五大唔玩港股嘅原因

1. 全世界嘅散戶都玩美股

十幾年前唔知有咩渠道玩美股，所以先焗住玩港股。
近年證券apps興起，全世界嘅散戶參與美股嘅門檻突然降低，日本、韓國、台灣、澳洲、加拿大嘅散戶都源源不絕湧入美股。

用Google trends比較吓S&P 500同Hang Seng Index嘅搜尋紀錄就一目了然：

再比較吓Bitcoin同Hang Seng Index嘅搜尋紀錄

年輕一代炒美股、炒Crypto嘅趨勢已經形成，而且係不可逆轉。
佢地當然會犯錯、會輸錢，但同時佢地嘅力量都係龐大嘅。

2. 全世界好多機構都主力玩美股

機構就更加唔洗多講，雖然唔同國家嘅機構投資者都會玩港股，但佢地擺喺美股嘅資金同心機一般都多過港股。
多唔多機構玩有咩影響呢？

首先就係scam會更容易被揭發。
金融世界就係多老千、多騙徒，無論美股港股都總會有scam。
但係越多有實力嘅機構投資者參與，發現問題嘅機會就越高。

一出業績全世界分析員即刻研究，全世界投資者喺Twitter同時討論，有咩問題喺股價極速反映。
雖然基金佬有時都會集體一齊中伏，但中伏嘅機會係低過港股。

美股資訊嘅數量同質素同港股無得比。
無論你睇基本面定係技術面，都大把資訊任你睇。
至於港股，唔係最熱門嗰幾隻你想搵人同你傾都難。

多人玩就成交量大，一隻NVDA嘅成交量已經多過港股成個市場嘅成交量。
成交量大，bid-ask spread就窄，每次交易食價食少啲，勝算自然大啲。
同埋有成交先可以執行到唔同策略，例如有啲期權策略可以幫你對沖風險。如果衍生工具根本冇成交，或者個價好差先成交到，就算你有好嘅策略都執行唔到。

簡單嚟講：多人玩先好玩，少人玩就唔好玩，唔好玩就只會更加少人玩。

3. 港股制度僵化

港股一定要一手一手咁買，資金調配唔靈活。例如你想買騰訊(700)，入場費大約3萬港元。
假設你身家係50萬港元，即係騰訊佔你身家嘅比例最少已經係6%。
美股可以一手手咁買，一股NVDA都係400美元(大約3150港元)，一隻股票佔你嘅倉位比例多啲選擇，資金調配靈活啲。

港股依種制度仲會令上市公司產生誘因用「質數供股法」製造碎股，等你攬住一堆碎股放唔到。

2008年渣打91供30、2015年7供2
2009年匯豐12供5
2013年招商銀行10供1.74
2019年盛京銀行10供5.18
2020年國泰11供7
聽到啲數字咁奇怪都知冇好嘢啦

4. 收費昂貴

就算唔講佣金，純粹講政府、監管機構嘅徵費都係港股貴啲。

港股嘅收費最少係交易金額嘅0.001405% (0.002% + 0.13% + 0.00565% + 0.0027% + 0.00015%)。
即係每交易10萬港元，政府最少收140.5港元。

美股只要你唔係買細價股，收費其實低好多。
一股NVDA係400美元，我賣10萬美元嘅NVDA (250股)，收費只係1.58625美元 (250*(0.003 + 0.000145) + 0.000008*100000)

唔知我有冇計錯啦
就算細節計錯，結論都一定係港股收費貴啲，出出入入都要收咁多錢一啲都唔好玩。

5. 國家安全

大家都知道國家安全好重要，而家任何嘢都一定要以國家安全為首位，冇任何妥協嘅空間。

偏偏港股有啲公司嘅業務涉及國家機密，考慮到國家安全，依啲公司嘅資料當然要保密，唔可以公開。
例如中國高精密(591)，就因為核數師畢馬威攞唔到涉及國家機密嘅財務資料，由2012年8月停牌到2023年4月26日先復牌。
又例如香港證監會要求申請上市嘅標準水務交出會計底稿，但係安永華明以國家機密為理由拒絕，最後要由香港法院勒令安永交出文件。

國家安全當然好重要啦，但係涉及國家安全嘅公司走去上市，就會有洩露國家機密嘅風險。
會唔會有美國嘅間諜假扮投資者，去詳細調查中國嘅國企，從而危害國家安全呢？有冇依個可能性先？

如果有嘅話，為咗嚴防間諜，中國係咪要嚴防美國佬假借投資嘅名義竊取中國公司嘅機密呢？
咁美國佬為咗避免自招嫌疑，係咪唔好調查得太深入，避免觸犯法律先？
但係美國佬唔調查又點敢買呢？美國佬唔敢買，所以就托唔起個市囉。