解析恒大物業(6666)134億被銀行強制執行

1. 阿媽有事,個仔幫手度住啲錢救吓阿媽好正常啫。但係如果阿仔都係上市公司,有小股東嘅存在,就絕對唔可以咁諗。
2. 中國恆大(3333)7月22日出咗個內幕消息公告,披露左佢子公司恒大物(6666)業喺3月發現有134億資金被銀行強制執行嘅原因。

背景

3. 恒大物業喺2022年3月21日,出咗個內幕消息公告,話公司發現有人民幣134億銀行存款,本身係用嚟為第三方做擔保嘅保證金,已經被相關銀行強制執行(即係沒收咗、扣咗數)。
4. 恒大物業都唔知點解,所以成立特別委員會去調查。我覺得咩公司發現,根本係核數師做核數時,發現銀行戶口少咗134億,發現件事。
5. 大拿拿134億,幫第三方做擔保,肯定好friend啦?不出所料,簡直係有血緣關係!
恆大物業出公告指有134億銀行存款不翼而飛

初步調查結果

6. 佢7月22日個調查結果公告又長又複雜,但係個核心內容其實係話:由2020年12月到2021年9月期間,恒大物業(6666)以5筆自己銀行嘅定期存款,為第三方擔保,令第三方可以問銀行借到錢。
7. 個重點係,原來呢啲第三方問銀行借嘅錢,之後全部透過其他公司轉咗俾恒大(3333)。
8. 有啲款項到期後,第三方有還錢俾銀行嘅,恒大物業嘅等額保證金擔保就自動解除。
9. 有啲到咗期後,第三方冇還錢俾銀行嘅,恒大物業嘅等額保證金擔保就被銀行強制執,即係俾銀行直接喺佢戶口扣數,填番第三方無還錢嘅金額,而個金額就係134億。

份初步調查公告出得好差

10. 個公告解釋因為第三方無按時還錢俾銀行,所以銀行扣恒大物業戶嘅等額存款。呢個唔講都知啦,做擔保俾人扣數,咪就係你擔保條友仔無還錢。
11. 但公告無講點解第三方無還錢,亦都無講點解第三方要轉咗啲錢俾恒大(3333),係借錢俾恒大定點?
12. 成份公告只係好客觀陳述咗:1)恒大物業做擔保、2)第三方借錢、2)第三轉錢俾恒大、4)第三方唔還錢,5)恒大物業存款保證金俾銀行沒收,但死都唔肯串連返成個故事嘅因由。
13. 明眼人一睇都知,根本呢件事說穿了,就係恒大(3333)用咗佢子公司恒大物業啲錢去還債。
14. 但係點解咁麻煩,又要有第三方嘅參與,又要去成立獨立調查委員會去查?母公司用控股子公司錢唔得架咩?

小數股東權利

15. 呢度有一個好重要嘅概念我地要知:因為恒大(3333)同恒大物業(6666)本身係兩間上市公司,有兩批唔同嘅獨立股東基礎。
16. 雖然恒大(3333)係持有恒大物業(6666)約60%股權,係恒大物業嘅控股股東,但恒大物業仲有40%小數股東利益存在。
17. 所以理論上兩間上市公司係獨立營運嘅。兩間上市公司資金使用,都要透過佢地各自內部審批程序、符合商業邏輯先可以動用。
18. 唔係話身為控股股東嘅恒大(3333)有債務到期要還,就絕對唔可以用子公司恒大物業嘅現金去還。
19. 而係如果真係要咁做,恒大物業係要開股東會,解釋個原因俾恒大物業嗰40%小股東聽,等佢哋批准先可以動用恒大物業嘅資金去幫恒大還債。
20. 但係當初恒大分拆恒大物業上市喺市場集資嘅原因,一定唔會係幫阿媽還債。因為幫阿媽還債係唔會令恒大物業嘅業務有正面影響,無人會原意俾錢你咁做。所以如果而家要小股東批,一定通過唔到。
21. 所以站在恒大嘅角度,佢地想打子公司啲錢嘅主意,但又唔想驚動小股東,可以有咩方法?

