分析Tesla股價低迷的原因

1. 正如我上一篇文對 Tesla 的預測，Tesla 尋日出嘅2022 Q4產、銷量，一季賣40幾萬架純電動車，又再創歷史新高。而嚟緊會出嘅Q4業績，收入同經營利潤都必定會創歷史新高。
2. 除咗你話Elon Musk因為買咗Twitter之後好唔得閒管Tesla，又賣咗啲Tesla 股份籌簱影響股價呢啲短期、非經營因素外，咁Tesla又有咩問題呢？
3. Elon 忙唔係買咗Twitter之後先開始，係不嬲都好很忙。Twitter 對佢嚟講已經係佢其他全部都係玩革命性嘅公司相對最易管嘅一間，況且佢主動地被投票去換Twitter CEO，佢嘅時間係可以leverage嘅。
4. 所以除非佢瓜咗，如果唔係，忙唔係一個基本因素，如果係話賣Tesla 股份籌簱，咁無得講，實會影響股價。
5. 但重點唔係佢覺得Tesla已經見頂，只係佢要短期融資同埋佢都開到口話2025年之前都唔會再賣股。

Tesla有因素變差？

6. 因為佢減價？因為有人話今年電動車市場，好多潛在競爭對手，會蠶食Tesla嘅BEV（純電動車）市場份額？
7. 遠嘅唔講，人地實實在在，連續兩季產、銷量都破哂紀錄，破紀錄幅度仲要係雙位數十幾、20%，唔係0.幾%。
8. 減價係事實，咁係唔係全世界EV車廠都加價，而佢要減價呢？人減價，佢減價，但請問佢嘅毛利潤率有幾高？單單上季減哂價都有27%，前季國內疫情嚴重影響都27%。全世界邊間EV車廠高過佢？係無。
9. 話佢嚟緊今年優勢不再，市場份額會俾競爭對手蠶食，會唔會我都真係唔識。
10. 但呢一刻實實在在發生緊嘅係Tesla產、銷純電動車都係全世界最勁，利潤率都係全世界最勁，係可以觀察到嘅。咁佢啲所謂潛在蠶食嘅競爭對手呢？

11. 中國方面，比亞迪年產90萬架純電動，即係得Tesla 75%水平，但毛利率得10%-12%，經營利潤率只有1-2%。無得再減價，而且海外市場佔比好細。
12. 歐洲方面，Volkswagen純電動車2022年1-9月賣咗37萬價，只係Tesla 一季嘅交付量；經營利潤率最近期嘅2022年Q3 係6%， Tesla Q3 係17%。
13. 美國方面，Ford累積咗兩年生產量，直到 2022年11月，先生產咗15萬架EV。
14. 計劃2023年底先開始，記住，係開始，達到年產率60萬架，即係2024年先造到60萬架，如果一切順利。
15. 2026底先開始200萬架，即係2027年先造到200萬架。經營利潤率2022年Q3 係1.3%。

16. 即係市場而家有人解釋緊Tesla股價低迷嘅原因，係漠視緊一啲實實在在觀察到嘅，Tesla相對其他對手嘅絕對競爭優勢。
17. 但就反而去price-in一啲未發生，而發生嘅機率睇落都唔高嘅假設？得個估嘅潛在蠶食市場份額因素，就攪到大家對佢無哂信心？我覺得應該睇番基本面，唔係話蠶食就蠶食到。
18. 你叫啲競爭對手，一年做到BEV 100萬架之餘，毛利率有25%以，先再講潛在蠶食市場份額啦。
19. 所以除非你覺得EV市場好快無前景，如果唔係，你睇好EV市場嘅潛力，而家全世界造得最多BEV車、利潤率最高嘅係邊個？
20. 如果你話嚟緊美國有衰退，宏觀經濟差，影響需求，咁個負面影響就唔可以only apply落 Tesla 度，更何況佢大把利潤空間去減價，喺大環境差嘅情況之下提升競爭力。

21. 唔好唔記得，Elon Musk 嘅理念唔係做樣嘢出嚟不斷加價，佢係造樣嘢出嚟，不斷減省不必要費用，減省成本從而可以減價，減價唔係原罪。
22. 今年仲有 Semi 會推出，呢個係現有產能以外嘅另一增長動力。

結論

23. 都係一開始嗰句，無人可以預測市場短期走勢，反而問一句，究竟Tesla真正有啲咩fundamentally變差咗呢？又真係好難實在地講到出嚟。Elon Musk 講嘅加息周期，　銀行存款利息提高，令到高估值嘅股票估值降低，其實可能真係一個最大原因。
24. 所以個結論係，短期嘅負面因素都唔關Tesla經營事，而短期、近期Tesla嘅經營表現都係創緊歷史新高。
25. 至於長期嘅競爭格局，無人可以講得好準。但你睇吓而家佢主要競爭對手係去到咩層次，就算你對Tesla 係唔睇好，咁係都好難會睇好佢其他任何一個對手將來會輸贏佢幾條街，攪到佢雞毛鴨血？
26. 產銷量、盈利能力都係拋人幾條街，你話對手開始加產，你話對手賣得平，你好似講到Tesla嘅產能而家就見頂，利潤空間唔講唔知以為好微簿。

補充

1. 喺呢一刻大家都會對Tesla嘅信心有動搖、有恐懼，所以我講一大堆嘢嘅核心係想大家攪清楚：Tesla本質係冇變差、一路進步緊、相對同業依然係最標青。
2. 暫時睇唔到邊一間會威脅到佢，而成個行業嘅前景，好大機會仲有好多增長空間
3. 至於而家買？定幾時買？定係定投分注買，呢啲交易策略係好視乎你個人嘅情況，好難一概而論。
4. 都係嗰句：無人可以預測短期市況，長期表現向上，呢一刻Tesla嘅機率都係最大。
5. 呢一刻無人會可以好convincing 咁講到第2間EV車廠仲有前景過Tesla。
6. 至於喺呢一刻係唔係估值過高，我只可以講市場資金、Tesla利潤都係不斷流動不斷變化，所以冇意思去亦都冇可能去定奪。
7. 如果要貼地啲、吹水咁嘢，梗係睇定啲先唔爭在跌穿埋$100，再睇吓咩環境啦。

聲明：以上內容純屬個人意見及分享，並不構成投資、買賣建議或推薦