美團(3690)第一季業績前瞻

美團（3690）將在5月25日公布業績，雖然同處中國互聯網經濟板塊，但佢唔同騰訊（700）、阿里（9988）。因為佢哋都太大隻，高峰已過，經營業務無兩年前咁輕鬆。

騰訊近年要好努力控制成本，提升效率；又要分派京東（9618）、分派美團，以股權投資收入幫補上升乏力嘅主營業務。阿里就陷入競爭激烈、只求市佔、不計利潤嘅中國線上零售電商市場；而家推出業務一拆六，將集團內仲係蝕緊錢嘅業務分拆上市，又係以股權操作方式cover主營業務增長疲弱困境。

美團獨特之處在於雖然佢都係身處中國互聯網經濟板塊，但佢嘅出發點唔同。外賣、到店、遊旅服務係佢本業、傳統強項，之後先以挑戰者姿態，進入線上零售電商市場，去同阿里、京東鬥。

吸引市場嘅業務第二增長點

雖然到呢一刻，美團嘅線上零售電商業務都仲係虧損緊，但正正就係佢呢個虧損、無PE嘅狀況，先俾到市場一個憧憬同話題：佢嘅主營業務有第二增長點。
呢個係一路以嚟美團老細王興要sell 俾市場嘅嘢，雖然去衝擊阿里、京東嘅線上零售電商業務，起初的確好燒錢，試過連續兩季都蝕成100億人仔，市場質疑佢係倒錢落海。

但細睇數據，其實佢線上零售電商業務規模近兩年已經增長咗80%，同一時間經營虧損就只增加6%。 呢組數字嘅含意就係業務不斷擴張嘅同時，盈利能力持續改善，虧損率由當時接近90%，控制到上季嘅38%。
所以直到近幾季喺虧損狀態之下，佢開始望到同盈利嘅距離越嚟越接近，由不可能變有可能，就係呢種漸漸成型嘅走勢，先有個空間理由俾市場去關注同跟進。

關鍵業績因素

年初佢股價衝上$180，係因為整體市場國內疫情復常慨念帶動，到而家整體都回咗唔少。而美團由 2月到而家股價都一直徘徊喺$140樓下，短期好難再搵宏觀理由做佢上升動力。
所以而家最關鍵嘅係佢今次要靠自身業績收入可唔可以保持增長動力，同埋新業務（即係線上零售電商業務）可唔可以再一次縮細虧損率，例如30%以下，令市場更確信佢今年底、下年初真正做到有盈利，同時令整體業務回復有PE狀態。講真呢3個月要清貨嘅人都清得七七八八，留守嘅人都係等佢今次業績爭唔爭氣，去話俾市場聽佢係值得中線去等，當然我會覺得樂觀，即管拭目以待。