中國移動(941)2022中期業績點評

1. 見到新聞話中移動係2022年福布斯數字經濟企業排第三，僅次於騰訊、阿里巴巴。
2. 好多人印象中覺得中移動係廢佬股，業務悶、無增長。
3. 咁點解福布斯會將佢呢隻悶股，喺咁多芸芸科技巨企裏面排第三呢？
4. 睇佢最近中期業績財務數字，搵吓有冇數字經濟元素，真正了解多啲佢嘅前景最實際。
5. 之後再同騰訊、爸爸比較一吓啲財務數字，感覺又係點呢？可以自己獨立思考吓，好過只係靠個印象。
6. 睇開我文章嘅朋友，都知我不斷講今時今日，基本面港股嚟講，佢係最好最穩陣，長揸無問題。

7. 基本面詳細分析，可以睇返之前分析文：中移動(0941)擁提速降費優勢。

最新中期業績
8. 中移動2022年1-6月中期業績，整體表現幾好。總收入人民幣（同下）4969億，同比增長12%；股東應佔利潤（用嚟計派息比率嘅數）有703億，同比增長18.9%。
9. 其中服務收入有4264億，佔總收入86%、增長8.4%；而產品收入有705億，佔比14%，但增長有40%。
10. 產品收入增長高，但唔係焦點，因為個產品毛利得16億，毛利率得2.3%。低利潤推產品，重點都係想推多啲移動通訊服務收入。
11. 今年中期業績，最值得留意嘅係佢數字化轉型收入，有1108億。同比增長39.2%，佔總收入都有26%。望返2021年全年業績，呢個數字化轉型收入係1594 億。
12. 即係話2022年只過咗一半時間，佢呢個數字化轉型收入已經做到2021年全年嘅70%。咁數字化轉型收入有啲咩明細？
13. 中期業績無好有系統咁列出明細，因為相比3000幾億嘅傳統業務收入，再將呢1108億嘅明細列出可能望落會頭重腳輕。
14. 但佢用文字去表述，都用咗唔少編幅；喺字裏行間，滙總如下：

個人業務C
16. 絕大部份就係固有嘅個人移動網絡服務收入，2022年半年有2561億，同比增長0.2%。
17. 呢個業務增長跟ARPU（Average Revenue per user） ，今年半年APRU $52.3，同比增長都係0.2%。 呢個唔係好郁嘅ARPU，可能就係俾人垢病中移動無增長最多嘅地方。
18. 講真APRU如果有得大升，中國移動就叫中國飄移啦。
19. 所以今次佢就好大編幅講解佢嗰1108億數字化轉型收入。最主要係來自H、B、N。

20. 而家唔只提供寛頻流量，仲會tie-in埋互聯網電視、家居保安、智能家電等，就係想喺家居生活數字化轉型中同其他互聯網公司分一杯羹。
21. 我無用過佢呢啲服務，所以實際啲睇數字，今年半年家庭服務收入都有成594億，同比增長18.7%。其實呢個增長真係唔失禮好過好多科技股。
22. 原來佢個互聯網電視，叫「魔百和」（其實唔細心睇，我真係唔知有呢個電視），都有成1.8億用戶，規模算唔細。

政企業務B

23. 主力服務企業同政府機構嘅DICT同雲服務，兩者今年半年分別有482億收入，增長44.2%；234億收入，增長103.6%。其實規模唔算細，而增長簡直係超勁啦。
24. DICT 係Data Information Communication Technology，具體啲即係企業互聯網通訊服務，即係唔係只上網數據提供者，而係為企業營運提供實際通訊服務、視頻會議、視頻監控、IPTV等。

新業務N

25. 例如雲遊戲、數字內容、金融移動支付「聚焦和包」，整體收入有199億，增長36.%。其實唔詳細睇真係唔知佢有呢啲業務，規模唔算太大，不過佢都有提到，其實佢地隨時可以用好強勁嘅現金流，以股權投資方式去加快有潛力新業務發展。

