宏觀經濟學原理——美國國債原理

上次加息篇文講過貨幣政策就係調節利率同埋增加或者減少貨幣供應嘅政策。

今日呢篇嘢主要係講個原理，但係實際上嘅操作已經唔使咁麻煩即係話根本就唔需要好似張cap圖嘅債券print 出嚟，但係個原理都係一樣。固定收益投資個[固定]就係個coupon rate。而債券就係固定收益嘅投資。

1. 調節利率只係調整短期利率，以利率嘅傳導性去影響整個市場嘅借貸利率，對壓抑通脹（同時就係收縮經濟）嘅影響嚟得冇咁快冇咁直接。
2. 增加或減少貨幣供應，就直接增加或減少市場上貨幣供應嘅數量。呢個對壓抑通脹（同時就係收縮經濟）嘅影響嚟得更直接更有力度，因為真係收水。
3. 6月1號聯儲局就開始做呢一個動作：
「begin reducing its holdings of Treasury securities and agency debt and agency mortgage-backed securities on June 1」
4. 聯儲局想放水，就係喺市場買入國債或者一啲代理人債券或者係一啲按揭抵押債券，總之都係一啲相對非常穩陣嘅債券。
5. 佢哋喺市場從債券持有人買入債券，代表債券持有人手上面嘅債券減少，但係現金增加，呢個代表成個市場貨幣供應增加，係一個擴張性貨幣政策，會助長通脹。
6. 調返轉聯儲局喺6月1號開始減少持有呢啲債券，即係代表佢哋要喺市場賣出債券，比有興趣嘅投資者，收返啲現金，即係代表個市場貨幣供應會減少，呢個係一個收縮性嘅貨幣政策，會壓抑通脹。
7. 呢個亦都就係縮表，收縮聯儲局嘅資產負債表。因為本身佢地喺之前放水嘅時候買入咗好多債券，呢啲債券其實係一種投資產品，係可以喺市場交易，所以係聯儲局嘅資產。所以當佢地開始減持債券，即係向市場賣出債券時，資產負債表規模就會縮細，因為佢地減少持有投資產品，即係縮表。

債券原理，核心都係供求關係：
1. 債息（yield），同埋債券交易價格（transaction price），係由市場供求變化而決定嘅。
2. 美國係行自由市場經濟，而債券，包括美國國債係可以喺美國自由交易嘅。
3. 債息同債價係有反向關係。即係債價升（因為市場供求關係變動），債息跌； 債價跌（因為市場供求關係變動），債息升。

講點解係反向關係前，先要了解以下關於債券嘅基本知識：
4. 債券其實就係一張借據。
5. 而美國國債就係美國政府發行嘅一張借據，美國政府問你借錢。
6. 借據（債券）上面有幾樣重要資料：票面值(face value)、票面利率（coupon rate)、到期日（maturity date)、票面利率付款期（interests payment date)。
7. 票面值(face value)嘅銀碼係會印喺個債券上面，代表當個債券到期嘅時候美國政府需要按債券上面嘅票面值還錢比當時（maturity date）持有債券嘅人。「當時持有」係因為債券可自由買賣，所以當期時債券賣咗俾邊個，嗰個持有人就係美國政府喺到期時要俾錢嘅人。
8. 票面利率(coupon rate)係一個percentage，印喺個債券上面，代表美國政府需要喺嗰張債券寫明嘅特定時間段，例如每半年，按照票面直x票面利率嘅結果金額俾錢（付利息）比當時持有債券嘅人。coupon rate點解叫coupon? 就係好似平時啲coupon 可以喺某個時段拎去換嘢，而美國國債嘅coupon 就係拎去換錢(利息)。
9. 票面值同票面利率，喺同一張已發行嘅債券上面，係永遠唔會改變，因為係寫咗上去。

咁我哋成日聽嘅債息同埋債價變動又係啲乜嘢呢？
10. 要記住同一張債券，會有變動嘅係債券交易價格(transaction price)並唔係債券嘅票面值(face value)。兩者係唔同嘅嘢。
11. 要記住同一張債券，會有變動嘅係收益率(yield)，並唔係債券票面利率（coupon rate）。兩者係唔同嘅嘢。一般市場都會將收益率叫做債息。
12. 所以成日聽人講債息升，債息跌，係講緊個yield。