客觀事實嘅推想、猜想

22. 呢度好難寫,我唔係管理層,唔知佢地諗緊咩,亦唔可以主觀定奪點解佢地咁樣做。但我會分析唔同scenarios會導致乜嘢嘅客觀結果,去令你地更加明白成件事發生嘅可能原因。
23. 客觀情況:阿媽財困,唔夠錢還債,可能會債務違約,導致連銷反應。阿仔銀行戶口有錢,可能可以幫到阿媽。點樣幫?有幾個方法:
24. 方法一:阿仔直接用自己銀行啲錢代阿媽還債,但無合理商業原因、銀行月結單有交易紀錄,年報現金流量表會披露。
25. 方案二:阿仔借錢俾阿媽,但因為都係無名目,銀行月結單都係有交易紀錄,即係年報都係會披露,唔得。
26. 其實方案一、二,喺出年報前,因為咁大筆錢,仲要係幫控股股東呢個關連方,即係關連交易,根本一早就要即刻出公告。所以一定驚動哂全世界。

27. 方案三:阿仔只做抵押自己銀行存款嘅動作,即係佢銀戶口無少到錢。同一時間,佢擔保嘅人唔係阿媽,而係第三方。咁呢個唔係關連交易,之後再由第三方轉錢俾阿媽。
28. 個客觀效果係阿仔:1)年報現金流無出數紀錄,2)唔需要出關連交易公告,3)阿媽又有錢收。個感覺真係好似內保外貸。
29. 但係呢,百幾二百億擔保,就算係第三方,個重大風險已經存在,其實都係內幕消息,要即時公告。但好明顯當擔保發生時,阿仔係無發過任何公告通知個市場。都幾自欺欺人。
30. 我估啦,佢地覺得只要到期還錢,就其實可以不著痕跡咁幫咗阿媽。唔使嚇襯阿仔少股東。
31. 咁成件事,最理想嘅結果係點?就係喺核數師做核數前,還到債,啲錢周轉一吓返番嚟、消除抵押。

32. 出事嘅就係,喺核數師做核數前,未還債、未消除抵押,仲要係被強制執行,即係保證金存款被銀行沒收,即係就係而家呢個情況,大嗱嗱134億,俾銀行沒收。
33. 個關鍵敗筆就係阿媽一借無回頭,所以銀行強制執行。當初做擔保,阿仔銀行戶口無真正出數,但而家銀行扣咗你錢,即係已經出咗數。即係到時年報現金流一定要出乜乜「被強制現流出」。
34. 咁而家成件事都叫通哂天,點都要圓咗件事,所以就要成立獨立調查委員會去解說個事件,同埋解決方案。
35. 第一,無論係母公司定子公司,都要有高管辭職孭鑊,因為梗係因為只係員工失誤。第二,阿仔啲錢俾阿媽無原因地用咗,一定要還,同阿仔小股東交代。
36. 但佢個公告就話用阿媽啲資產(即係係咪啲賣唔出嘅樓盤?)去還。呢招絕呀,阿媽賣唔到樓俾個市場,變相賣樓俾個仔,其實咪就係變相硤硬賣樓俾阿仔嘅小股東。
中國恆大(3333)賣樓俾恆大物業(6666)還債

37. 其實我係阿仔嘅小股東真係嬲到爆,老屈,拎完我啲錢,俾人發現咗,就拎啲而家唔值錢嘅嘢,去當還債!

總結

38. 呢單嘢,真係要時刻提醒自己,股票市場有幾凶險:母公司有事,子公司都一定會瀨嘢。
39. 無論係合法地將子公股權賣出去套現(沽壓突然加大,股價一定大跌)或者係非常手段(我唔會講非法,因為合唔合法等法官講),都實會令子公司資產受損。

公告連結,可以自己再細味吓,其實件事好離譜。
https://www1.hkexnews.hk/listedco/listconews/sehk/2022/0722/2022072201505_c.pdf

聲明:以上內容純屬個人意見及分享,並不構成投資、買賣建議或推薦
Credit: CFO講年報