比亞迪2023年Q1業績分析
1. 比亞迪（1211）喺2023年Q1，收入人民幣（下同）1202億，同比升80%；毛利215億，毛利率17.9%，比上年同期升咗5%。
2. Tesla近期持續減價，令毛利率跌破20%到19.3%，感覺兩者盈利能力拉近咗好多。
3. 經營利潤有53億，利潤率4.4%。如果唔計政府補貼7億，經營利潤率就得3.8%左右，即係其他經營費用始終未控制做得好好，但都比上年同期嘅1.6%有明顯進步。
4. 當然仲未及得上Tesla 嘅近期低位嘅11%利潤率，呢個可能點解 Elon Musk 咁老定狂減價。
比亞迪純汽車業務表現
5. Q1賣咗552076架車，同比升89%。收入金額升幅（80%）少於銷量升幅，第一印象係平均車價下跌。比亞迪係有減價壓力，但佢2023年第一季印象中又無話減好多。
6. 所以睇埋其他因素，就係佢非汽車業務。 1211除咗汽車業務外，仲有電池業務、半導體業務同手機零件組裝業務。
7. 電池業務主力都係服務自家電動車，所以佢上年開始已經將電池同汽車業務兩條數合併出。
8. 半導體佔比好細，唔影響整體大數表現，無獨立出分部業務嘅數。剩番嘅手機零件組裝業務，就係比亞迪電子（285）。
9. 由於285獨立上市、有獨立出財報，所以想知比亞迪純汽車業務嘅表現，只要將1211條數（包含汽車加285），減番285條數就會睇得出。
10. 如果將285條數減走，1211汽車業務收入有938億，同比係升104%，即係金額升幅仲高過銷量升幅嘅89%。
11. 所以2023年第一季，比亞迪喺減價壓力下，反而加咗小小價，但銷量都有大幅增長。
12. 如果只睇純汽車毛利率，佢2023年Q1有20.1%，同比上年同期15.7%，又升咗接近5個百份點（同Tesla 嘅汽車毛利率21.1%都好接近）。
盈利能力問題有改善
13. 一直擔心比亞迪的最大問題係利潤率，賣得多車係因為佢啲車夠平，所以唔知佢點樣可以提升利潤。
14. 本身寄望嘅係佢不斷產、銷量創新高，可以有規模效益，降低平均成平，點知佢反而真係加到啲價（或者賣到多啲貴啲嘅車型）。
15. 佢直接成本今季同比上升92%，雖然同比升幅低過收入嘅104%，但平均車價上年同期係13.3萬，今季係13.5萬，即係產銷量規模大增之下都要升1.33%。
16. 反而係2022年第一季佢平均車價賣15.8一架萬，而2023年第一季平均車價賣17萬，升幅8%。呢個先係令佢汽車今季毛利率有20.1%，同比升5個百份點咁多嘅主因。
點解價升銷量都升咁多？
17. 呢個純估計：佢本身車價太平，平均加8%都係17萬，呢個水位佢啲客個price elasticity 唔大，即係唔會屌哂鬼或者換車，即係依然有價格優勢。（Tesla 減咗好多都要47000美元一架，即係成30萬以上人民幣，始終對價格最concern唔介意其他條件嘅客可能都會揀BYD先）。
18. 所以，比亞迪可能仲有一啲空間可以向市場試吓價、出吓貴價車，睇吓去到邊個水位市場會對佢啲車嘅價格有大反應（即係你再貴啲，我就唔使將就再買你啲車，同一價錢可以買其他好啲嘅車）
19. 仲有就係鋰電池最重要原料，鋰嘅價格近半年明顯喺高位回落，可能係供應暢順咗，更大機會嘅係上一、兩年鋰價太高上游供應增產導致。
20. 雖然智利嗰邊將世界兩大鋰公司收歸國有，短期鋰價會有波動，但長遠走勢，隨住上游供應商預見到將來市場對鋰需求持續增加而保持產量，鋰價都應該唔會再暴升。呢個對比亞迪嘅毛利率持續改善一定係好事。
中國新能源汽車市場最新銷售數據嘅啟示
21. 比亞迪2023年新能源汽車喺中國市佔都明顯增加好多。2022年全年平均係33%，到2023年Q1係42%，升咗差唔多一成，真係撐起市場半邊天。
22. 2023年1月，當整個中國新能源汽車銷量慘淡得32萬架，同比跌6%、環比跌48%，係近9個月新低。
23. 但比亞迪喺同一時空之下，同比升59%、環比跌36%，都明顯比市場做得好好多。所以2023年1月市佔由上年同期嘅27%，升到45%。
24. 而到2023年2月，市場銷量43.9萬架，同比報復式升番61%、環比升32%。比亞迪同期，同比升113%、環比升28%，市佔保持到44%。
25. 而到2023年3月，市場增長去番正常啲趨勢，同比升23%、環比升24%。比亞迪同期，同比升97%、環比升6.7%，市佔回落番38%，但都高過2022年全年平均。
26. 呢三個月比較市場同比亞嘅銷售數據，說明兩件事：1.）一月嘅環比大跌好大原因係國內農曆新年假再加清零政策急變躺平，對汽車市場銷售嚴重干擾，大部份車廠都無所適從（包括Tesla嘅上海車廠），但就突顯咗比亞迪相對國內其他車廠有更強更穩定嘅交付能力。
27. 2.）整體市場銷售二月環比急升，三月環比都係有明顯升幅，呢個說明整體中國新能源汽車正常需求並唔係一月時咁差，所以當假期、防疫政策急轉嘅因素消化咗之後，銷情回復正常增長。
28. 所以比亞迪2023年1月市佔急升45%，當市場喺3月回復正常後，比亞迪市佔喺2023年3月，回落番到40%以下（唔係佢差咗，佢同比、環比都升97%同6.7%）。
29. 呢啲數據對中國市場同比亞迪都係好事，亦都可能反映比亞迪喺中國市場有慣性、有種根深蒂固嘅銷售優勢。當然海外市場就暫時都係慘不忍睹。所以可能中國市場新能源汽車睇比亞迪、全球當然仲係Tesla。
2023年前景
30. 另一個值得要注意嘅地方係，或者係我無信心嘅位係：2023年下半年，比亞迪嘅銷量增長仲係唔係咁勁？
31. 2022年1-3月，每個月大概10萬架車銷量，所以當2023年1-3月每個月大概16至20萬架銷量，就會見到明顯升幅。
32. 但2022年嘅下半年，尤其9-12月，個個月都已經20萬架以上（其實7月、8月都有16萬以上），咁佢2023年嘅9-12月仲可唔可以維持80%、90%增長呢？即係話要去到每個月賣35萬、40萬架？我真係唔知。
33. 我覺得今年下半年佢嘅銷量增幅會減慢，可能一個月20零萬部左右，其實都好勁。
34. 但始終都要啲時間，令新能源汽車喺中國市場嘅滲透率突破30%。整體升，佢又升得多過整體，再喺費用度調整吓，之後就無乜嘢可以挑剔佢啦。
