解讀Apple 2023Q1業績：智能手機市場倒退？

1. 蘋果年結係9月底，所以2022年10月至12月底，係佢2023年財年嘅第一季。而最新型號iPhone都會喺每年9月中開售，所以10-12月，係蘋果一年裏面嘅銷售旺季。

業績數字

2. 最新蘋果12月底季績表現的確差：整體收入美元（下同）1172億，同比跌5.5%，係2018年12月底季度後首次喺銷售旺季倒退。
3. 主因係：1）市場需求倒退、2）強美元、3）上年11、12月鄭州廠疫情停工、停產，嚴重影響iPhone 14生產。
4. 硬件產品收入964億，同比跌7.7%。除咗iPad升 30% 外，所有產品都下跌。iPad 升只係上年同期生產供應問題做得差，所以係上年弱，唔係今年勁。
5. 產品直接成本跌5.5%，低過收入跌幅，所以毛利率同比由 38.4% 下跌到 37.0%。
6. 服務收入208億，增長只得個位數6%，不過係歷史新高，因為IOS用戶人數突破歷史高嘅20億，同埋9.4億付費用戶，同比升1.5億，19%。
7. 但近5年12月季度嘅增長，除咗2019得 16% 外，其餘都有好接近20%或以上，所以今次服務增長係放緩咗好多。
8. 即係20億用戶base係好大，但點樣轉化更多服務收入，就只能拭目以待。除咗之前推出咗嘅buy now pay later外，暫時無乜特別新攪作。
9. 服務直接成本上升12.3%，高過收入升幅，所以導致以服務毛利率由72.4%下跌到70.8%。
10. 結果經營利潤得360億，同比下跌13%，收入頂唔住，所以底數都明顯倒退。

撇除強美元因素

11. 總收入下跌5.5%，其實有8%，係因為強美元影響。撇除強美元因素，佢係有 2.5% 增長，而且係所有主要市場都有上升。
12. 服務收入嘅6%增長，亦已經扣咗7%嘅強美元影響，即係撇除強美元因素，服務收入有13%雙位數增長。
13. 而呢一季，雲服務、Apple Pay、Apple Music嘅服務收入都係歷史新高、App Store、Apple Care 亦係季度新高。
14. 但比起以前，無得辯駁增長的確弱咗好多，係見頂嘅感覺。除非美元突然變弱好多（雖然加息放緩，但仲加緊），或者有新服務推出，呢一刻睇唔到。
15. 上年年尾鄭州廠疫情停工，Tim 話嚴種影響產、銷量。咁分析員問會唔會令2023年1-3月嘅收入額外受惠？因為喺12月底買唔到iPhone 14嘅客戶，會唔會 deferred 佢地嘅消費去到今年1-3月？
16. Tim Cook無直接答有無呢個影響，只係話呢個影響已經包含喺2023年1-3月嘅預測，但佢地已經無再做收入預測好耐，不過都有做方向性指引，下面結論講。
17. 而我覺得點都會對2023年1-3月有額外銷售增長（想買iPhone14嘅人正常唔會買平價版，因為等多一兩個月，點都好過買平機咁就要用成年）。
18. 但同時，Tim可能又見到2023年1-3月嘅其他不利因素，所以都唔想highlight 呢一樣唔係好重大嘅正面因素，所以預計整體下次嘅2023年1-3月業績都係弱。

整體智能手機市場狀況

19. 成個市場，2022年Q4出貨量跌18%，連續第4個季度下跌，放緩未止，而2022年全年出貨量，總共約12億部，亦都係近9年新低。
20. 無可爭辯智能手機市場的確好弱，無一間廠可以避得開。頭5大供應商2022年Q4出貨量：Samsung跌17%、小米跌27%、Oppo同vivo都跌16%，而5大以外嘅就跌21%。
21. 至於蘋果就跌11%，即係蘋果喺弱市之中抗跌力係最強。同埋從數字中睇得出佢仲係加緊價。因為唔計匯率，佢銷售額係升2.5%，但個出貨量係跌緊11%，所以平均售價仲加緊。

蠶食緊新興市場份額

22. 另一樣睇到嘅係，Android世界手機市場佔有率係俾蘋果明顯蠶食緊。市場整體下跌緊，但蘋果下跌幅度少過市場7%，而其他所有下跌都接近或者高過市場好多。
23. 尤其小米跌成27%，性能高手機賣得貴有人買、要減價都唔難。但小米本身主要賣低端，想維持銷量，就要keep住低價，或者減價（可能係唯一賣點）。
24. 但人地蘋果一出平價版iPhone，就已經輕易動搖咗一部份小米用戶，所以當蘋果認真想打你小米市場時，你小米基本係無乜護城河可言。
25. 所以Tim Cook喺分析會中，都提到新興市場收入有好幾個地方都創歷史新高：加拿大、印尼、墨西哥、，西班牙、土耳其、越南，而巴西同印度就創季度新高。
26. 即係小米食個餅細咗已經慘，仲要細咗之後市佔又細咗，慘情。

結論

27. Tim講到明佢地有好多生產地區，將來會不斷優化生產區域多元化，即係一定會減少依賴中國嘅生產。因為瀨過嘢，仲唔知驚咩。唔知呢個shifting，對國內上游供應商嘅影響有幾大？長遠蘋果一係要你喺境外設廠，一係就買少啲你生產嘅部件。
28. 嚟緊1-3月季度表現，蘋果只可以方向性講同比表現Pattern 會同剛過去12月底季度差不多。即係總收入倒退、服務微升。疫情、匯率嘅困擾，就話睇唔到會再變差，當然亦都係暗示無變好啦。
29. 蘋果呢一刻嘅發展方向，就真係靠點樣用9.4億付費用戶、20億嘅IOS用戶去開發更多不同種類嘅服務收入，仲有就係積極蠶食對手喺新興市場嘅份額。但都係一啲長遠少少嘅增長動力，所以，中、短期股價真係缺乏支持因素。

聲明：以上內容純屬個人意見及分享，並不構成投資、買賣建議或推薦
Credit: CFO講年報