領展(823)供股價實際折讓幾多?

1. 供股性質說明,計數嘢但好重要!

攤薄持股比例?

2. 先講個結論,實際供股折讓只係得4.9%,如果供股後無其他因素影響,個股價應該係HK$59.7。
3. 供股就係上市公司向現有股東(記住係:現有股東),按佢地持股比例發行新股,唔係現有股東係無權認購嘅。
4. 假設領展已發行股數係100股,總供得3個股東:股東A本身持有20股,股東B本身持有30股,股東C本身持有50。咁佢地本身持股比例係2比3比5。
5. 今次5供1供股,即係會發行多20股新股(100/5=20),即係股東A可以認購4股(20/5=4);股東B可以認購6股(30/5=6);股東C可以認購10股(50/5=10)。
6. 假設全部跟供,供股後,A總共有24股(20+4=24);B總共有36股(30+6=36);C總共有60股(50+10=60)。
7. 請問A、B、C之間持股比例有冇因為供股而變化?係冇。因為24:36:60,即係等如2比3比5。所以如果現有股東都供股,無股東係會俾人攤簿持股比例。

真正折讓百份比

8. 另外,話佢折讓3成供股,攪到股價今日開市一定跌。計吓數:上星期5收市價HK$62.8,假設供股前總發行股數係100股,咁即係個市值係HK$6280。
9. 供股價係HK$44.2,發行20股新股,股價表面上折讓咗29.6%((HK$62.8-HK$44.2)/HK$62.8)。
10. 但好多人都忽略咗佢而家無集資,係可以多咗一筆現金(真實情況係HK$188億),我而家呢個例子係收HK$884(HK$44.2x20股=HK$884)。

11. 咁供股後,領展嘅市值理論係HK$7164(HK$6280+ HK$884= HK$7164),就係供股前市值加現金增加部份(即係好似股息除淨嘅相反,市值減現金分派部份)。
12. 所以當供股發生時,我地唔可以只睇供股價HK$44.2,就話折讓3成(雖然好多媒體都係咁講),正確係要睇埋間公司現金增加部份令總市值增加呢部份。
13. 供股前,股價係HK$6280/100股,即係每股HK$62.8;供股後,假設其他因素不變,股價係(HK$6280+HK$844)/(100+20)股= 每股HK$59.7。
14. 供股後實際股價,喺考慮供股供嘅折讓幅度同埋現金增加兩個因素後,實際嘅折讓只係4.9%((HK$62.8- HK$59.7)/ HK$62.8=4.9%)。
15. 實際折讓價並無出面吹到,或者片到領展一文不值咁大。

供股對現冇股東實與影響

16. 同時間,記住呢個係供股俾自己股東,唔係配股俾街外人。如果你係現有股東,你只要供股,你就唔會被攤薄持股比例,而且你無賺無蝕嘅。
17. 例如A,供股前佢持有領展20股,即係持有HK$1256市值,供股後佢持有HK$1432.8市值((20股+4股)xHK$59.7= HK$1432.8)。
18. 當然股東A總財富無多到,因為佢持有領展嘅市值由HK$1256,增加HK$176.8(HK$1432.8- HK$1256= HK$176.8)係因為佢參與供股,喺自己銀包度拎咗現金HK$176.8出嚟(HK$44.2x4股= HK$176.8)擺落股票度。
19. 我用上面咁多數字做例子,係想你明白:1)今次供股,實質折讓只係4.9%,並唔係3成;2)對現有股東嚟講,只要佢參與供股,佢嘅持股比例同埋佢嘅總財富係唔會變;3)個核心係呢個唔係折讓股價土配股俾非股東、街外人;如果係折讓股價配股俾非東股,當然對現有股東唔公平,因為係一定直接攤簿咗現有股東持股比例,不過個好處係唔洗問你現冇股東拎錢。
20. 致於話個供股價HK$44.2咁低,心理上一定會額外影響個股價,咁你就要自己獨立思考呢個係危定係機。

供股實質上對基本面嘅影響(唔係心理)

21. 你話佢經營上乜乜乜,有咩唔好,管理層有咩唔好,無前景,市場上都各有取向,亦都可以睇番我最近嘅分析文,詳細講哂佢基本面、增長前景、派息穩定性,一目了然。
領展(823)開始全面復蘇?
22. 但呢一刻要獨立思考嘅係: 有冇一啲經營上嘅嘢,係因為供股後先會發生、影響佢?。
23. 佢供股公告講咗,集資HK$188億,其中HK$80億至HK$100億會用嚟償還銀行貸款。個客觀效果係會令佢減少咗財務費用,同時又可以保持到流動性用嚟派息、收購新物業。
24. 佢帶息負債最新2022年9 月底財報披露係HK$553億。當時平均利率要3%(而家應該更高),咁佢還咗HK$100億,一年都可以慳番3億多(差唔多係佢一年財務費用嘅25%)。
25. 而家加息週期,喺有部份債務就嚟到期嘅時機,減債係慳息係好客觀嘅供股正面影響。

26. 最緊要嘅係佢係房託,除咗非現金利潤外,90%利潤都會派俾股東。慳咗3億財務費用(如果續期唔還,唔只3億),就係現兜兜增加2.7億(3x90%=2.7)可分派利潤,會派番俾股東。
27. 以上星期5收市價計,佢慳番財務費用,之後直接派俾你,個yield 就會由4.5%升到4.7%,咁呢個唔係買房託想收息向好方向咩?
28. 供唔供股,佢目前嘅業務都係咁樣,每年派息都係600零億,唔會供咗股就派少咗。
29. 你鬧佢呢樣嗰樣,你可以話佢本身做得差,但就唔係因為供股令到佢更差,兩件事。
30. 即係從老板角度,個CEO問你拎錢,但除咗還債又講唔到實質有咩proposal,因為你本身睇佢唔順眼,所一問你供股拎錢,你就小到佢爆。

結論

31. 一間公司,無論無上市唔上市、房託定唔房託,個financing structure 都有debt 有equity。而家cost of debt 因為加息貴咗,而個房託最終目的就係派息俾equity holder。
32. 咁呢一刻,趁某部份debt就嚟到期,做個financing restructuring,還咗去慳息,有咩無題呢?
33. 至於話佢高價回購、低價折讓供股,回購係派錢俾股東,供股係低價問股東拎錢,都係同一張股票。唔通你想佢低價派錢回購,但高價問你拎錢供股? 你話高價配股問街外人拎錢,就話啫。
34. 都係嗰句,供股前後,對佢實質有咩影響?當然上面唔可以apply 落無乜實質業務嘅上市公司嘅供股啦,但領展唔係嗰種上市公司。

聲明:以上內容純屬個人意見及分享,並不構成投資、買賣建議或推薦
Credit: CFO講年報