完美醫療(1830)受惠疫情復甦

現有業務嘅潛在反彈

1. 完美醫療90%業務都係醫療美容，香港業務佔比74%，其餘嘅仲有中國、澳門、新加水坡同澳州。
2. 最近期嘅2022年6月中期業績做得幾差，收入得港幣（下同）6.7億，同比下跌 16%，純利1.5億，跌30.6%。
3. 一來上年第一季，香港第五波疫情，佢頻頻停業：香港停20日，澳門停39日，廣州、深圳、上海及北京分別停14日、23日、63日及19日。
4. 二來醫療美容，相對其他醫療服務唔係必需品，做少次唔會死。所以疫情高峰都會令少咗人敢去做醫療美容。
5. 所以佢收入、純利都倒退，主因係疫情導致，但上個月防疫政策大轉向，乜都開番哂，以上兩大疫情相關打擊業務盈利嘅因素都會大大消除。

6. 所以2023年嘅收入同比2022年，一定會有顯著增長。你話都唔一定，點知係唔係佢自己生意差？
7. 佢2022年上半年收入跌16%，但如果將佢按季細睇，咁其實佢2022年第二季單季收人，環比第一季係有成增長52.1%。
8. 好明顯就係當第一季嘅第五波疫情過咗之後，第二季整體嘅生意額返彈得好強勁，所以話2023年業務反彈其實都幾肯定。
9. 疫情期間，生意大跌，完美醫療當然有做成本控制。因為疫情影響，推廣谷得太勁都唔會太有效益，所以市場推廣開支大幅減少26%，但要留意收入都只係跌咗16%，即係低過費用下跌幅度10個百份點，算做得幾有效率。
10. 而另一個佔比大嘅人工費用（佔總費用45%）就唔係減得好多，同比只跌4%。即係員工規模無因為疫情大幅縮減，呢個都係顯示咗其中一樣管理層眼光嘅舉動，因為當疫後復常，維持基本原有員工規模，先可以應付到突如其來嘅業務需求增長。

11. 因為防疫政策大轉向，話嚟就嚟，如果之前scale down咗，就食唔到頭啖湯，但係佢主力員工規模都喺度。
12. 另一樣顯示管理層長遠眼光嘅係趁市道低迷，佢喺2022年上半年喺元朗開多間服務中心。個人感覺，元朗近年多新盤落成、消費力唔弱，以前要出市區做醫療美容，而家就喺區內可以做，都係復常後嘅另一個增長點。
13. 至於中國業務，管理層都唔使點遮掩，直接講：週期性禁足措施及提倡的「清零」政策大幅減少了商場的客流量，直接影響顧客到訪及消費。本集團別無選擇。
14. 而家國內防疫躺平，短期睇到嘅係混亂，不過國內業務佔比唔大（佢無獨立披露，只總計中國、澳門、新加坡、澳洲佔26%業務）所以影響都唔算嚴重，而且長遠一、季後都係會回復正常。

潛在嘅被投資可能性

15. 仲有，完美醫療到呢一刻，資產負債比率都仲係零。即係話佢無任何銀行借款或者係發債融資，作為佢經營或者擴張業務嘅資金來源。
16. 佢完全以自己資金作內部自然增長，可能就係因為咁樣，令佢專注到90%都係自己最擅長嘅醫療美容，雖然範疇唔多，但假假地醫療美容嘅經營利潤率都好高，就算係今次中期業績做得差都有28%，疫情前直情有36%。
17. 當然啦，有外來資金，去收購已經盈利嘅業務，就會好即食、即時成為新盈利增長點。
18. 好似3309希瑪同2138醫思健康，近年不斷融資、併購新業務。融資番嚟嘅錢，唔會一吓子影響損益表（除咗利息），而併購同業嘅成本係資產，唔係費用（除非有減值）。
19. 但同時，收購番嚟新業務嘅盈利（新業務嘅損益表），就會一下子加咗落佢地本身嘅損益表，即係即時增加咗盈利（除非新業仲係虧損緊）。

20. 所以，短期內呢個的確係最有效、最快速令盈利增長嘅方法sell俾市場做賣點。
21. 但當然投資唔會零風險，從實際經營角度睇，對於新收購業務，其實管理層都要花好多時間望到實：經營團隊嘅能力、同集團嘅磨合程度、集團資源調撥嘅考慮，而最重要嘅係會唔會買錯嘢、買貴嘢，即係原來新收購業務已經開始走下坡、或者新收購業務客戶係跟人唔跟公司？
22. 呢一刻完美醫療嘅定位係輕裝上陣，簡單做好自己最叻嘅嘢，無大動作要規模同盈利都短期爆上，去吸引市場。
23. 所以點解當醫思健康2138 PE去到 80幾倍、希瑪眼科3309 PE去到 250幾倍時，完美醫療PE仲係得嗰20倍左右。
24. 因為前兩者市場都已經好price in 咗佢地嘅增長憧憬（但當然風險都相對高咗好多，因為投資唔係無風險），但後者市場可能仲觀望緊，或者叫做無咁juicy去sell俾個市場。

25. 但諗深一層，返而完美醫療而家仲係清白之身，無外面資金去投佢地，呢個會唔會係另一個潛在嘅利好因素？
26. 以前、同而家無人投，可能係大股東覺得個價唔啱、可能係佢地想有自己嘅投資計劃同策略、亦都可能係呢一刻市場覺得佢地業務唔太吸引。
27. 但呢個其實唔代表當佢地業績復常反彈後，吸引市場資金注意時，大股東唔會接受人地資金追捧。大股東將間公司上市，都係為咗食資本市場嘅紅利，所以如果個業務有起色、個價又靚咗，有融資同併購攪作一啲都唔出奇。
28. 所以，呢個如果有，係一個bonus。到時個估值又會完全唔同層次，因為佢而家個PE只係20倍左右，業務數字都簡單、單純地反映緊醫療美容本業，不過到時就要focus喺作併購目嘅質素。
29. 所以整體嚟講，喺現有業績上，我覺得完美醫療係最能夠受惠復常概諗，業務將會喺2023年有明顯增長，而且風險比較低嘅一隻香港醫療股
30. 同時間，當佢業績好轉嘅時候，亦都係一隻有機會被個資本市場資金追捧，玩槓桿融資做併購谷大市值嘅可能。

聲明：以上內容純屬個人意見及分享，並不構成投資、買賣建議或推薦
Credit: CFO講年報