鋰電池真係會有衝擊,係要留意!同埋國家都扶持。

其實除咗鈉離子係潛在競爭對手之外,再講遠啲將來嘅氫能亦都係一個對手,不過呢個真係係技術層面同埋發展層面上都更加遠,因為加氫站嘅建設,氫嘅安全問題都唔係一朝一夕可以解決嘅事。

聲明:以上內容純屬個人意見及分享,並不構成投資、買賣建議或推薦
Credit: CFO講年報 2021-09-16