核數師:富臨集團(1443)有持續經營有問題

1. 富臨今個財政年度收入係14億,增加2.7億,而虧損係4900萬,減少咗7000萬,經營上叫做有改善。
2. 不過淨流動負債(即係流動資產減流動負債,得出嚟係負數)就有4億,比上年多咗9000萬,即係被人追數嘅壓力比上年仲大。

3. 所以,核數師繼上年嘅業績對佢嘅持續經營有重大concern後,今年都再一次提醒市場,佢嘅持續經營有重大不確地性。
4. 不過細心啲睇,其實核數師對佢呢兩年嘅持續經營能力嘅不確定性字眼睇係好唔同。
5. 下面呢個係上年嘅字眼:

6. 而呢個係今年嘅字眼:

7. 兩年嚟,條淨流動負債數大咗,但係啲字眼反而係溫和咗,究竟點解?
8. 緊係啦,佢上年8月換咗核數師呀麻,由四大嘅安永換咗second tier嘅中滙。
9. 其實呢啲情況,浄流動負債係大咗,核數師換咗,新嘅核數師又俾咗一個公平真實嘅審計意見,其實有啲奇葩。假設如果核數師冇換嘅話,安永今年比嘅會係咩意見?咪都係會俾唔到意見囉。

簡單講持續經營嘅概念

10. 持續經營能力,喺核數師角度係講緊間公司喺年結日計起1年內都唔會執笠破產,即係起碼你頂到1年先啦。
11. 咁1年之後呢?之後嘅嘢,鬼知咩?收你幾百萬audit fee唔通要保證包你一世唔執咩,所以1年之後核數師係唔會攬屎上身去講任何嘢嘅。
12. 咁我哋作為核數師點知間公司有機會1年內執笠破產?最基本最簡單就係睇吓間公司1年內會唔會資不抵債。
13. 要1年內資不抵債有機會發生(記住,實際做生意唔一定會發生,因為你可以拖數,人地又未必會即刻告你),就係流動資產少過流動負債。 即係有淨流動負債,好似富臨呢三年嘅情況。
14. 無錯,唔係兩年啦,而係三年啦,但佢又勁喎,仲頂到未執。

15. 另外一個indicator就係睇吓間公司有冇虧損,如果間公司有虧損,又唔夠錢找人啲流動債務,就算你同人傾可唔可以遲啲找數,難度都高好多。
16. 因為你自己都賺唔到錢,人哋點解要信你,要俾多啲時間你去籌期呢?所以間公司係淨流動負債再加有埋虧損,唔能夠持續經營風險就更大。
17. 富臨兩點都仲晒,所以核數師梗係話佢有持續經營問題啦。

兩間核數師安永、中匯取態分別

18. 安永同埋中匯對富臨嘅持續經營問題,用嘅字眼嘅分別,又係睇得出四大行核數師同埋second tier嘅風險取態分別。
19. 兩年之間富臨都係有持續經營問題風險,安永嘅取態係:因為你有持續經營問金題,又有銀行債務違約風險,又有租金違約風險,又有經營虧損等,好多不確定因素。
20. 令到佢地覺得成盤數都唔知點樣出,先令佢地覺得準確同安心。所以佢地直接唔發表意見,完全撇清關係,有咩事唔關佢地事。
21. 呢個係最保障核數師同小股東嘅做法。但係作為上市公司老細會心諗,我俾幾百萬audit fee你,你收咗錢之後同我講你出唔到意見,邏輯上又係完全接受唔到。因為老細唔會諗獨立核數師嘅「獨立」身份。
22. 所以好正常佢地上年8月換咗中匯做核數師,中匯為咗接生意,當然會做一啲小小嘅取巧去迎合上市公司。

23. 佢嘅審計意見就係話數字係「真實而公平反映」嘅,因為佢已經幫間公司擺清楚哂啲數,有幾多虧損、有幾多負債、有幾多資產。同安永唔同,即係佢係出到個審計意見。
24. 只係佢都要提大家,富臨有機會俾人追數,而資不抵債呢個情況。「嗱,我提左你啦,有咩事都係公司董事孭飛,唔關佢事架。」
25. 個客觀效果就係大家都係玩緊免責遊戲,安永唔怕得罪個客,玩完全撇清責任,因為佢地講咗俾唔到意見。
26. 而中匯就係免責咗一半,但係又免責唔晒。因為佢話啲數字係冇問題嘅。
27. 其實講真,你連究竟佢資產可唔可以抵到負債都搞唔清楚,又好難完全話佢啲數字係冇問題喎,所以佢就叫做孭咗啲風險,但啲風險當然唔會大到搞到佢間firm執笠啦。
28. 其實,做核數師,唔係最大嗰幾間,接到嘅客都唔荒好,真係搵食艱難㗎!

