市盈率25倍的騰訊(700)可重拾昔日光輝?

1. 我睇到大行預測嘅數字同埋管理層嘅表述,感覺又冇咁強烈。我都唔識講,不如睇吓我見到嘅數字情況,你哋自己判斷究竟騰訊係一天都光晒定係已經變咗質?

業績數字

2. 騰訊2022年全年業績,收入5546億,同比跌1%,毛利2387億跌3%,毛利率43.1%,對比上年(2021年)係43.9%。
3. 如果只睇2022年第四季,毛利率42.7%, 2021年第四季有40.1%好似都有進步,但係2022年第三季其實有44.2%。
4. 全年毛利率同比係微跌,季度毛利率同比升,但係環比明顯下跌。我只可以話降本提效似乎唔係想像中咁明顯。
5. 至於直接成本增長接近1%,你可以話佢控制成本,成本唔上升,見成效。
6. 但如果同前一、兩年嘅騰訊比,一定唔算合格,因為佢收入都下跌一個1%,但直接成本竟然係升,又話要cut cost,但竟然cut極都係升。
7. 經營利潤2357億,同比跌13%、股東應佔純利1882億,跌17%。
8. 毛利跌3%,但純利跌17%,即係費用升咗好多啦,削減成本嘅路好似真係唔易走,同預期有出入。
9. 關於管理層展望嘅劈頭第一句:「二零二二年,我們提升了效率,聚焦於核心業務」。睇返上面啲數字,呢句似係一種希望多個實質嘅執行成果。但從管理層嘅長遠策略嚟睇,明顯已經唔係成長股、增長股嘅思維。

主營業務冇潛力、驚喜嘅計劃

10. 本地遊戲只提個別產品有增長,但整體收入其實同比跌4%。更多篇幅落到國際遊戲收入佔比總遊戲收入由28%升到33%,因為國際遊戲收入同比升3%。但實際啲講:更重要、佔比70%總遊戲收入嘅本土遊戲仲係了無生氣。
11. 網絡廣告同比跌7%,但單睇Q4同比、環比都有15%增長,公道啲講係有驚喜。
12. 不過長遠增長動力唔樂觀,唔識預測中國整體經濟2023會突飛猛進,而且佢同比基數又大,同埋我反而覺得監管打壓已成常態,而唔係話趨向正常地減少。
13. 金融科技同比只升3%,唔知有咩驚喜。反而從管理層字眼:「我們也依據新的監管框架通過與持牌金融機構更緊密的合作,探索消費貸款和在線保險服務的機遇。」
14. 濃濃感覺到應該好多限制,只可以係要擁抱監管嘅大前提下,探索新機遇,即係無驚喜,等運到,好被動。
15. 雲業務篇幅更少,只係提減少虧損業務,不提增長計劃。基本盤增值服務,註冊收費用戶同比跌1.1%、環比升2.2%。
16. 呢個數字,其實已經好多季徘徊喺2.3億左右嘅水平,就算你唔話佢有倒退,但好幾季都冇增長就係事實。我覺得呢個數字似係見頂,因為個市場其實競爭好大。
17. 以上種種都令我覺得佢已經唔係高增長股,價值股還可以,咁大規模,流量又係壟斷性,所以穩定緩慢增長係可以嘅。
18. 但唔好期望一兩年前嘅高速增長趨勢,你見個PE 15、16倍,就知佢俾市場嘅定位。

出售股權投資收益成常態

19. 分派美團再加埋出售Sea 嘅收益,股權投資變現收益一年就有1,664億。
20. 已經係增值服務、網絡廣告同金融科技三大主營業務加埋毛利2387億嘅70%。但係個分別係主營業務需要請好多人每日都營營役役去經營。
21. 但係股權投資收益係冇乜嘢需要經營,只要董事會批准簽個文件,劉熾平喺美團個board辭職,就即刻可以入帳。
22. 而只睇2022年Q4 同2021年Q4,其他收益都有850億以上,都高過成個集團當季嘅主營業務毛利500-600億。
23. 出售股權投資喺反壟斷監管背景同高利潤嘅情況,每年都一定會搞,尤其每年Q4。
24. 咁和味嘅嘢,一年成千幾億收入,上年搞咗,今年唔搞,唔使計其他嘢,同比就會先少1,000億收益。

關於成本費用

25. 銷售費用292億,係減少咗28%,無業績,削減銷售人手、成本好合情合理。
26. 但行政開支有啲嚇人有1,067億,唔減都算,竟然喺提倡縮減成本嘅大環境下升19%,仲要咁大間公司,呢一part做咗咁耐生意,係唔係應該好穩定?
27. 佢有解釋主因係研發開支增加 157 億,而其中僱員成本增加70億。
28. 唔識睇,因為佢又冇特別提到有咩技術上嘅新突破或者新憧憬,上年提到嘅元宇宙,今年一粒字都冇再講,就算係AI chatbot 都冇提。
29. 另外好得意,之前無留意,但佢成日都有意無意提SSV同CPP開支,相關員工開支增加5000萬,其他SSV同CPP開支增加5億。
30. 我話佢有意無意係以騰訊規模,增加 5,000 萬同增加幾億根本不值一提,點解咁少數都要提?
31. SSV同CPP係咩?係「可持續社會價值及共同富裕計劃」。
32. 呢啲披露數據,應該唔係俾投資者睇嘅,可能係俾阿爺睇,表達佢一路都有主動共同富裕,但係呢個對股東嚟講係一個咩感覺?
33. 騰訊2022年業績,整體感覺營營役役但無力突破,成本控制又唔夠大刀闊斧,出售股權投資變成常態業務,仲有SSV同CPP嘅陰霾揮之不去,對佢嘅憧景係咩?睇完自己判斷。

聲明:以上內容純屬個人意見及分享,並不構成投資、買賣建議或推薦
Credit: CFO講年報