Meta 2022Q4 業績:狀況大逆轉?

股價大升可能原因

1. 又係嗰啲市場覺得佢收入超出預期,而且係exceed top estimates;預期2023Q1收入同比有機會上升、結束連續3季同收比下跌嘅趨勢。
2. 同埋,我覺得係最大原因嘅2023年有成400億預算(2022年係279億,增加43%)嚟做shares buyback。
3. 呢吓係最令市場同股價亢奮,但完全唔關經營事,長遠work唔work?
解讀Meta 2022Q4 業績,收入細項

Meta Q4業績情況

4. 收入算係保持到季節性嘅pattern,季與季之間並唔係一直倒退。第4季,同往年一樣做到全年最高嘅收入,有美元(下同)313億,環比升14.7%。
5. 雖然同比2021年Q4下跌,但跌幅叫做只係輕微嘅4.2%,算係有交代。玩唔到App tracking,所以小朱轉玩AI進行Ads Targeting。
6. 我係用家可以講兩句:其實都係要我手動入target audience,而佢所謂AI suggest嘅target audience,我覺得完全無relevance….財經嘢,但就suggest Cosmopolitan、Market Place by Jason….
7. 始終未放棄reality lab (元宇宙業務),但Q4收入同比跌17%、經營虧損上升30%,而且係創新高嘅43億,呢個係所謂個新增長業務嘅最新慘況。
8. 致於Family apps(即係FB、WhatsApp、IG)嘅廣告業務,收入同比跌4.2%,但經營利潤竟然跌32.8%。即係經營費用高咗好多、經營效率差咗好多。
9. 主因係研發開支高昂:2021年四季,研發費佔收入唔會高過22%,但2022年四季,最低都有28%,平均30%以上,即係我一直所講Meta 相對其他big techs 唔係好高科技。
10. 而且今季直接成本佔收入明顯相比以往8季都要多,以往通常係貼近20%上、下,最多22%;但今季,有啲甩開咗,有成26%,當然呢part有解釋係因為佢地Q4對Data Centre嘅某啲資產做咗減值,即係Data Centre有啲server 用途不大?
11. 唔係我主觀話佢無效率,而係佢個老細小朱自己都話2023年要係”Year of efficiency”,通常講出嚟嘅嘢都係講多過做,感覺好似Hello HK…
12. 當然 86000員工喺上年年尾炒咗11000人嘅成本節省效應,預期會喺2023第一季見到,叫幫補吓。
解讀Meta 2022Q4 業績,淨利潤趨勢

關於自由現金流、400億股份回購

13. 本業盈利能力弱,reality lab 持續燒錢,所以純利持續下跌,但資本開支又持續增加,所以自由現金流就不斷減少,Q4得53億淨流入,同比下跌58%。
14. 自由現金流係經營現金流減資本開支,係用嚟派息、回購等回饋股東嘅錢。但大跌,即係回饋股東嘅錢少咗。
15. 因為資本開支保持高速上升,近兩季都90億左右,2021每季平都係大概40億,不斷加大投資,但成效未知。
解讀Meta 2022Q4 業績,自由現金流分析

16. 講到回饋股東,佢業績最juicy當然係400億 shares buyback。咁大金額回購唔知可以持續幾耐?
17. 因為佢而家可用現金水平146億,加埋可變現證券投資261億,就差唔多400億。當然佢唔會咁盡拎埋呢啲家檔底褲做回購。
18. 因為睇佢2021年同2022年嘅做法,當佢加大回購,好似2021年都有445億,咁嗰年嘅資本開支就減到得187億;喺2022年縮番細回購到279億,佢個資本開支就增大到314億。
19. 即係成件事因為佢本身可動用現金水平都唔係好多,當要玩加大回購刺一刺激股價時,就要喺資本開支嗰度扣番啲預算,即係長遠影響發展。
20. 當然我一開始講佢啲支本開支增加咁多都無乜成效,倒不如慳啲錢,做回購仲好。但又咁講,咁Meta呢間公司嘅selling point 係咩呢?
21. 個正常循環係:資本投入、經營增長、利潤增長、現金流增長、回購、派息回饋股東、刺激股價。
22. 而家Meta係:經營差、拖累股價、所以減資本投入嚟回購、刺激股價、長遠拖累經營發展、利潤、拖累股價、再拖累現金流、咁之後就越嚟越難玩巨額回購,股價進一步受制。

頻繁人事變動唔會無嘢

23. 當然唔係講CEO小朱會辭職,Meta否定咗。係講緊近半年嘅高管離職潮。
24. 做咗14年嘅COO 上年6月resign;用戶數最多嘅印度市場,有三個高層喺上年11月resign,做咗8年嘅 VR主管喺上年12月resign。
25. 唔知出咗咩問題,但咁多老臣子都短時間閃人,內部一定有問題。個VR主管離職嗰時講嘅嘢都講到Meta唔知喺度攪乜x。
26. “We have a ridiculous amount of people and resources, but we constantly self-sabotage and squander (自我摧毁、浪廢)effort.
There is no way to sugarcoat this; I think our organization is operating at half the effectiveness which would make me happy. Some(小朱?) may scoff and contend we are doing just fine, but others will laugh and say “Half? Ha! I’m at quarter efficiency”

結論

27. 所以,呢一刻我都係維持Meta嘅業務好難可以再有高增長同爆發。一切源於蘋果手機唔俾 app tracking,佢做唔到精準廣告targeting,以前好易做嘅嘢,而家難好多咗。
28. 咁本業就走下坡,咁小朱又要搵新嘢攪,撞到元宇宙,但宇宙太遠,唔知幾時去到,不過就錢燒咗好多,而家就要cut cost,cut 資本支出啦。
29. 就算廣告業務,小朱轉用AI做targeting,用家角度睇,我覺得暫時成效唔高;而我唔肯定嘅係,會唔會佢Facebook相對YouTube、抖音特性、介面唔同,根本做推廣嘅效果無咁efficient? 如果唔係,Facebook都唔使攪短視頻Reel 啦。
30. 同埋佢燒錢唔係問題,係燒錢之後,Reality Lab新業務未見顯著成效:例如高增長收入之下,就開始走下坡。
31. 咁即係證明佢之前嘅策略係錯嘅,咁即係說明佢嘅管理層,who? 眼光能力有問題?或者叫做見真章。

聲明:以上內容純屬個人意見及分享,並不構成投資、買賣建議或推薦
Credit: CFO講年報