美團(3690)業績、美股、加息、美國債務上限

啱啱出咗美團業績，表面上睇真係唔錯，冇乜睇到話俾抖音搶生意，新業務虧損率跌至32%，比上一季輕微減少6%。
經營利潤，36億，就算撇除其他收益13億，都有好大嘅利潤空間，原因係佢毛利率有30%以上，同比上年同期20%高咗好多。
而且整體再一次轉虧為盈，其實真係唔錯，不過無奈今日大市太弱雞拖後腿。

關於美團(3690)

1. 聽日收市後出Q1業績，睇過往幾季業務走勢，同比收入增長20%問題不大。關鍵係外賣業務有冇數據睇到明顯俾抖音蠶食？暫時無跡象睇到，就算要有唔會一季、半季就出嚟，我覺得無咁易，快手踩入電商市場都要做咗好多季先見到有啲成效。
2. 另一個關鍵係新業務保持增長動力之餘，經營虧損率會唔會再縮細啲？上季係38%，已經係大進步，唔知聽日可唔可以減低啲？俾到市場睇佢一直朝住達成盈利方向進發。
3. 佢股價其實喺130-140之間盤咗3個月，短期應該無乜好嘅宏觀因素刺激，個大市又弱，今日成交額1000億都無。市場對佢都係半信半疑，真係要靠佢自己業績生生性性，如果業績保持到以往趨勢，可能會俾到市場信心，令股價有突破。
延伸閱讀：美團(3690)第一季業績前瞻

關於美股

4. 我成日覺得美國銀行危機，係加息效應對美國經濟各種打擊嘅序幕，而家又好似無乜事，但呢個唔代表我錯，只係可能仲未發生。我始終覺得美股會有一個幅度大啲嘅調整，可能係Q3、Q4，可能係就嚟…
5. 因為科技股嘅升幅好似冇太強嘅基本業績支持，而一啲應該要出現嘅隱憂，仲未出現，例如明顯衰退，都令我一直保持戒心。
6. 科技股近期上升，多多少少有啲避險嘅感覺，只有大型成份股升，細價股公司股價無增長，所以蘋果市值仲大過成個羅素2000指數（小型上市公司指數）。
7. 疫情停工停產，損失咗嘅生產力，係唔會減吓息印吓銀紙就可以解決到，生產力、生產日數無咗就無咗，量寛係延遲同痳醉咗個傷害、痛楚，同扭曲咗個市場供需，要還嘅始終要還。

關於加息

8. 前排金價升咗唔少，接近歷史高位，我覺得黃金係避險嘅過度資產，就係市場覺得樣樣資產都有風險，最壞情況未出現，就泊住黃金先。
9. 市場解說係對風險規避，因為擔心美國會深度衰退，同時又預期聯儲局停加息、甚至減息，其實都係講緊同一樣嘢。
10. 但正常經濟無大問題，而通脹又未完全控制到，聯儲局做咩要減息？喺呢個時候減息係好危險，因為通脹頑固，減息只會令通脹上升死灰復燃，而且之前加息對經濟嘅傷害可能未完全浮現，所以一個唔小心就會攪到滯脹。
11. 所以聯儲局唔會無端端減息，除非係發生一啲好大獲嘅嘢，佢先會減息。個原理係通脹係慢性病，脹通高企係慢性病都已經好嚴重，唔去醫就遲早死，所以要落藥（加息）。
12. 但加息落藥又會對身體器官有副作用，如果係細嘅幅作用，聯儲局就唔關心，唔會減息減藥，因為個慢性病都開始變急。
13. 但如果個副作用係急性腎衰竭，會死得快過個慢性病，咁聯儲局就會減息，醫咗個急性腎衰竭。
14. 所以希望減息，係要有急病，有急病而減息，個身體都唔會好，所以就算真係減息，個股市都唔會好，都要經歷痛楚，所以金價高位企穩，但而家又有啲回，市場又樂觀咗啲。
15. 我比較保守，而家基本因素係唔上唔落，美國經濟好似冇預期中嘅明顯衰退，望落就業市場強勁，咁其實係代表通脹有所回落嘅同時，會喺呢個5%左右水平保持頑固狀態。
16. 個邏輯係：解決通脹問題好大機會必須要有一次衰退，去壓低需求面、壓低通脹到2%左右，係聯儲局一直堅持嘅政策，咁而家衰退都未出現，係咪即係未去到最差嘅時候？即係有啲似汰弱留強、去蕪存菁嘅感覺。
17. 息口就算唔再加，維持高位時間越耐個傷害性越會累積，股票市場見到你停加息，反映股票股估值唔會再被further discount ，所以利好。但實質經濟就依然面對住收緊銀根嘅高資金成本經營難題，時間越耐壓力越大，應該未反映晒。

關於美國債務上限

18. 呢個僵局當然係美國兩黨政治上嘅角力問題，美國實際上唔會違約，但係似乎係6月1號死線之前都唔會有一個共識，咁個政府停擺都唔係大問題，但係唔知會唔會係一個缺口引發巿場其他嘅信心危機？商業房地產市場會唔會有咩問題呢？
19. 最後分享下自己年初至今中短線有25%回報，希望繼續保持到去到30%以上。好過啲大盤表現，算係咁，不過說穿了散戶係有散戶嘅優勢，都係我平時有講開覺得好嗰啲
20. 但短線真係轉身要快，所以唔想講太多，因為責任重大，暫時仲未克服呢個心理包袱。
21. 講業績基本面，今日係咁，聽日都會係咁，同埋我係想我做基本面拆解分析，每個人可以基於佢再有自己獨立思考同判斷。
22. 股票市場真係無絕對啱同錯，短線係太多因素x太多解讀方向炒埋一碟，路遙知馬力，長線嚟講，業務經營基本面如果係持續地做好嘅，就會慢慢覆蓋呢啲短線嘅雜音。