比較中國電動車三傻理想、蔚來、小鵬

特色故事

理想
1. 理想嘅特點係佢嘅取巧，因為佢賣嘅係增程電動汽車，唔係純電動車。
2. 增程即係架電動車只有約幾成嘅驅動力，係來自電池動力。剩返嘅大部份驅動力係以燃油產生電力，供電俾電池，再產生動力俾架車，即係理想嘅電動車能源，大部份都係用緊傳統燃油。

3. 到目前為止，佢只得一款理想One嘅車型。2022年8月，會有第二款增程車型：理想L9交付。
4. 雖然取巧，但係我覺得佢識做生意。要做一架車好難、做一架純電動車更難，但係呢個市場潛力無限，太遲開始做，又錯失先機。
5. 所以理想參與電動車市場，有電池驅動成份，但暫時又唔迫自己要做到最好，用高成本、大量精力去研發高續航力電池，但佢又做到俾人覺得佢係電動車生產商嘅市場定位。
6. 佢有啲似Tesla嘅做法，喺供應鏈緊張之下，佢只係生產一款車型，相對資源分配，一定比其他生產多種車型嘅電動車生產商更有效率。
7. 預計嚟緊2023年，佢就會推出純電動車，佢嘅策略，就係先站穩市佔，再加強產品性能。呢個策略，暫時從佢財務數據嚟睇，算係幾成功。

蔚來
8. 蔚來嘅特點，係佢核心做車業務部份都唔係完全掌握喺自己手。
9. 生產汽車，佢係同一間喺安徽嘅汽車生產商一齊成立一間合營公司，透過合營公司去造車。而蔚來只係持股合營公司50%股權，唔係絕對控股。
10. 另外，因為蔚來電動車嘅電池係可以拆換，所以買蔚來嘅電動車，消費者係可以選擇租或買電動車裏面嘅電池。租電池可以大大減低消費者買車嘅初始成本，增加銷量同吸引力。
11. 但蔚來租電池呢部份業務，係外判咗俾一間佢只持股19.8%嘅電池公司。
12. 每架蔚來電動車賣出俾客戶嘅同時，蔚來就會同步將電池賣俾呢間電池公司，再由呢間電池公司租電池俾蔚來嘅客戶。
13. 呢間電池公司變相就係為銷售電池部份提供過渡融資嘅功能。
14. 上面兩個安排，都令我覺得佢核心業務部份，並唔係完全由自己主導及控制。
15. 如果呢啲合作伙伴，本身業務有任何問題，或者同蔚來喺營運理諗上有重大偏差，（其實當個生意越做越大嘅時候，大家就會睇住自己嘅重要性，開始有好多動作同意見），就好容易令到蔚來無論喺生產汽車或者銷售汽車安排上，都會有好大嘅影響，呢個係一個潛在風險。

小鵬
16. 至於小鵬汽車，坦白講冇乜深刻印象，淨係知創始人何小鵬，係一個電腦程式員，以前係阿里爸爸度做，所以佢好着重小鵬汽車嘅軟件。
17. 而小鵬汽車喺三傻裏面係賣得最平。但係佢又好似冇乜嗰啲增程汽車嘅取巧嘢，又冇乜蔚來嗰啲玩租電池、換電池嘅安排。
18. 市場會覺得佢好多嘢抄Tesla，而且都有挖角Tesla員工，同埋真係俾Tesla告佢抄襲。
19. 佢銷售方式方面，同理想、蔚來嘅分別，係佢唔係玩直銷，而係玩全渠道銷售模式，即係全方位賣車，自己賣同埋透過中間人賣都有。
20. 故事就講完啦。不過作為一名執業會計師，我有一個職業病，就係唔係太鍾意淨係聽故事。
21. 因為故事精唔精彩，係視乎講故事嘅人嘅能力高唔高，未必代表同間公司真係有實際競爭優勢。呢個係我地聽上市公司故事時候，要時刻謹記嘅嘢。
22. 所以，點解我哋先要睇財務數據、經營指標。就算你唔係好熟汽車版塊或者其他行業板塊嘅業務，但係你睇財務數據，都可以睇得出嗰間公司嘅表現好壞。
23. 因為財務數據係所有企業嘅一種共通語言，佢用最客觀嘅數字趨勢去話俾你聽，一間公司嘅實質經營能力係如何，故事有無水份。正所謂有圖有真相，有數就有方向。

業績比較

24. 我地可以以2022年第一季業績比較做切入點，睇完，你會真係識分佢地嘅競爭優勢、劣勢。
25. 銷售收入比較，蔚來、理想都賣到人民幣（同下）92、93億，拋小鵬一條街，因係小鵬只賣到69億。
26. 平均車價，小鵬約20萬一架、蔚來約36萬一架、理想約30萬一架。
27. 點解小鵬賣得咁平？點解蔚來可以賣得咁貴？兩者相差16萬喎！
28. 我都真係唔肯定，我覺得應該關產品定位事，蔚來定位豪華啲，小鵬定位親人民啲？

29. 或者可能係因為電池：蔚來電池係賣俾電池公司嘅，消費者唔使俾電池嗰part嘅錢，只係租。
30. 帳面上賣車、賣電池都係收入，但係電池部份，並唔係反中映緊市場嘅定價，而係有電池公司嘅融資成份，個情況就係好似你買樓有mortgage，所以樓價會大升一樣。咁，其實理想、小鵬嘅車價先真正純反映市場俾個電動車嘅價值，蔚來唔係純車價。
31. 你可以講小鵬嘅銷售收入同另外嗰兩間差一截，係因為佢嘅車價賣得最平，所以我哋應該睇埋佢嘅交付量。
32. 冇錯，見微知著，其實小鵬喺第一季嘅交付量係最高，有34,561架。第二位嘅係31,716架嘅理想，最少嘅係蔚來，得25,768架既。

