台積電(TSM)因為分析員會議內容而下跌

1. 管理層上年一直講緊：宏觀經濟差，客戶唔要咁多芯片，要庫存調整去庫存：
「踏入2023年市場存貨需求會大幅減少，並會延續到2023年上半年。」
「所以2023年頭兩季，收入將徘徊喺中至高單位數同比跌幅，但2023年中會見底，下半年將會再次回復增長」

業績重點

2. 台積電Q1收入美元（下同）167億，同比跌6%、環比勁跌17%；出貨量環比、同比都分別跌13%、15%。
3. 收入佔比44%嘅HPC同佔比34%嘅smartphone ，環比分別跌14%同27%。
4. 出貨量大跌，產能使用率低，令平均成本上升。所以毛利率由上季62%跌到56%。
5. 毛利、經營利潤同比、環比同時倒退，係自2019年Q1以嚟第一次。
6. 呢個應驗咗佢地一早同市場講過嘅情況：收入2022年Q4開始環比微跌1.5%、2023年Q1環比大幅下降17%。

關鍵係下半年會唔會依劇本走？

7. 4月20 日分析師會議，管理層預計Q2客戶繼續存貨調整，Q2收入會介乎152億至160億，環比跌6.7%。
8. 重點嚟啦：「宏觀經濟不景氣、市場需求疲弱，下游客戶庫存堆積水平高於我地預計，加上中國市場疫後重啟，需求不似預期咁多。」
9. 原來佢地成日講嘅2023年上半年見底，係計埋大陸重開嘅消化存貨能力。
「所以2023年上半年存貨調整應該要長過我地預期時間，可能要持續到Q3，先可以去到一個效為健康水平。」
10. 之前係講2023年6月見底，而家要延續到Q3，同埋無話無底，而只係話會去到一個健康啲水平喳。
「就算觸底後，需要好緩慢地復原」，即係個底要持續，到底後亦唔會V型反彈。
11. 因此2023全年，成個芯片市場會倒退中個位數，代工市場（即係TSM市場）會跌高個位數，但TSM本身會跌低個位數。

正面消息

12. TSM將會喺2023年全世界第一個量產3納米芯片。管理層好有信心到2023年Q3，3納米芯片就會有明顯收入貢獻。
13. 佢地話3納米芯片客戶需求遠超佢地生產能力，因為HPC 、AI都要好多又勁又細芯片。
14. 睇唔睇到係兩極化？先進制程好好景，但傳統制程就好差，令整體收入下跌。市場對技術要求不斷提高並嫌棄舊制程。
15. 管理層又預計2025年會量產2納米芯片。3納米都未量產已經要計劃2納米，競爭好大，你唔快Samsung 就趕上嚟架啦。

資本開支嘅啟示

16. 2023年Q1TSM洗咗99億資本開支，而2023年全年，會有320億-360億總資本本開支。當然係為3納米、2納米芯片產能及海外設廠。
17. 美國Arizona 設4納米廠、日本會造特別制程廠、歐州專注汽車芯片、南京就造28納米（中國芯片業真係差好遠）。
18. 有分析師問：幾時可以會到資本支出高峰？即係幾時唔使再洗咁多錢追新制程？管理層話未來5年資本支出都會增加，唔知幾時係peak。
19. 計計數：佢2022全年純利341億，而2023年資本支出預計320億-360億。即係2022年賺嘅錢，都要用哂喺2023年先進制程嘅建設度。
20. 正如芒格所講，TSM business Model係要不斷拎利潤去投入資本支出，因為業務增長只能依靠技術提升，資本投入都要跟住不斷提升。
21. 當然無嘢係絕對，佢利潤率高、市佔高，就係因為可以做到不斷技術提升。
22. 只係喺芒格心目中最勁嘅生意係資本支出用到一定程度，就唔洗咁辛苦，繼續年年洗大錢，都會生生不息賺利潤嘅。

關於AI、ChatGPT 憧憬

23. 未必一定要買或者唔買 TSM 股票，但了解佢多啲，對成個芯片業中、下游情況會知多啲。
24. 分析員問ChatGPT、AI、 Data Centre 相關收入預測。管理層答睇到正面發展，但未可以去一個量化階段。
25. 上游供應商未有具體數據去預計佢地個收入。從中、下游客戶角度睇，即係ChatGPT 嘅成本架構都未定，咁下游嘅google msft又點會好似市場講，已經確定收成（收入、甚至利潤）呢？

結論

26. 所以台積電要抄底，而家未係時候，因為去庫存會持續一段時間。呢個問題不大，都係週期性復蘇時間快啲慢啲，時間耐咗，佢收入一定會升番。
27. 但管理層認為嘅好事：強調下一代制程今年量產、下下一代2025年量產，又豪擲上年利潤，投落今年擴產成本。
28. 但又5年內都預見唔到個資本支出Peak位，種種跡象令我覺得佢地做得好辛苦。
29. 相比可樂，佢唔需要不斷洗大錢研究可樂點樣可以好飲啲；麥當勞新產品嚟嚟去去都係得嗰幾樣材料砌埋，亦都唔係大支出。
30. 冇絕對，睇落辛苦啲同埋風險高啲，加上台海風險，係唔係長遠投資好選擇？今次睇完佢財報、管理層分析就令我感受更加深刻。