Tesla股價強勢之因由

1. Tesla每季都要去比較高於/低於市場預期，好辛苦啫。市場預期都係估估下，根本唔會準，冇理由因為個實際結果低過你市場段估數，你就話佢唔得、唔掂，反之亦然。
2. 實在啲，係要睇佢經營能力嘅trend係唔係走緊下坡？咁當然唔係啦，睇業績利潤數字都知啦。
3. 咁喺個行業裏面佢係咪最領先？當然係，詳情可參閱上篇文章：分析Tesla股價低迷的原因
4. 仲有就係整體個市場嘅增長空間係唔係仲有好多？機率上應該係，因為電動車佔比傳統燃油車粗略都係20：80到。除非突然間輕能又好安全好普及，或者傳統燃油車反高潮受政府政策扶持。
5. 但係一切嘅一切，最終都要轉化倒做純利，而且係股東應純利先至真真正正有意義。

業績數字重點

6. Tesla 尋晚出嘅Q4業績，電動車毛利率25.9%，係近5季新低，預期之內，但正面效果顯著。
7. 因為收入USD (下同)243億，唔使講一定係創歷史新高。經營利潤有39億，同比升37%，都係歷史新高；
8. 經營利潤率16%，歷史第3高，說明銷售量增嘅幅度遠遠超過價減嘅幅度。
9. 按年計，2022年全收入815億，歷史新高；電動車毛利率28.2%，其實都係歷史第二高，僅次於2021年嘅29.3%。你話佢怕咩減價？
10. 同埋真係唔好睇一季半季數、更加唔好太認真看待一季、半季市場預期。

11. 2022全年經營利潤137億，歷史新高，利潤率係16.8%，同比升109%；
12. 股東應佔純利歷史新高126億，同比升128%，個利潤率15.4%。
13. 可憐嘅比亞迪喺Tesla減咗價之後，就算用自己嘅毛利率（最新披露數字係2022年中期嘅13.5%左右），都追唔上人地扣哂經營費用嘅經營利潤率16.8%。
14. 更加追唔到扣埋小數股東權益嘅股東應佔純利率15.4%。而同時比亞迪嘅股東應佔純利率係得4.8%左右，好易變負數。
15. 但比亞迪今日PE 有成107倍，Tesla 呢？44倍，風險邊間大啲？

16. Tesla Q4業績有一句：despite margin headwind from underutilisation of new factories，其實係講緊2022年上海停工、停產；柏林、德州新廠未ramp up 哂產能，令到產能使用不足，平均成本仲未榨到最盡，所以全年利潤absolute amount係升，但升少咗。
17. 其實就係好輕描淡寫講緊：Tesla 毛利率仲可以提升，即係仲有空間減價。
18. 所以由2022年下半年開始，到之後嘅好幾年，佢最核心目標都係要產能最大化，咁樣先可以將平均成本壓低到極致，成本減到極致，佢就更加有籌碼減價。
19. 對手跟唔跟？跟就好容易變虧損，唔跟又驚被搶market share。
20. 所以都係嗰句先要產能最大化，唔需要理會交付量，因為就算當季產出嘅車無交付到，但佢係睇到之後幾季嘅訂單係一定交付到，只要當季有利用到個產能，平均成本都會壓低，到下季交付後就會反映喺利潤度。

21. 咁啲人話Q4產出多於交付又有咩好怕呢？呢啲唔係表面睇嘅濟銷，而係追產能，提升利潤空間、減價籌碼。
22. Elon 成日俾人話佢講嘅目標數同實際數有偏差，但又真係唔係佢自身生產問題，佢上年年頭講嘅產能目標其都係差10萬架到。咁你偏偏喺上海停工停產，真係無得攪架喎，正常情況下已經達標好耐啦。
23. 同埋，2022年基數低咗，2023年嘅增長咪會再高啲，你睇2022年Q3、Q4嘅產量，不斷創歷史新高就知2023年會做得好好，除非2023年又有同COVID 19一樣嘅黑天鵝出現。
24. 當然長遠印尼設廠，係作為非北美地區最大供應生產基地嘅一個支援點又好、保險位又好、後備方案都得，係絕對需要。因為中國太多政策不可預期。
25. Elon Musk 話2023年可以生產有200萬架車，其實一啲都唔出奇啦，佢淨係2022年Q4都生產咗44萬架車。

26. 喺現有規模正常生產嘅情況之下，一年基本盤都做到180萬架。都仲未計佢歐洲同埋德州車廠嘅ramp up同埋2023推出嘅cyber truck。
27. 都係嗰句，Tesla 業績不斷創緊新高，前景真係唔使擔心。之前市場話會俾人蠶食市場，好明顯係short sell嘅說法。根本成個市場都仲有好多增長空間，而且而家係Tesla玩擲錢，搶市場喎。

聲明：以上內容純屬個人意見及分享，並不構成投資、買賣建議或推薦