點解票面值唔等於債券交易價格？
13. 重複多一次，債券票面值只係美國政府將會喺債券到期日支付比當時債券持有人嘅金額。係寫咗喺張債券度，係唔會變嘅。
14. 劈頭第一點講咗，債券嘅交易價格（transaction price）變動係因為市場供求變化而形成嘅。
15. 所以債券交易價格(transaction price)可以等同債券票面值，亦都可以高於或者低於票面值，因為市場供求變化而決定。
16. 例子：你持有一張票面值$10000兩年後到期嘅美國國債，如果你一直持有直至佢到期，美國政府到期嘅時候會比一萬蚊你贖回張債券。
17. 如果喺到期日之前，你急需用錢，你嘅方法就係喺債券市場賣出呢一張債券。
18. 因為你急需用錢，而市場可能有多於一張呢啲一萬蚊票面值嘅債券，但想買一萬蚊債券嘅人得一個。
19. 你想快過其他人賣出嘅方法就係減少少價，例如$9500賣出。
20. 結果你張債券以$9500呢個價比其他人更快賣出，$9500就係個交易價格，票面值依然係$10000，唔會變。
21. 呢度就體現咗「供」：就係你持有嘅嗰張債券同埋市場其他人持有嘅債券；「求」就係個市場得一個人想買嗰張債券。而$9500就係個交易價格，因為市場嘅「供」、「求」而決定。

點解票面利率(coupon rate)唔等於收益率（yield）？
22. 債券嘅票面利率係唔會變，因為已經寫咗，但係收益率會變，係你持有債券嘅真正回報率，因為市場對債券供求變化而變。
23. 用返上面嗰張一萬蚊票面值嘅債券，如果佢嘅票面利率係10%，咁即係喺利息付款日，債券持有人會由美國政付收到$10000x10%=$1000。呢個就係債券利息，同一張債券，呢個銀碼係唔會變嘅。
24. 收益率（yield）最簡單最簡單嘅計算方法係將「債券利息÷交易價格」（當然實際無咁簡單，但原理都係咁）
25. 如果當你以$9500賣咗張債券俾下手，個下手嘅收益率就會高過10%。因為佢嘅投資成本唔係$10,000，而係$9500，用返上面「債券利息÷交易價格」嘅公式，$100÷$9500=10.52%，呢個就係收益率(yield)。
26. 當然如果係到期收益率（Yield to Maturity）就要計埋下手成本價係$9500買，到期（maturity）會收到本金$10000，$10000-$9500=$500 呢個多出部份當然都係收益（yield），不過呢度唔講得太深入。總次yield 就係收益（收息+票面值同購買成本之間嘅差）部份除以買債券嘅成本（交易價格）。
27. 少少總結：同一張債券票面值同票面利率係唔會變，債券交易價格係由市場供求所決定；計收益率時條公式嘅份母就係債券交易價格，所以收益率（債息）都係由市場供求決定。
如果消化左上半場債券的基本概念，就可以繼續向吓睇practical 嘢。

聯儲局Fed Fund Rate 既傳導性
28. 你借錢俾人，因為提供別人流動性，所以要收利息作為回報。而如果筆錢借得越耐，或者債仔信譽越低，你會要求嘅利息越高。
29. 因為借得越耐或者債仔信譽越低，代表風險越高，風險越高，票面利率，都要高啲，如果唔係，我唔使借俾你，我借俾個安全啲嘅人啦。
30. 但係如果借錢俾美國政府，就會當係無風險嘅借款。所以美國國債嘅利率會被稱為無風險利率(risk-free rate)。
31. 呢個無風險利率會俾市場視為所有其他所有有風險利率嘅benchmark，即係mortgage、信用卡貸款、企業債券、私人貸款等等嘅利息charge一定係高過呢個risk-free rate，因為如果有風險貸款利率都低過無風險貸款利率，咁都係嗰句，我直接借錢俾美國政府啦，又無風險，又高啲息。
32. 咁當聯儲局加息，代表美國政府愿意俾多啲息俾借錢俾佢嘅人。即係無風險利率升咗。咁無風險利率升咗，自然成個市場嘅有風險貸款利率都一定會升，呢啲就係叫做聯儲局嘅利率係有傳導性。
33. 所以聯儲局加息，因為佢係無風險，所以會傳導俾市場，令市場所有唔同形式嘅貸款都會增加利率要求。但聯儲局加息只係短期利率，唔夠徹底，所以下一步，即係聽日，就要縮表。
34. 但當聯儲局開始賣債，即係代表市場嘅債券供應增加。供應增加，咁債價就跌（貨源多咗），債價跌，債息（yield）就會升 ，上面point 25，債價因為供應增加而下跌，yield就會升。
35. 呢個動作就係直接收水，從而導致yield 升，而債嘅yield（回報）升，代表同一筆錢，相對其他投資產品，例如股票，相對地，債嘅投資吸引力大咗，所以會有資金減持股票去買債，股價會跌，當然假設其所有嘢係不變嘅情況（Ceteris Paribus）。從企業營運角度，成個市場嘅貨幣供應減少，企業借貸成本自然上升，咁企業盈利會有負面影響，所以股價都係會有向下壓力。