比較騰訊、爸爸同期數據
26. 如果比較雲業務，阿里巴巴2022年一至六月有367億收入 ，增長11.2%，中移動雲業務雖然得234億，但係增長就勁好多，有成103.5%。
27. 比較半年總收入，阿里巴巴有4097億 ，增長4.2%，騰訊有2697億下跌1.5%，而中移動有4969億增長12%，都係中移動最有勢。
28. 如果要計經營利潤率，中移動今年上半年有15%，比上年同期14%，仲要提升1%。
29. 即係話佢嘅新業務唔係淨係提升top line銷售收入，而係利潤率都有所提升。
30. 呢個合理，因為新業務嘅邊際成本，應該唔會好高，都係服務相關，佢最高嘅成本都係基站、折舊。
31. 即係話當新業務規模再大啲，整體利潤率都有機會再升。
32. 而阿里巴巴經營利率2022年半年係10%， 2021年同期係負11.7%。
33. 騰訊2022年半年經營利率有25%，當然係高，但係望返2021年上半年有成39.8%，同比足足下跌左成14.8%。
34. 就咁睇上面數字，你應該都會感覺到，邊個走勢好啲啦，有增長前景嘅，而家可能真係中移動。

用HK$53現價計佢2023年會有10% 股息Yield

35. 中移動股東應佔純利2022年半年係703億 ，同比增長18.9%。但係其中一個咁高增長嘅原因，係2021年上半年基數較低。
36. 2021年上半年一次過將舊有通訊設備全部折舊哂，因為好似2G嗰啲設備根本唔會再有價值，做成折舊費有增加，股東應佔純利減少。
37. 如果撇除呢一個因素，佢嘅股東應佔純利今年半年係增加7.3%。
38. 理論上2023年嘅股東應佔純利應該會高過呢個7.3%，因為佢嘅數字轉型業務增長保持高速，而且佢哋嘅邊際利潤率較高，但係保守估計我就當佢2023年得5%增長。
39. 假設2022年下半年無增長（但其實點都會有），即係中移動2022全年嘅股東應佔純利係703億 ×2=1406億。
40. 而2023年全年股東應佔純利，就會係1406億x(1+5%)=1476億。
41. 2023派息比率保證咗係70%，即係會派 1476億x70%=1033億。
42. 假設目前已發行股本去到2023年不變，係213億股。呢個股數可能會再減少，因為中移動都會再作回購，但亦都唔排除佢喺A股再集資發新股，所以假設保持不變。
43. 1033億/213億股=每股派 4.85；
44. 再轉港幣4.85/0.85=HK$5.7；
45. 我當你現價HK$53買入，即係個yield都有10.8%都好穩陣。
46. 當然，我唔排除佢會跌番落51左右，但長遠收息，有數得計，係無問題。

結論
47. 科技公司、互聯網公司最緊要嘅就係佢嘅流量切入點，騰訊有12億微信用戶，阿里巴巴就係10億電商用戶。
48. 呢啲流量切入點只有少部份係付費用戶，係要再投入成本，透過轉化先至可以變現為呢啲科網公司嘅收入。
49. 但中移動嘅流量切入，就係全部都係付費嘅10億移動網絡用戶。
50. 當如果大方向政策係國進民退，同樣擁有龐大流量切入點嘅中移動要搞數字經濟，其實都唔係話不可入流，反而更有競爭優勢，因為佢賺到嘅錢就直接可以派息俾揸70%，阿爺呢個話晒事嘅大股東。
51. 唔使好似民企咁、下下要罰錢、約談、監管、反壟斷、呢啲對民企嚟講係費用，會減低純利，而國企派息俾阿爺，係純利後，唔影響純利。

聲明：以上內容純屬個人意見及分享，並不構成投資、買賣建議或推薦
Credit: CFO講年報