比較三隻香港大型醫療集團股:希瑪眼科(3309) vs 醫思健康(2138) vs 完美醫療(1830)

今日先講希瑪眼科(3309),憧憬還憧憬,深入睇數字,先可以好實在睇得出佢嘅前景同風險位。

收入增長主因

1. 希碼眼科有 60% 係眼科醫療業務,10% 係牙科業務,今年多咗疫情相關銷售醫療物資業務,佔25%;國內同香港業務佔比各佔一半。
2. 最近6月中期業績,收入港幣(下同)8.8億,增長69%。但有60%增長都係來自新增嘅疫情相關醫療物資銷售收入。
3. 佢業績講都明係對沖反疫情影響先做呢個業務,即係2023年唔再玩防疫,2023年嘅業績起碼會唔見咗60% 2022年嘅增長因素。

毛利率下跌問題

4. 毛利率由上年同期嘅34%,下跌到28%。香港業務毛利率由31%跌到23%、國內業務毛利率由38%跌到25%。
5. 如果唔係疫情相關銷售醫療物資業務有43%高毛利率拉番少少,佢個整體毛利率跌得仲要多,同上面point 3一樣原因,呢個拉高毛利率因素下年會無咗。
6. 管理層只係好表面解釋係因為中、港防疫限制影響眼科醫療服務毛利率。
7. 以眼科手術量計,香港係多咗40%,國內都升咗6.7%,所以又睇唔出太多因為防疫限制而阻礙佢做生意。
8. 但以平均手術費嚟睇,香港同比持平,但國內就跌咗成12.7%。所以毛利率下跌,香港好有機會係成本上升,而國內就係因為減價吸客。
9. 減價吸客無問題,但你啲經營費用又有增無減,員工成本升咗8000萬,或者係80%,醫生診金又升咗5700萬或者61%。
10. 所以攪到經營利潤率由上年同期嘅5%跌到得番1.9%,呢個可能係下面分析佢本業有重大虧損嘅原因。

收購同業作為盈利增長賣點

11. 佢同醫思健康(2138)一樣,有好多收購同業動作,只要收購咗嘅同業已經有盈利,理論上就可以做長遠盈利增長嘅賣點。
12. 2022年1月5000萬咗嘉賓眼科,今次半年業績貢獻咗200萬純利俾整個集團,即係嚟緊全年業績同比上年全年會貢獻約400萬純利。
13. 2022年1月3500萬買咗香港一間視光公司,今次半年業績貢獻咗160百萬純利俾整個集團,即係嚟緊全年業績同比上年全年會貢獻約300萬純利。
14. 2022年2月喺國內以5億買咗65%牙科連銷愛康健股權,今次半年業績貢獻咗1600萬純利,即係嚟緊全年業績同比上年全年會貢獻多3000萬純利。
15. 上面三個新收購喺今次中期業績總共貢獻咗1960萬純利俾成個集團,但成個集團嘅純利只係得350萬,咁即係點?即係佢本身有嘅業務今次中期係蝕1610萬,上年同期係賺1300期,一個來回差2900萬。

16. 所以,本身呢啲收購係絕對對佢全年業績嘅增長有好大幫助,但同時呢啲披露反而揭開咗佢自身業務做得好差嘅情況。
17. 再睇埋收入8.8億,增長3.6億,扣咗疫情相關醫療物資銷售收入2.2億,增長得1.4億。
18. 上面三個新收購嘅業務,總共貢獻咗1.2億收入,即係佢本身原有嘅業務只係得2000萬增長,升幅係3.8%。
19. 如果再細分國內市場,收入有3億,同比增加3100萬,但其實新收購嘅愛康健收入就貢獻咗4900萬,即係國內嘅本身業務係下跌1800萬或者下跌7%。即係國內市場喺減價超過一成嘅情況之下收入都要下跌,感覺相當疲弱。

總結

20. 本身靠收購已有盈利同業,成為集團持續增長賣點。但自身業務唔爭氣蝕好多錢,所以嚟緊2022年全年業績純利都係會倒退,可能1000萬都未必有。
21. 另外,又係本身預期佢喺香港復常,國內防疫躺平後,原有業務會復蘇。但要思考一個問題:就係佢本身業務做得差,係唔係純因為疫情影響?
22. 如果係嘅話,咁點解新收購嘅業務喺同期又可以有可觀盈利?好似國內愛康健,2019年純利,2020年疫情所以係虧損,2021年上半年都仲係虧損,但去到2022年上半年已經有番純利啦喎。
23. 唔計牙科,直接睇眼科,嘉賓眼科2019年係虧損、2020年、2021年、2022年上半年都係有純利。
24. 咁點解希瑪本身嘅眼科業務2022年上半年有重大虧損,佢業績當然無詳細解釋,因為佢都無預有人會睇得咁仔細。如果以客觀數字去結論就係佢嘅費用增幅太多經營效率倒退,就好似上面point 10所講嘅原因。
25. 呢個係一個風險位,當市場都期待疫後佢嘅本業、佢嘅新收購都會喺經營上大展拳腳,所以佢嘅PE竟然有250幾倍,市場就係憧憬佢不斷收購,加復常,純利將會有強勁個增長。
26. 但同時可能忽略咗佢本身已有業務有經營上嘅問題、有重大虧損呢個因素。

聲明:以上內容純屬個人意見及分享,並不構成投資、買賣建議或推薦
Credit: CFO講年報