中海油首三季再盈喜

中海油(0883)發盈喜，首三季淨利潤有1078至1098億人民幣，睇返上半年的盈利是719億人仔，換言之第三季的盈利就是359億至379億元，首季盈利是343億，而次季盈利是376億，早前都寫過，首季紐約期油日均價係95美元，次季是108.5美元，第三季的日均價係91.4美元，按理盈利數應該會比首季及次季略低，但最終第三季叻過首季，整體來說係不錯，應是控成本方面有得益。

對股價的影響應不會太大，即使是利好都會是較短暫的，因為期油數字有數得計，而且第三季又不會派息，所以刺激有限。現時的格局是，美國方面很想將油價壓下，拖低通脹，沙地油王唔想理你，所以走去支持減產，俄羅斯亦樂見高油價，進入冬季後油氣需求上升，現時期油上唔到90美元，已經幫盡你個通脹了。所以第四季中海油的盈利，預計都會跟早前差不多，換言之全年會賺千四億元以上，每股盈利有3.53港元，年初的承諾是全年至少派四成盈利，即每股派1.41元是底線，上半年派了0.7元，下半年再派0.7元是最基本的，會不會派凸就睇管理層喇，亦都要睇11月及12月的油價走勢。

在業績公佈前公司不能作回購，但北水近日亦不見積極吸納，所以唔夠力企上10蚊，現價買的話，下半年收0.7元息都是7厘以上，係好吸引，只係市西，等一個較好的入市位再撈啦。

聲明：以上內容純屬個人意見及分享，並不構成投資、買賣建議或推薦
Credit: 青冰投資