另外一個層面去睇債息上升

36. 美國國債有一手市場、同埋二手市場。一手市場就係美國政府首次發行嘅國債，我叫佢新債。二手市場就係一啲美國政府已經發行咗俾個市場，而嗰啲國債喺二手市場繼續交易緊，我叫佢做舊債。
37. 當美國政府加息前所發行國債係一個票面利率a，咁而佢加息後所發行嘅新國債票面利率b就會高過a。因為佢自己都話加息，自己發新債無理由唔調高。
38. 如果新債同舊債嘅票面值一樣，而美國政府都係按照票面值發行新債、舊債，咁聰明嘅市場就會賣（拋售）舊債，再去買新債。因為新債票面利率高過舊債。
39. 當舊債俾人拋售佢嘅債價就會下跌，價格下跌，收益率（yield）上升，我哋當呢個收益率係收益率c
40. 同一時間，新債會更多人去買，令到債價上升，債價上升，收益率（yield）下跌，我哋當呢個收益率係收益率d
41. 喺理論上，呢個賣舊債同埋買新債嘅動作幾時會去到平衡？就係當收益率c等於收益率d，即係買新舊債嘅yield都無分別嘅時候。
42. 因為聯儲局加息或者減息係會影響短期利率，再由短期利率相傳導去成個經濟、成個市場，但係市場嘅貨幣供應喺短期依然非常之充足，所以對對抗通脹未必會立竿見影。
43. 但係當聯儲局開始賣債，咁代表佢地開始吸市場嘅水，咁貨幣供應就真係開始減少。
44. 貨幣供應開始減少，即係成個市場收水，自然成個市場借錢成本（利息）就會提升，或者係聯儲局開始賣債，令到債價跌、債息升，再由呢啲無風險債務將提升嘅利率傳導去市場其他借貸產品嘅利率。
45. 呢兩個結果都係導致借錢成本提升，有啲人繼續借，有啲人就借少啲，無論點都好，整體借貸活躍度會降低，咁錢借得無咁多，洗都洗得無咁梳爽，咁就唔會再搶貴啲物價，咁就可以壓抑通脹，理論就無咁。
46. 但實際情況，聯儲局要真正對付嘅唔單只係通脹，而係市場對通脹預期會加速通脹，做成惡性循環。
47. 所以最緊要係聯儲局要令市場相信佢地係好堅定地去打擊通脹，咁個市場消除通脹預期，個市場力量就會幫番聯儲局去壓抑通脹。
48. 不過如果你有留意新聞，最近都係講市場開始估聯儲局9月就唔再加息，因為有衰退，又驚股市大跌，呢個咪代表通脹預期係未消除（即係覺得聯儲局對壓抑通脹無料到），咁市場繼續會因為有通脹預期而做之前嗰篇文講嘅行為point 6-9，咁通脹數字就無咁易落番嚟㗎啦。
49. 縮表收水市場預咗，理論上個股市呢一刻係反映咗，所以市場有一股力量係賭緊加息收水去到九月就會停，所以最近股市有啲回穩，但不確定嘅係而家壓抑通脹嘅措施，可唔可以有效控制通脹，對經濟嘅發展又係唔係冇咁大影響，如果對通脹都冇乜用但係經濟發展受到影響咁就係雙重打擊，呢個係而家嘅不確定性。嚟緊6月10日就睇吓個最新通脹數字，睇吓聯儲局控制成點先。

聲明：以上內容純屬個人意見及分享，並不構成投資、買賣建議或推薦
Credit: CFO講年報