賭股保持公佈賭收後必升

雖然澳門6月賭收稍遜預期，但市場反應不太差，加上下半年首個交易日港股急反彈逾2%，賭股全面高收，換言之這個「公佈賭收後必升」，又再次應驗，金沙中國(1928)連續10個月公佈賭收後上升，銀娛(0027)都有9次，賭股受惠大升市，真係不由得不信邪啊。

6月份的賭收有152億元澳門幣，按年增長5.1倍，不過按月錄得輕微下跌2%，但由於5月有多一個曆日，如以日均賭收計，是由5月的5億元升至6月的5.06億，升得唔多，但都叫解釋了為何6月賭收微跌，只是少一日咁解。我看過幾間大行的報告，當中以花旗指出5月因為有勞動節長假，所以5月理論上勁啲，所以6月日均賭收微升，其實是好好的數字了。

而他們都相當貼地，睇到6月份有張學友在澳門舉行演唱會，相信有助帶來人流，有助賭收，更預期7月份有郭富城及鄭中基的演唱會，對7月份的賭收有憧憬。我覺得這個演唱會因素的確存在，上月身邊也有朋友專誠去看黎明演唱會，雖然辛苦一點，但選擇了即日來回，不過應有部分觀眾會留宿一晚，那自然有機會去賭返兩手。但我都要提返花旗，其實5月份都有國際巨星Blackpink到澳門開了兩場演唱會，所以演唱會因素在最近幾個月都是存在的，不需太過渲染其影響力。

正如我以往的文章指，賭股的值博率，完全在於月尾時有沒有大回吐，5月及6月的賭收，已經沒爆發性的大增長，但在公佈日前幾天，遇上港股大跌市，賭股亦要跟跌，這跌就跌出了值博率，6月尾時銀娛由52.45元跌至月底的49.65元，然後昨天大升4%，回升至最高52元，一來一回只是返回原本那個位，所以我維持之前的結論，賭收應難以單靠內地客而達至每月200億元，除非國際客有明顯回流，才可令股價有突破，否則只能當上落市，月頭出賭收就睇吓早幾日有冇急跌，計清楚才上車。