解讀阿里巴巴(9988) 2022Q3業績：苦苦爭扎中

2022-12-12 港股分析師股市消息

1. 阿爺防疫政策開始轉向，市場有反應，熱切期待喺中國經營業務嘅上市公司業績反彈。
2. 諗深一層，如果真係解封之後，有啲上市公司嘅業務表現都係差，佢地就唔可以再用防疫封控為由去辯解。
3. 講緊嘅係阿理爸爸，其實比較佢近兩季嘅差異，或多或少可以睇得出將來完全解封後，業績都未必回覆以往嘅增長力度。

收入升嘅原因

4. 按業務分部，核心老本行服務電商（即係佢所講嘅客戶管理、佔總收入32%）同比係跌緊7%。
5. 而直營電商（即係爸爸自己買貨、坐貨、佔總收入31%），同比升6%。但整體中國電商業務都係跌緊1%，即係最核心嘅本業肯定仲未轉勢。
6. 佢近年係想擴大直營電商嘅市場，做成直營升、服務跌嘅Pattern，但我覺得佢唔會主動做少啲服務電商。
7. 因為服務電商毛利率高好多，因為唔使坐貨；直營要坐貨，利潤微薄。所以呢個Pattern其實可能係反映緊佢自身服務電商飽和，俾其他競爭對手蠶食緊市場，所以先要積極開發直營市場。

電商本業都係下跌，咁總收入3%嘅增長係乜嘢？

8. 主要係因為本地生活（即係類似美團外賣）升21%（但佔比總收入得6%）、菜鳥（即係物流）升36%（但佔比總收入只係7%）。
9. 兩者加埋得13%總收入，就算有增長，目前都難以充當大任，去做到長遠增長點，作為扭轉爸爸頹勢嘅主動力。

環比變化可睇出解封後表現

10. 至於環比上季，總收入只微升0.8%。當中服務電商環比竟然跌10%，跌得仲多過同比跌幅嘅7%。而預期會有增長嘅直營電商，環比只係無升無跌。
11. 一開始講過，睇近兩季表現變化，即係環比，或多或少可以睇得出疫情解封後，爸爸可唔可以回復可觀增長。
12. 因為4-6月爸爸嘅第一財季，啱啱遇著上海封城、國內疫情嚴重嘅時間，可以視為疫情受影響比較嚴重嘅一季，所以佢業績表現差，係意料之內。
13. 但之後嘅一個財季（7-9月），即係今季，疫情同防控都輕微咗好多，可以視為疫情解封嘅狀態。
14. 但爸爸嘅服務電商竟然環比都係跌，而直營電商就冇升冇跌。即係話疫情嚴重，佢做得差，疫情好返佢做得仲差。

經營利潤做成點？

15. 經營利潤叻仔啦掛，同比升成68%喎！而且經營利潤率都有12%，早幾季得1.8%。
16. 經營利潤確實係有明顯進步，absolute amount由上年同期嘅150億，增加101億到今季嘅251億。
17. 呢101億當中，收入增長貢獻65億（增長3%）；經營費用就慳咗36億，即係減咗1.94%，又唔係話進步好多。
18. 再望埋佢費用減少36億裏面，有23億（64%）係因為股權激勵費用減少，而股權激勵費用減少係純因為相關股權激勵嘅公允價值減少咗而導致。
19. 即係話，今季有64%嘅費用減少唔係因為經營效率提升嘅經營原因所致。
20. 咁樣睇落去，費用成本控制成效並唔明顯，好容易下一季又走樣增加番。
21. 致於環比，經營利潤升0.8%，就幾乎又係同上季狀態一模一樣。又係果句，疫情防控嚴重，你做得差，防疫稍爲舒緩啲，你都係冇進步喎。
22. 仲有係上季冇股權激勵費用下跌呢個非經營因素，都係12%經營利潤率，今季有呢個因素又係12%，變相其實經營效率仲差過上季。

結論

23. ATM最新業績睇哂，最有增長動力同朝氣，一定係美團(3690)，後生仔好氣好力。
24. 整體形勢嚟講，爸爸當然都仲係差，苦苦爭扎。上面都講咗，感覺佢唔係純因為疫情而走下坡而係本身都走緊下坡，如果唔係，點解疫情舒緩好多嘅第二財季表現其實係仲差過疫情嚴重嘅第一財季
25. 仲有一個顯眼位要留意，除咗中國電商外，所有分部業務，今季都係有經營虧損，作為一間咁大規模，咁成熟嘅科技巨頭係絕對唔合格。

聲明：以上內容純屬個人意見及分享，並不構成投資、買賣建議或推薦
Credit: CFO講年報

阿里巴巴