台積電(TSM)有絕對持續競爭優勢……

1. 台積電今日中午新鮮出爐Q4業績，台幣計收入環比升2%、同比升43%；
2. 但以美元計算，收入有199.3億美元（下同），因為有匯率因素，所以環比係跌緊1.5%，同比升26.7%，
3. 銷售金額有價格因素，所以究竟下游市場需求情況係點，直接睇出貨量最準確。
4. 今季出貨量，同比上年跌0.6%、環比上季跌6.8%，係近3年最明顯跌幅。
5. 說明講咗幾季嘅下游客戶嘅inventory adjustment 開始反映喺業績之中，不過呢個只係開始。

6. 但同時間，毛利率有62.2%，經營利潤率有52%，都創咗歷史新高，其實係超級勁賺錢，則面證明咗全世界量產代工芯片，得佢做得最先進得嚟又最穩定。
7. 留意番，毛利率同經營利潤率嘅差距係10%左右，呢個係代表咗經營費用佔比銷售額，其實算係勁低。
8. 可能係因為規模大，除咗直接製造芯片成本外，其他嘅經營費用都好穩定。
9. 利潤率創新高當然都同高端5nm芯片銷售佔比總收入上升到33%有關，上季係28%，一年前只得23%。而下一代先進製程3nm、2nm都可能會扮演同一角色，隨着佢哋嘅銷售增加，而提升利潤率，不過係下一個周期啦。
10. 而今季咁鬼高嘅利潤率，原來已經扣埋因為預期（加實際）客戶需求下降而降低產能使用率，從而令平均固定成本上升嘅因素。

11. 即係啲高端芯賣得好貴，足以抵消產能使用不足嘅情況。
12. 不過我相信呢個產能使用率降低而影響利潤嘅因素會嚟緊一、兩季會慢慢增加同顯著。
13. 佢今季無講有冇加價，但平均單價一定係升嘅，因為量跌嘅同時銷售額係雙位上升。
14. 今次嘅業績利潤率係一個高峰位，之後一 兩季都會向下走，要捱同表現得無咁好，問題係有幾冇差？同差幾耐？
15. 管理層喺未開完業績會之下，作出2023 Q1 指引，收入會下跌至165億 至175億，進一步反映緊下游需求疲弱同inventory adjustment 嘅影響，今季只係開始啫。

16. 到時候嘅毛利率預期都會下跌到53.5%至55.5%，而經營利潤率會下跌到41.5%至43.5%
17. 即係經營費用率大概12%倒，以百份比嚟講會升咗， 但absolute amount 其實無乜變都無19-20億左右咁穩定。
18. 嚟緊嘅2023全年資本支出（即係加大全球生產線同產能）預算係320至360億，比上年同一時間嘅預算2022全年資本支出400-440億，少咗80億。
19. 即係2023年無咁心紅，但都會洗好多錢喺增大產能同先進製程度，即係要全力摧谷3nm 同 2nm 嘅量產同商業化進程。
20. 又係一個好哲理性問題，由於芯片業嘅週期性問題，下游客戶對芯片嘅需求預算，一般會多過佢地自己產品嘅實際生產需求。

21. 一來係預得唔準，二來係驚訂唔夠貨，因為主要競爭對手嘅芯片供應商都係嗰一兩個，自己訂唔夠貨，就會驚唔夠貨賣，即係白白送咗市場嘅生意比競爭對手，三來係疫情嘅干擾，令到佢地向上游芯片生產商落訂單落得好鬼狠。
22. 上游生產商又一時之間提升唔到產能（芯片嘅嘢你話做就做咩）所以佢地只好又加價，又要預收訂金，於是收入呢幾年每季都大升，毛利率都節節上升，好自然衝高股價。
23. 但呢個美麗誤會隨住下游客戶，尤其係smartphone市場疲弱，要去存貨做adjustment ，而令市場開始擔心同轉向，股價喺兩三季前已經開始大部份反映咗當時需求轉弱嘅預期，而今季嘅業績就叫做開始真正實現左佢哋嘅預期。
24. 所以呢一刻要思考嘅哲理性嘅問題係，最壞嘅情況係咪已經俾市場消化晒？
25. 而家嘅未知之數就係驚佢要調整幾耐，管理層上季講咗，最快要到2023年上半年底，但今季唔知會唔會更新，不過股神就已經搶先一步行動咗認為時機已到。喺上年第三季已經建倉台積電40億，均價68.5。

26. 可以肯定嘅係佢嘅技術同市場佔有率都係佔有絕對嘅持續競爭優勢（股神所講嘅endurable competitiveness) 。
27. 而佢嘅盈利能力就算唔係歷史高位，毛利率都有50%以上，經營利潤率都有40%，反映緊技術優勢，同時反映左經營費用相當之穩定。
28. 所以市場而家對佢不滿嘅地方，就係出貨量幾時可以消化左下游客戶嘅inventory adjustment ，重新出發再可以持續增長。
29. 兩大決定性因素當然係佢本身嘅先進製程嘅量產時間表，可唔可以加速，而另外樣嘢就係下游市場需求疲弱，宏觀經濟疲弱呢個情況幾時可以改善？
30. 股神喺上年第三季出手，我諗佢並唔係睇得出究竟幾時可以令佢轉勢，收入或者出貨量再次上升，新先進製程芯片可以幾時市場化。

31. 佢睇到嘅係台積電嘅業務必定會再次增長，因為台積電有絕對持續競爭優勢，而且呢個世界冇咗芯片唔得。
32. 而且股神嘅持貨能力無限高，買咗嘅股份都慣咗係長期持有，所以佢唔介意等，就算係今年唔得，下年唔得，下下年必定會再次迎來高增長。
33. 而另外一個風險就係究竟佢等得切台積電回復增長快啲，定係台海局勢轉差快啲，定係佢嘅生產設施可以分散係全球各地快啲。

聲明：以上內容純屬個人意見及分享，並不構成投資、買賣建議或推薦
Credit: CFO講年報