矽谷銀行(SVB)可以避免爆煲？

2023-03-23 港股分析師專題

爆煲觸發點

1. 2023年1月19日，SVB先出咗2022年Q4業績，但兩個月唔夠嘅2023年3月8日，佢又突發出咗季中更新（Mid-Quarter Update)。咁突然，一係發現新大陸，一係就瀨咗嘢。
2. 個Update劈頭宣布1）已經賣咗美元（下同）210億美國國債，係蝕住18億咁賣。本身持有到期，就會拎番票面值嘅錢，唔會蝕。但佢等唔倒到期，要蝕住賣，即係好急用錢。
3. 另一個宣布係將會向市場集資22.5億。賣完美債都唔夠用，仲要籌多22.5億，即係好高調話俾市場聽，佢地好急住要錢。
4. 咁俾著你如果有存款喺呢間銀行，都會好驚，喺未知實情下，當然提走存款穩陣。你提我又提，佢就變擠提，俾政府接管埋。
5. 究竟爆煲前，係唔係有跡可尋？雖然事後孔明，但永遠瀨咗嘢睇番，會深刻好多，下次醒水提自己，了解上市公司基本面同最新營運狀況真係好緊要。

季度業績關鍵訊息

6. SVB 主要存款來自科技公司IPO、風投(VC)、私募(PE)融資所得資金。但2022年Q4業績其實有講：VC\PE融資金額環比跌23%；2022年Q3環比跌37%，呢個意味住SVB嘅主要現金流入來源喺2022年下半年大減。
7. 同一份業績都有披露季度現金流：i)經營活動淨流入+ii)VC及PE融資活動後存入款項流入—iii)客戶提款淨流出，已經由2022年Q1開始連續4季係負數。
8. 即係連續4季客戶提款大過融資存款加經營現金流入。但佢只係由2022年Q3業績，先第一次用bar chart顯示呢個淨流出。不過一睇就會明，存款急速減少，係當時唔知有無人留意。

存款淨流出有幾急？

9. 2022年6月底，客戶存款淨流出係12億，相對一年前2021年6月底，係淨流入439億（因為當時VC\PE融資活動活耀，現金有入無出）。
10. 到2022年9月底存款客戶cash burn out淨流出124億，相對一年前2021年9月底，係淨流入602億。連續兩季都好誇嘅逆轉。

融資存款少咗，提款急升，當時點解決？

11. 2022年6月底（Q2)，SVB原來已經問緊聯邦住房貸款銀行（FHLB）借咗36億短期貸款；
12. 到2022年9月底(Q3)，同樣嘅短期貸款增加到135億，即係一季之間升咗100億。
13. FHLB係1932年由美國國會授權成立，由11間銀行組成，幫美國金融機構提供流動性。即係受監管，但又唔係完全政府組織，詳細運作我都唔識，但佢地嘅同聯儲局係會開會溝通嘅。
14. 呢個短期借款，對於SVB 嚟講以往係借好少嘅，2019-2020得幾百萬至幾億，但2022年全年（主要係2022年Q3-Q4），就有135億。
15. 即係2022年Q3、Q4，佢面對緊存戶急速提款問題，當時就係大幅增加FHLB短期貸款解決。

16. 所以就算年2022年，全年存款淨流出161億，但現金水平只係減少8億，主因就嗰135億FHLB短債頂住。
17. 對投資者、對美國政府，2022年Q3（短期借款急升）係已經有跡可尋，係唔知FHLB有冇通知FED Reserve。

風險因素有提示

18. Changes in the market for public equity offerings, M&A or a slowdown in private equity or venture capital investment levels have affected and may continue to affect the needs of our clients for the investment banking or M&A advisory services and lending products, which could adversely affect our business, results of operations or financial condition. IPO、私募活動減少，已經影響緊我地業務，可能會繼續影響我地投行、併購咨詢、借貸業務。
19. 好多人都覺得呢啲Risk factor係廢嘅，但細心啲睇，2022年報披露嘅字眼係用咗”have affected” past perfect tense，即係呢個風險係已經發生緊。
20. 上一年年報，同樣位置，係用緊“may affect”，你就知管理層有意無意已經同咗你講佢地瀨緊嘢，不過無Mid-Quarter Update咁自爆者。

