提高現金比率的重要性

今年投資環境相當困難，除了恒指外，大部分主要市場都錄得跌幅，美國標普500指數及納指，截至星期二收市，分別跌9%及13%，對於近兩年贏慣的美股投資者來說，絕不好受，而兩大指數跌一成，其實並未反映實際情況，因為不少高估值的股份，如Netflix、Datadog及Nvidia等股，這些都不算是發夢股啦，但紛紛要跌兩、三成，萬一踩中地雷真係輸死人，難怪青冰身邊有資深戰友坦言，今年的倉位目標要調整為：唔好輸錢。

一月要唔輸錢相對較困難，但跑贏大市還是有機會的，重點就是如何控制現金水平，前輩老曹常說：「有懷疑，揸現金」，睇唔通市況，沽貨離場觀望就是最佳的策略，少做少錯其實是難能可貴呀。基金經理受規章所限，即使睇淡後市，總不能持一半現金，而傳統基金亦不能作槓桿操作或做淡，所以最多只能換馬至防守性高的股份，在股災時盡量輸少啲。作為老散就靈活得多，十上十落，今日可以滿倉全攻型，明天亦可以清貨全現金，不過以青冰多年的觀察，老散甚少利用靈活這個優勢，大部分時間都八、九成倉位，沽完Ａ就走去買Ｂ，市旺時就是貨如輪轉，市唔掂就無防守力可言，跟個市一齊仆。

遇上逆境時，青冰常提醒的就是減倉，可以是減少股份數量，亦可以是每隻都沽啲，總之大前提就是將現金比重提高，當現金比重提升，理論上倉位下跌速度會減慢，承受的心理壓力亦會降低，個人清醒啲諗真啲，減低在壓力下做錯決定的機會，不要小看這些行動，當你輸少啲輸慢啲，叫做跑贏大市啦，心情輕鬆啲，萬一個市轉向時，你落決定去追貨就會更果斷。

有些投資者有玩開輪證，在計算自己的倉位時，會低估了倉內的風險，個倉可能有一半係現金，另一半全是輪證，表面上現金比率好似有五成，但只要將輪證的市值乘上槓桿倍數，才是你現時手持的貨值，這條數在贏錢時是不會去計的，因為數錢數到笑呵呵，但當個市逆你而行，無計清楚自己會承受幾大的風險，隨時有滅頂之災。

一句到尾，2022年只過了一個月，盡力打好防守，減少失球，仲有十一個月畀你慢慢追，戰友們，頂住呀！

聲明：以上內容純屬個人意見及分享，並不構成投資、買賣建議或推薦
Credit: 青冰投資