中國移動(941)擺脫國企形象，說好高增長故事
2022年業務增長動力
中移動2022年總收入 9373 億，同比增長 10.5%，其中通計服務有 8121 億，同比增長 8.1%，其餘係硬件銷售收入 1252 億，同比增長 29.3%。
經營利潤 1291 億，同比增長9.4%，經營利潤率13.8%， 同2021年嘅13.9%，大致持平。
股東應佔純利（即係用嚟計派息比率嗰粒數），1255億，同比升8%。
公用、收息股，一年收入增長10%，算唔錯。拍埋騰訊2022年收入係跌1%，阿里巴巴最近一季收入只升2%。
咁你就明白中移動唔係你想象中郁得咁慢；另一個角度睇，就係究竟騰訊、阿里巴巴係唔係仲係增長股！？
我地以後一定要留意佢以後會成日提住嘅「數字化轉型收入」。2022年有2076億，同比增長30%。
呢個業務佔比總通訊業務收入26%，唔係最主要收入來源，但係絕對增長動力。因為中移動全年通訊業務總增長606億裏面，有482億（即係79.5%）嘅增長係來自呢個「數字化轉型收入」。
數字化轉型收入(CHBN)
C 係個人通訊業務，呢個分類係最傳統、最基本盤嘅業務，本身無乜得增長：9.75億個人用戶數（+1.9%）、6.14億5G用戶數（+58.7%）外，但ARPU都係人民幣49蚊，增長5.8%。
而下面呢幾類就係有包含咗「數字化轉型收入」嘅業務：
H 係家庭服務，傳統係提供寛頻服務，轉型就tie-in sale 埋互聯網電視、家居保安、智能家電。就係想喺家居生活數字化轉型中，同其他互聯網公司搶生意。2022年都有成1166億，同比增長16%。
B係政企業務，傳統係為企業及政府機構提供上網數據，而家轉型sale埋提升營運效益嘅互聯網通訊服務（DICT），即係提供企業營運實際通訊服務、視頻會議、視頻監控、IPTV，同埋雲服務。
當中雲業務收入503億同比增長108%、DICT收入 864億，同比增長38.8%。
N係新業務，例如雲遊戲、數字內容、金融移動支付「聚焦和包」。整體收入有385億，增長27%
雖然5G人數增長強勁（58.7%），但整體移動通訊ARPU唔係好受惠於5G人數增長，（只升5.8%）。不過我覺得5G用戶人數增長實質嘅效益，係幫緊佢數字轉型業務嘅增長，因為整體用戶數據速度增加數字轉型業務先會更有效益同多元化。
業績數字上嘅狀態及2023年派息水平
傳統通訊業務維持低增長，每年1%-2%（個ARPU咁低，用戶基數咁高，都好難再跌）。
同時又有26%嘅數字轉型業務係有30%高增長，79.5%嘅增長貢獻，所以絕對可以講係新增長曲線。而呢個數字轉型業務，係睇得明、唔大風險嘅業務（其實係搶緊民企生意）。
再加上佔13%嘅硬件業務都有30%年增長，所以之後一年總收入有8%-10%嘅增長唔難做到，即係2023年有機會做到1萬億收入。
穩定嘅利潤率，代表一年股東應佔純利增長都可以有8%-10%。財經新聞話佢2022年末期息派HK$2.21同比係跌咗9%，但唔好標題黨，加埋中期股息，全年派HK$4.41，全年同比係升咗8.6%，而且派息比率由 2021年嘅63%升到2022年嘅66%。
2023年派息比率保證升到70%，先假設佢2023年股東應佔純利零增長，2023年全年股息依然會有6%增長（EPS RMB5.88x70%/0.88-HK$4.41）/HK$4.41=6%。（註：按派息比率為70%，滙率為0.88計算）。
保守啲，如果佢股東應佔純利只升5%，2023年股息已經會升11%，（RMB5.88x105%x70%/0.88-HK$4.41）/HK$4.41。結論係2023年股息係好大機會升幅多過2022年同會係雙位數，同埋有HK$5股息都幾乎走唔甩。
買賣策略
如果無貨，現價仲好唔好入？好現實，我答唔到你，答到你嘅都係估估吓。
年初至今升咗27%其實升咗好多，現價入賺息蝕價機會大咗，無人可以預測到。
跌市中，佢算好穩陣，但總會有一批人跌市時會放一部份，因為真係升咗好多。
但同時，中移動因為高息率，股息現金流強，防守性強，令到跌市持貨的散戶無咁擔心，相對其他股票，喺跌市時無咁波動。
有貨梗係揸住先，可以長期持有。
因為說穿了，就係阿爺喺自己地頭（中國）做10幾億人要用、但又好平嘅電訊生意，而且仲要長期、持續要派息俾阿爺，外國又攪唔到佢，點輸？除非阿爺冧咗。
好嘅股票真係唔多，市場都係傾向穩陣行先。
基本上，中移動今年大升嘅原因係佢好符合市場而家嘅胃口：穩定唔波動、細風險、仲要喺加息周期佢又俾到高yield。
如果之後減息，以賺息嚟講，佢相對仲吸引，但當然高估值股都會升，所以係睇你投資取向。
你話嗰啲高增長、科技股、有前景嘅板塊，一係就無息派，一係就估值大插、一係就阿爺打壓、一係就業務唔穩定。
呢一兩年我都係逆向思維睇呢隻股：成日問自己、其他人，中移動有咩缺點？唔好再答我無乜增長啦，比起騰訊阿里佢先叫增長股呀（佢地都見頂，當然無人否定佢地搵到新增長點，但佢地係民企嘅本質而家係蝕底啲）。
你話佢唔夠NVDA、TSM嗰d芯片股、又唔夠啲油股、資源股增長得咁勁喎，但佢唔需要經歷芯片股行業週期性去庫存嘅困境。
增長唔完全依賴自己控制唔到嘅商品市場價格波動（其他嗰啲其實都係週期性油價、資源鐵礦價近年大升，但可唔可以以後都年年大升？）。最緊要、最緊要一樣嘢，係佢嘅業務性質本身極穩定。
10億人用戶，每日都要上網，ARPU 又咁低，大衆用品，就算經濟差、經濟好，業務都唔會太受影響，呢個仲唔係長期持有嘅股票？
相關閱讀
如果按目標股息率7% 計算，目標價是71.4港元，另加今年末期息每股2.21港元及明年預期每股5港元的股息，以現價63.6元計算，持有一年多的潛在回報約23%……加上期權輔助，一年潛在回報大概率可以高過23%，故此中國移動股價在70元以下將會一直是我組合的重倉股。
