富時指數rebalancing名單

富時指數季檢調整將於9月17日收市後生效，即係話當天會進行rebalancing，附圖是青冰根據富時指數網站公布的結果，再人肉篩選的名單，篩選是將全新加入的股份揀出來，升級或降級的就忽略，主要列出大型、中型及小型股，微型股(Micro Cap)就無包了，因為實在太多，附圖內的全是港股，A股及在美上市的中概股都沒有包括在內，。

成堆英文公司名字，的確係好難睇，青冰當然唔會交這些給戰友啦，純粹只係話你知青冰有做功課而已，中國的大型股會加入恒大物業(6666)及昭衍新藥(6127)；中型股沒有港股加入；小型股就加入心通醫療(2160)、先聲藥業(2096)、中國旭陽(1907)、歐康維視(1477)、匯量科技(1860)、華興資本(1911)、火岩控股(1909)、鼎豐集團(6878)及中手游(0302)。而香港指數中，大型股會加入百濟神州(6160)；中型股沒有港股加入；小型股就加入卜蜂(0043)、加科思(1167)、偉祿(1196)、醫思健康(2138)、Vesync(2148)、德琪醫藥(6996)、東建國際(0329)及華領醫藥(2552)。

恒指、MSCI及富時指數，經青冰多返實驗，富時指數rebalancing時係比較正氣的，個意思係如果對住個名單揀嚟出手，贏面都幾大，就以6月18日那次為例，當時大型股加入華潤萬象生活(1209)、泡泡瑪特(9992)及藍月亮(6993)，中小型股加入世茂服務(0873)、榮昌生物(9995)、合景悠活(3913)、雲頂新耀(1952)、金科服務(9666)、醫渡科技(2158)及藥明巨諾(2126)。這裡十隻股有九隻都會生效日上升，只有雲頂新耀下跌，而十隻裡有五隻更加係生效日及前一天都升。

當然啦，對住一堆名單，即使有錢買得晒，都唔會隻隻參與，青冰記得上次揀咗泡泡瑪特、世茂服務及醫渡科技，效果都不錯，今次即使會出手，應該都是在昭衍新藥、心通醫療、中國旭陽、百濟神州、醫思健康及Vesync之中落墨，亦要睇這幾天的累積升幅如何，近期走勢如果，上面有沒有海量蟹貨。

記住每次玩這些指數rebalancing，都唔會有大茶飯食嘅，以前未有收市競價時段，都偶爾有尾市急升一成嘅情況，但就要金精火眼睇實，臨收市鬥快掟，自從有收市競價後，就無呢支歌仔唱了，不過個好處就係，競價沽出就輕鬆啲，同一時間玩幾隻，都可以4點後慢慢㩒囉。

聲明：以上內容純屬個人意見及分享，並不構成投資、買賣建議或推薦
Credit: 青冰投資