本身業務問題

21. SVB 本身就係主力做科技企業融資相關業務。2022年全美國有50%科技、生物科學公司VC/PE融資所得資金、44%科技、醫療護理嘅IPO融資所得資金都係存入SVB。
22. 佢地當初揀呢類企業做主要客戶的確好成功，當美聯儲放水，IPO、私募活動多不勝數，佢生意梗係贏成條街。但政府收水，佢啲客又好燒錢，佢無預咁多現金俾人提走，咁就形成今次危機。
23. 即係老道理，個business model業務呢一刻好（因為放水），但可唔可以持續？（endurable competitiveness）?一收水就見真章，咁即係唔長久，唔可以長期承受宏觀環境變化衝擊。
24. 因為佢嘅存款客戶大部份係有故事有憧憬、但好燒錢、短期唔好話利潤，連收入都可能未有嘅生物科技公司。
25. 以前融資活動活耀，A輪集資所得嘅錢燒完，又有B輪、C、D、E無限輪嘅錢cover。但而家加息令到佢地融資活動減少，所以A輪錢用完，就要去銀行(SVB)㩒錢。

管理層風險意識不足、無充份了解自己客戶嘅情況

26. SVB本身都預咗佢啲存戶長期持續都會用錢，所以都只係用42%存款做放貸生意，另外15% 買美國國債，仲有百零億現金，心諗流動性點都夠啦。
27. 於是乎就將相等於約50%嘅存款嘅金額買Mortgage-Backed Securities（MBS），即係以房地產按揭作為底層資產嘅證券。
28. 呢啲MBS係會以長期持有作為投資目標（Held to Maturity），並唔係為應付短期存戶資金需求。
29. 但管理層無意識到，或者無充份了解佢啲存戶要起錢上嚟好似吸血鬼咁，提得好快。2022年Q1-Q4扣埋IPO\VC\PE融資存款，存戶提款淨流出分別係19億、182億、255億、122億，而2023年直到3月8日，兩個月時間就已經有186億。
30. 咁當存戶急速提錢，唔知點解2023年Q1又無再向FHLB借錢，於是就只能賣美債增加流動性頂住。但聯儲局急速加緊息，令債價大跌，賣美債套現無問題，但就要蝕住賣。
31. 呢啲名義上唔係壞帳，係利率波動風險，但實際效果同借咗錢出去收唔番一部份嘅壞帳係無乜分別。
32. 因為國債咪即係借錢俾政府，而政府加息咪即係變相政府走你數，加完息，當你急用錢，唔能夠持有到期，中間變現，有咗虧損，咪又係壞帳。

問題發生嘅真正原因

33. 源頭係加息環境，令以前好興旺嘅科企IPO\VC\PE融資大幅下跌，但科企班大帝慣咗燒錢唔賺錢，於是就急速增加提款。
34. Joe Biden話要罰出事銀行主管，其實佢地係無做假違規，加息收水、債價跌，管理層控制唔到；存戶提錢，佢又唔可以唔俾人提？要怪嘅係佢反應過慢，都加咗成年息，但就無意識到錢會走得咁快。
35. 本身FHLB係同聯儲局、美國政府都會有溝通，SVB 喺Q3、Q4狂問FHLB借錢，咁理論上如果政府要知就實可以知佢出咗流動性問題，或者真係後知後覺啦。而家就話要罰佢地，好明顯你要轉移責任視線。
36. 仲有，嘅然2022年Q3、Q4借得錢俾佢，點解2023年Q1又無借俾佢？我唔熟佢地問FHLB借債要求。剩係知2022年尾135億嘅借款，用咗260億嘅美債做抵押。260億係fair value 唔係par value 喎，咁真係唔可以借多啲？
37. 個效果好唔同架嘛，抵押借錢，唔會有出售虧損，就算利息都係季結時先睇到多咗啲。但蝕錢賣債，觀感上差好多，代表你已經無其他方法解決流動性問題，要蝕錢賣家檔。
38. 如果時光倒流，要管理層認真去諗多次呢啲嘢，個結論可能都係感覺風險不大，因為client cash burn out係發生緊，但亦都睇到FHLB係一個解決方法， 135億短期借款用咗260億嘅美債抵押，佢哋期待緊美聯儲加息見頂，融資活動增加返，咁樣長遠就唔使再借短債。
39. 但佢2023年Q1蝕錢賣咗210億美債，代表佢無再問FHLB借錢或者想借借唔到，呢個其實好關鍵，但無人知點操作。

聲明：以上內容純屬個人意見及分享，並不構成投資、買賣建議或推薦
Credit: CFO講年報

SVB