點解富臨呢幾年都仲未執?

29. 正常嚟講呢,其實佢係淨流動負債成4億,即係有4億係無資產可以用嚟還錢喎,都好難話係冇持續經營問題。
30. 但又事實證明就算佢前年有淨流動負債1.4億,上年都係有淨流動負債3.1億,但都係死唔去,仲未執。咁佢係點樣捱過去嘅呢?
31. 其實唔複雜,個操作就係拖數,拖住先,博啲債權人唔告佢住。細嗰啲債主,無錢告,所以一味拖就得啦。大嗰啲就真係要多啲溝通。
32. 而其實佢最大嘅兩組債主,其中一個就係銀行借款,上年度一年內要還嘅錢係1.8億。呢個其實都唔難拆,因為佢本身就有一個自置物業、市值1.8億,直接同銀行講,抵壓俾銀行,攪掂
33. 另一個就係佢簽咗死約租約嘅業主,上年度一年內要俾嘅租金,大概有3.2億。而3.2億租金點俾?佢本身有1.5億現金, 而其實佢租金按金,本身都有成約1.3億係預先俾咗業主。所以就算業主唔能夠按時收晒啲租金呢一刻佢都係安心冇乜動機要去告佢。

34.上面提到嘅自置物業同埋按金有大部份都係藏喺非流動資產嘅,所以實際情況係佢有籌碼同呢啲最大嘅債權人去傾,去拖數。

35. 而個重點係,無人想佢執,無人想迫死佢,因為執咗就真係更加還唔到錢。所以,當大債主大概睇到佢有啲揸拿,就愿意俾佢遲啲找數而唔告佢,告佢都要錢,要時間,而且要好耐時間。
36. 咁細嗰啲債仔,即係啲食物供應商、員工人工就更加唔敢追得太緊。所以就又過到上年。
37. 今年條數,一年內要俾嘅租金,大概有2.7億,少過上年,理論上租約減少咗,可能係租嘅地方少咗,而最有可能真係水到啲業主減租。
38. 另外銀行借款有2.4億,仲多過上年嘅1.8億。好明顯係睇住佢棟自置物業做抵壓,同埋可能換咗個核數師,一早應承咗比到個真實公平嘅意見,所以反而銀行放心啲數唔係太流, 肯借多啲錢俾佢口。
39. 所以其實,佢似係都暫時manage 到呢兩類債主,起碼短期內應該唔會反面,要去告佢,令佢清盤。

結局

咁富臨嘅發展或者結局會係點呢?不外乎兩種情況:
40. 第一種,就係佢業務經營上有重大改善,下年開始由虧轉盈,之後慢慢業務一路上去,債務亦都由經營性現金流去找數,付成件事解決晒。不過唔覺得呢個情況嘅發生機會好大;
41. 第二種,債務繼續惡化,呢個應該最大機會。因為其實,佢對上三年嘅淨流動負債係不斷惡化,2020年度係1.4億,安永無出聲,俾一個clean 嘅審計意見。
42. 到2021年度,增加到3.1億,咁人地俾咗一年時間,一次機會你,你無改善不特止,仲要嚟個double,正常都嬲嬲地,咪唔俾意見囉。
43. 到2022年度,再增加到4億。不斷惡化。
44. 經營業務可能真係會改善,但係靠經營現金流,應該有排都還唔哂啲債。所以就要搵新資金。

45. 呢啲咁細隻上市公司,如果要有新資金,一係就係大股東科水、一係搵新投資者買殼。
46. 大股東肯科水都要計啱條數,可能要等到股價再殘啲先,而家市值都有成兩億,仲有水位。即係佢可以由得佢繼續衰落去,佢仲開心,唔好話私有化先,剩係增持都開心,用最低價。所以如果係呢個情況,股價仲可以插下去。
47. 如果賣殼,其實仲複雜,如果連埋富臨本身個業務賣埋,其實應該無乜人有興趣;如果新買家想要放新業務入嚟借殼上市,又要攪好耐,都未必話一定得
48. 因為上市條例規定,轉控股股東後注入新業務、剝離舊業務,要等三年先得。所以小股東如果等佢賣殼,就更加係等運到居多,時間成本都輸哂。
49. 再補充多一點,以佢上年年報嘅資料我發現佢簽嘅所有租約總合同金額,大概有三至四成係問返佢本身控股股東同埋啲關聯人士簽嘅,所以帳面上租金違約好嚴重,但係實際上又係左右手嘅問題,控股股東租酒樓物業比間上市公司,所以其實間嘢執唔執或者頂唔頂得着係好視乎控股股東幫唔幫手或者幾時幫手。

聲明:以上內容純屬個人意見及分享,並不構成投資、買賣建議或推薦
Credit: CFO講年報