騰訊大動作後重啟回購

騰訊(700)在1月5日開始回購47萬股，最低429.4元，最高437.6元，涉2.03億元，這是自去年9月30日停手後首次作回購。騰訊於11月10日公佈季績，以往的手法是公佈季績前一個月就會收手，今年係早咗幾日，2018年及2019年的出手，都係買到10月架，以往停手後，在全年業績前都不會再出手，所以今次係有啲特別，金額方面亦有點不同，去年8月開始的回購，除非股價升得太急，高過當日的回購上限，否則都會每日買一億元左右，但今次一出手就是兩億，未知會否成為未來幾天的新常態，但作為一隻每日過百億元成交的股份，兩億就係小數目，頂唔到個價嘅。

值得留意的是，自去年11月季績後，先後公佈兩大消息，派發手持的京東(9618)及前晚減持SEA，兩大動作後才重啟回購，可能有兩個意義。由現在到3月23日的全年業績前，應再無大動作，因為騰訊在這方面不嬲都跟足規矩有餘，有股價敏感消息就唔會多手做嘢；另外，當減持手持公司成為常態後，回購都可能成為常態，睇齊美股的大公司，反正在內地投資又會怕反壟斷，去外國買嘢又唔係咁易，不如增加回購，提高股東利益更好。

如果「無大動作」的假設成立，咁美團(3690)、快手(1024)及嗶哩嗶哩(9626)等的股份，應該會少一重沽壓，但都要睇實回購幾時停手，停手可能又會再做嘢。

聲明：以上內容純屬個人意見及分享，並不構成投資、買賣建議或推薦
Credit: 青冰投資