盈健醫療(1419)是否復常概念股？

1. 盈健醫療(1419)係六月年結，所以最新財務數據係2022年6月年報，覆蓋期係2021年7月至2022年6月嘅12個月。
2. 要判斷佢係疫情受惠股，定係受累股，其實好簡單。就喺疫情期間佢嘅業績係做得好咗定差咗？
3. 呢段期間佢嘅業務做成點？收入大升71%，其中全科服務升103%，專科就跌17%，牙醫都有升少少。
4. 盈利能力方面，毛利率由上年同期57.5%升到58.8%，好好賺！純利率更加升幅誇張，由上年同期嘅22%，升到今年嘅33.5%，純利3.8億，同比增加160% 。
5. 盈健醫療嘅財報係2021年7月至2022年6月，即係覆蓋左2022年3月第五波疫情高峰期，但佢業績大升，睇落好似係受惠於疫情喎。

再詳細啲睇埋落去佢點解業績大升

6. 一望管理層討論及分析，有80%以上篇幅都係講緊因為疫情期間，大力支持政府做檢測、接種、強檢、社區隔離，所有一切一切疫情相關嘅服務以及支緩政府防疫政策嘅業務。

7. 睇到呢度，數字趨勢配合文字描述，其實都好難再話佢業績好唔關疫情事，好明顯佢係疫情受惠股。
8. 所以一開始講如果佢係受惠疫情，咁第二個問題就係呢啲疫情而引起嘅業務增長，會唔會喺復常之下，不復存在呢？
9. 常識判斷復常後，除咗疫苗接種呢一個業務，疫情相關嘅其他業務都唔會存在。
10. 疫苗接種，可能國內人口需求龐大，但係呢一刻盈健都冇特別因為呢一個所謂嘅潛在增長而宣布增加接種人手。
11. 可能一來本土覆蓋率已經好高，來自香港嘅需求唔會有太高增長；二來國內潛在疫苗需求可能好大，但當國內疫情回穩，過咗一、兩季後，個增長就未必可以維持，最理想可能係維持相當接種量，但就唔會係高增長。
12. 同時，除咗佢自己醫療中心可以繼續提供接種外，佢來自政府免費社區接種中心嘅收入，都唔會再有，因為呢啲中心將會關閉。
13. 咁即係唯一日後可能仲存在嘅疫情相關疫苗接種業務，將來有明顯增長嘅機率都唔係太高。

結論

14. 結論係我哋都唔好咁主觀，可能醫療股都係受惠，咁就睇吓管理層自己講法啦：佢哋話預期佢哋嘅業務因為復常，政府對防疫措施嘅需求減少，而令到佢哋業務有所放緩。

15. 佢哋需要尋求其他新嘅商機去維持業務，我成日都講，管理層寫嘅嘢，講好嘅未必一定好，只可信一半。
16. 如果佢地主動講差嘅嘢，就要望實，因為一定會發生。呢啲係期望管理，佢地已經知道會變差，所以唔想俾人之後追究點解冇及時update股東，尤其是對上一年佢地做得咁好，要為業務變差預早講定。
17. 當然佢地會修飾，唔會一吓子講到好差好差，因為要市場慢慢消化、軟着陸。所以通常實際情況比佢地講嘅會再差啲，咁你自己識揀啦。
18. 所以疫情受惠、受累嘅概念，同樣可以應用喺其他板塊，疫情時，業績因為疫情特別標青，咁復常後就要小心回塘。而盈健係一個好典型嘅示範例子！

聲明：以上內容純屬個人意見及分享，並不構成投資、買賣建議或推薦
Credit: CFO講年報