滙豐2023年中期業績表現亮麗，但數據可能見頂……

1. 業務有增長，成本亦都控制得唔錯，又有季度派息，2023、2024年保證派息比率50%。
2. 而且今次業績再調升2023年全年淨利息收入，由Q1 340億到350億。一切都往好方向發展，所以股價確係值得近期強勢表現。
3. 但睇業績除咗睇過去表現，仲要深入啲睇先會睇得到佢底層狀態，同埋將來趨勢方向。我覺呢一刻可能已經係高位回落嘅開始。

收入升124億主因

4. 原因包括：1）淨利息收入有183億，增加49億、升37%；2）收購SVB矽谷銀行英國業務，因為係去救人哋，所以係bargain purchase買平咗，有一筆一次性收入15億 ；3）取消出售法國業務，所以之前撥備21億，可以回撥當作今期收益；
5. 同埋，4）來自「持作交易用途或按公允值予以管理之金融工具淨收益」增長32億。
6. 法國業務嘅回撥同SVB嘅收益，唔使講都係一次性，但呢個公允價值收益係咩嚟？我地唔會從業績睇到哂係咩，但就可以以理解佢性質去作判斷。
7. 到今日，佢中文版中期報告仲未出，但英文版已經出咗，比業績公告披露更多詳細信息：就住呢個：「持作交易用途或按公允值予以管理之金融工具淨收益淨收益」， 佢嘅英文中期報告，係咁寫：
8. 「There was a favourable movement on non-qualifying hedges in Corporate Centre of $0.3bn due to the non-recurrence of fair value losses in 1H22, and higher income in CMB, reflecting increased collaboration revenue with GBM, mainly in Global Foreign Exchange. In GBM, trading and fair value income fell by $0.7bn, which was inclusive of an increase of $3.4bn relating to internally allocated funding costs. Trading activity decreased in Equities, as customer demand was muted, although this was partly offset by Global Debt Markets and Global Foreign Exchange.
9. 又hedge、又non-qualifying 又mainly in global foreign exchange…
10. 如果係有系統地對沖、規範嘅操作就係用嚟對沖市場波動（利率、匯率）嘅不確定性，真係會對沖咗個風險，但唔會令佢賺多咗。
11. 但如果係non-qualifying hedge即係唔係太有章法，單邊、未必有針對性同有效性對沖策略，個效果係咩？可以大賺、亦都可以大蝕，係炒嘢概念唔係風險管理概念。
12. 再睇埋global foreign exchange，就知呢一part唔可以當正餐食，你唔會見到管理層對呢一個收入有預期，或者拎上台面講同太多預測。
13. 所以呢32億唔會係好穩定嘅經常性、經營性收益，亦都所以總共129億收入嘅增加，有68億（15+21+32），唔係來自經營業務所得、或者係高度不確定性。
14. 如果撇除呢68億，真正業務經營所得嘅收入增長係61億，增長25%咁多啫。咁都無問題呀，都有25%增長喎，算經營得唔差啦！

買股票係買未來，咁呢一刻淨利息收益增長仲會唔會持續？

15. 第一反應你覺得，下半年甚至出年都應該冇問題，因為雖然聯儲局加息已經無咁急、咁凶狠，但而家息口依然係高位喎！
16. 2022年全年業績時，管理層對2023年全年淨利息收入預測360億，到2023年Q1時降低到340億。
17. 所以到今次調升番到350億，只不過係先調低，再升番少少，並唔係一啲對前景高度樂觀嘅表現。
18. 再睇得仔細少少：2023年上半年淨利息收入已經有 183億 ，以佢最新嘅全年350億預測， 即係2023年下半年管理層只係預有多 167億淨利息收入（350-183）。
19. 以上半年嘅利率水平，再加7月又加咗息，雖然只係加多0.25%，但如果以相同借貸規模，淨利息收入點都應該上下半年最少持平，點解會少咗？
20. 睇番個最近走勢：2022年上半年淨利息收入134億、2022年下半年192億、2023年上半183億、預計2023年下半年167億，個trend似高峰已過？
21. 只有因為借貸業務收縮先會喺高息環境下，淨利息收入會減少。表面數：唔係喎，佢Q2業績客戶貸款比上年年尾升咗360億，唔係多咗借貸生意咩？
22. 細節原因係因為有部份法國業務貸款，本身係諗住賣，所以擺喺Held for Sale，但而家賣唔成，重分類到客戶貸款。
23. 即係一早已經有呢筆數，唔係今年新增嘅生意，只係性質改變咗而令到總貸款增加。仲有第一季收購SVB英國業務所增加嘅貸款，呢個都係一次性增長。
24. 而如果唔計呢啲非經營性增長，其實貸款規模係下跌緊。客戶存款呢？睇淨額係增加250億，但如果唔計法國業務、SVB英國業務一次性增加存款，其實都係下降緊。
25. 睇環比就更直接：2023年Q2 vs Q1，客戶貸款係跌咗90億，客戶存款跌咗180億，解釋咗點解管理層覺得下半年淨利息收入預計會少過上半年，唔係佢預今年內會減息，而係佢預佢嘅主要市場，借貸活動會收縮，令佢唔可以喺呢個仲係喺加息週期嘅息口高位，增加淨利息收入。
26. 所以加息週期，有利銀行股，因為息差擴闊，一來係唔係真係擴闊要好睇你吸客戶存款嘅利息支出可唔可以控制得好穩定之餘，仲要睇貸款額有冇增長。
27. 咁2024年呢? 利率水平似唔會再走高，或者可能減啲息，咁佢嘅業務增長動力就更加無力？

對於長遠展望，值得關注是管理層的一句總結……

28. 「Our strategy has enabled us to further strengthen our balance sheet, providing us with a good platform for growth in the current interest rate cycle, while maintaining cost discipline」
29. 加息週期，唔可以話完，但都去到接近尾聲，2024年大家唔知咩事，唔再加同減息嘅方向會比再加息大，咁即係佢嘅淨利息收入，應該都係下跌。
30. 個重點係加息週期要強化資產負債表，形成一個好嘅增長平台。但佢無講收入會繼續增長，至於利潤就只可以靠嚴格成本控制。
31. 呢啲細節睇到出管理層知道Topline 持續增長，唔係一定無可能，但好大部份唔係佢地能力範圍內可以控制到嘅嘢
32. 而且佢地睇到借貸業務量跌緊，而佢地最叻嘅只係控制成本，所以預期2023年下半年淨利息收入比上半年係跌嘅。咁佢地控制成本叻，可唔可以頂住個利潤增長？睇番一開始嘅數字：
33. 收入增長124億，費用慳咗5億，稅前利潤增加129億。即係129億嘅利潤增幅，96%（124億）係因為收入增加。
34. 即係管理層有幾叻控制費用，如果個Topline 增長唔多，靠費用好貴，利潤都就唔會增長太多。