盈富基金(2800)的迷思

被動投資:指數投資

好多人買股票或者做月供都會用一種指數投資既被動投資方案,理由是:指數投資能夠用低成本又唔洗用腦咁帶黎整體市場回報,亦可以將風險分散去唔同行業。又有好多人寫書話,不論主動式基金或自己選股平均咁計都唔可能跑贏市場,倒不如聽聽話話買個指數基金買入並持有就算。

理論上,一個指數包含既股票數目越多,越貼近「市場回報」,因為市場回報就係所有投資人投資所有股票帶黎既平均整體回報,而隨住股票數量越多,道理上風險越低,最終只剩低市場風險。

當然,指數組成會直接影響指數基金的回報,香港最多人買的當然是盈富基金,因為它可以追蹤恒生指數、大藍籌,又有息收,長揸肯定不會錯!

以下數據就是用盈富基金(2800.HK)跟恆生指數做一D比較!

國際指數的組成

一般指數的組成辨法是按各地交易所上市股票既市值按比例配置,通常市值大既股票佔指數較高比重,市值低既股票則佔較少比重。

例如:蘋果同微軟喺美股市場市值最大,佔S&P500指數最大比重。


常見國際指數同表示整體市場既市值

**由於一個指數組成既本身純按市值而定,同公司既行業性質或一個指數入面既行業比例無關,所以指數投資又叫被動投資,因為股票既選擇好公式化、機械化,冇個人既個人喜好加喺入面。

恒生指數的組成

• 指數包括市值最大及成交最活躍,並在香港上市的股票,亦包括H股及紅籌股。
• 成份股經流通市值調整,以反映其可投資性。
• 為免指數偏重個別股份,設有百分之⼗的 股份比重上限。
• 四個分類指數:金融、公用事業、地產和工商業
• 成份股數:50

簡單而言,恆指不是根據市值來納入,而成份股數目上限為50隻。相比之下,恒生指數既組成對比一般國際指數既組成辨法多左好多限制,對於邊隻股票應該加入指數,佢既比例又應該擺幾多,加入咗一定的人為因素。

例如:市值 5,990 億的美團(3690.HK)、市值 3,100 億的小米(1810.HK)不是恆指成份股,反而市值792億的中國旺旺(151.HK)是恆指成份股。

問題是對投資者,同樣係被動型指數投資,不同既指數組成辨法對投資回報有咩影響?

資產管理公司

討論投資回報之前,要先明白指數就係指數,指數係冇得買的。我地只能夠通資產管理公司發行既追蹤指數基金黎複製相關指數回報,例如盈富基金既投資表現就係追蹤恒生指數既表現。

關於資產管理公司,市場上有3大巨頭:
• Blackrock(貝萊德)
• Vanguard(領航投資)
• State Street(美國道富銀行)

3間公司佔市場佔有率70%,你認識既盈富基金就係由State Street管理。
如果想追蹤標準普爾500指數既回報,可以買領航標普500(3140.HK)。
如果想追蹤標納斯達克100指數,可以買安碩納指100(2834.HK),安碩就係Blackrock既其中一個品牌。

表現比較

實際用各個指數基金同盈富基金(2800.HK)做比較。
藍綠線係2800盈富基金,橙色線係用作比較的指數基金。

2800 vs 2825

同樣投資港股,先同標智香港100ETF(2825.HK)作比較,第一次睇恒生指數同用市值計既港股指數做一次比較
資產管理公司:中銀國際英國保誠資產管理
相關指數:中證香港100指數
指數股票數目:100(按市值計)


下圖係8年週線圖回報率比較,如果同一時間同時持有2800同2825,同樣都係買港股,但基本上持有2825。4年時間以後,都能夠跑贏2800。

2800.HK VS 3169.HK

既然恒生指數有大約70%生意係同中國有關,如果用盈富基金(2800.HK)同中國指數做比較又如何?
資產管理公司:Vanguard
相關指數:富時全球中國股票滬深股通指數
指數股票數目:1205(按市值計)


今次用1年日線圖比較,唔係為左突顯過往一年3169相較2800點勁點叻,純粹係因為3169上市未夠3年,只好用1年圖作比較。

2800.HK vs 3073.HK

講起中國,有個概念叫大中華,講緊話包括香港、中國同台灣,又試下用2800同大中華股票基金比較一下
資產管理公司:State Street
相關指數:富時大中華港元指數
指數股票數目:439 (按市值計)


今次可以用返8年週線圖做比較,留意返3073個組合入面,有超過40%市值既股票喺香港上市,但只要持有3年半,就可以跑贏盈富基金。

2800.HK vs 2805.HK
不論你對中國既觀點係點,有樣野我地改變唔到,就係中國係亞洲既一部分,再試下用2800同整個亞洲股票指數基金做比較
資產管理公司:Vanguard
相關指數:富時亞太(日本,澳洲及新西蘭除外)
指數股票數目:1640 (按市值計)


以5年日線圖計,終於叫做唔洗跑輸比人地,冇贏冇輸,但以市場風險黎講,2800集中喺香港同中國50隻股票,2805就將個市場風險分險到整個亞洲,1600隻股票既風險點都低過得50隻股票既盈富基金掛,受較少風險賺取同樣回報,加上2805既組合入面,包含大家熟識既Samsung 、LG同DBS 星展,咁講唔知大家又會點睇呢?

入場費比較

講完咁多無謂野,最緊要買唔買得起先。盈富基金(2800.HK)一手入場費大約$13,000,好多學生哥同新手會覺得比較大壓力,迫住去做月供股票,要比額外手續費同一定要用碎股價入貨,即係買貴左。

其實上面講既股票入場費都平過盈富基金(2800.HK),可以參考一下。
領航中國(3169.HK)就最平,$900已經有得玩,個組合買到過千隻股票
領航亞洲(2805.HK)入場費約$2,000,照正學生哥一手一手咁買都唔太吃力掛?
標智香港(2825.HK)入場費約$5,000,中銀有得做月供
SDPR大中華(3073.HK)入場費約$8,000,冇得做月供,但都平過2800好多

最後想講多句,恒生指數只係一個指數,任何資產管理公司都可以設計一個指數基金黎追蹤恒生指數既回報,如果講完上面咁多野你都係鍾意2800想做月供用碎股價黎買既話,我話你知2833係由恒生銀行自己打理既恒生指數基金,入場費$3000咋!