33. 交付量，小鵬係最勁、銷售收入理想、蔚來都差唔多。
34. 但上面講咗，理想係將架車賣俾消費者，蔚來係將架車賣俾消費者嘅同時，電池賣俾電池公司。所以銷售收入，其實理想應該勁啲。
35. 再實際啲，無論賣幾多錢，定係賣幾多架，最緊要係利潤要最高。所以下一步，我地要睇吓佢哋嘅毛利率。
36. 毛利率，小鵬近呢幾季大概都係11%至12%，蔚來最近一季14%， 2021年可以做到17%至19%，即係明顯退步咗。理想今季22.6%，上一季17%，即係明顯進步咗。
37. 小鵬一季69億收入，但11%毛利率， 理想、蔚來一季90幾億收入，但理想有22%毛利率，蔚來得14%。

38. 即係小鵬賣得平、賣得多、但賺得少；理想賣得唔少、賣得唔平，但賺得最多，而且毛利率升緊；蔚來，賣得最少、賣得貴定平都真係唔知，但毛利率跌緊。
39. 經營虧損率：小鵬係-27.4%；蔚來係-24.7%；理想係-4.4%
40. 唔使多講啦，又係理想完勝。雖然大家都仲係蝕緊錢，但係你會見到邊個會最接近產生利潤，就係理想。其實理想上一季都接近break-even。
41. 除咗因為佢嘅高毛利率，可以俾佢有更多空間去扣一啲經營費用之外，最緊要就係佢經營費用又係控制得相對係最好。
42. 直接睇佢地各自市場營銷及行政管理費，就會知個分野：小鵬係16億，蔚來係20億，理想係12億。理想洗錢洗得最少。
43. 如將呢個營運費用除以銷售收入，得出嘅比率，就更加可以睇到佢地費用嘅效率，即係係唔係洗得其所。小鵬係23%，蔚來係21%，而理想係最低嘅12.9%，因為理想一季有93億收入，但得12億費用。

44. 其實蔚內同理想都用係直銷模式，提升消費者購買體驗，但係唔知點解理想洗嘅錢相對冇咁多，但賣嘅車多好多。
45. 係咪因為蔚來定位豪華電動車，所以會願意俾多啲市場推廣費用呢？定係調返轉蔚來啲車無咁吸引，所以要落多啲推廣成本先至可以賣到車？
46. 所以只要理想保持毛利率平穩，同埋費用增長平穩，再加埋佢推L9新車型，其實，佢第三季有明顯經營盈利嘅機會好大。

喺2022年5月頭出嘅季績，都有披露佢地展望第二季交付量
47. 小鵬當然都係最多，預計有31,000至34,000架，最低係理想，只有21,000至24,000㗎。蔚來都高過佢，介乎23,000至25,000架。
48. 不過，其實當真實四、五月交付數字喺6月頭出哂之後，小鵬距離第二季目標交付量，只係差11,000 架，應該可以符合預期。而理想距離目標交付量只係差5000 㗎，我覺得應該可以高出預期。
49. 至於蔚來，佢四月、五月分別只有5000架同7000 架交付咗。要喺6月再交多11,000 㗎，先至達到目標交付量嘅low end，所以我覺得佢第二季嘅交付量可能會低於預期。
50. 銷售收入展望方面，蔚來預期第二季有91億，但因為佢交付量可能無預期中咁高，所以，銷售收入，最終可能得8字頭，而唔係9字頭。
51. 理想嘅預期第二季收入，令我有少少失望，因為得61億至70億。但以佢四、五月交付量嘅趨勢，可能會有70幾億，好過預期，但一定比佢第一季低好多。

52. 唔知原因係咪因為理想要分散資源喺第三季推L9新車型，反而會影響佢整體第二季嘅銷售收入呢？
53. 佢以前未試過推多於一種車型。呢個正正係佢長遠，要做純電動車、同埋推更多車型嘅時候要面對嘅問題。
54. 我覺得小鵬喺第二季嘅毛利率可能會有驚喜。因為佢第一季賣34,000 㗎，都只係有69億銷售收入，但係第二季預期high end同樣都係賣 34,000架，但就有78億銷售收入，咁毛利率點都會高返少少掛？同一個數量，賣貴咗，成本唔會爭太多掛？

總結

55. 蔚來要解決嘅問題，係佢嘅汽車生產同埋電池都唔係完全控制喺自己手。另外佢嘅市場定價或者佢架車嘅真正市場競爭力，都可能未真正體驗到，因為電池公司嘅融資部份提升咗佢嘅平均單價。
56. 理想以目前嚟講業績表現最好，利潤率最高。因為佢嘅車型簡單同埋取巧，但係長遠，佢始終都會面對純電動車嘅生產同銷售手挑戰，唔知當佢推純電動車或者多車型事，會唔會見真章，令佢費用大增令，盈利倒退呢？
57. 小鵬嘅問題最明顯，就係佢嘅銷售單價平，毛利率低，要做到有經營利潤都仲有一段時間。
58. 至於政府對汽車消費市場嘅扶持政策，當然係近期刺激車股嘅一大助力。除咗對二手車嘅支持政策外，對電動車嘅豁免購置稅，同埋提供購買補貼，最能受惠嘅都係嗰啲能夠賣到更多量嘅車廠。因為你賣到一部，先至會享到多一部嘅優惠。所以最緊要都係邊間車廠可以交付多啲嘅車。

相關文章
內地新能源車補貼2022年減30%

聲明：以上內容純屬個人意見及分享，並不構成投資、買賣建議或推薦
Credit: CFO講年報