恒大又狼來了？

恒指昨天急跌五百點，市況固然係曳，但焦點似乎唔係ATM跌咗幾多，保險股跌咗幾多，而係恒大系四隻股都急挫，恒大(3333)跌16%、恒大物業(6666)跌13%、恒大汽車(0708)跌19%及恒騰網絡(0136)跌12%，原因係有傳內地廣發銀行凍結恒大的銀行存款。恒大好唔掂，缺水，應該都係天知地知大家知的事，而且近年仲狼來了上演了無數次，不過今次似乎堅爆Feel。

青冰一向唔玩恒大系的股份，無論跌得幾殘，挾得幾急，都一貫唔鬼理佢，所以多年來都係食花生為主，亦沒深究佢幾時會爆，佢資不抵債幾多幾多，講真，要跟佢的新聞都認真累呀，今日話佢唔夠錢還債，轉頭又發通告話有錢還，呢頭話佢內銀要為佢做壓力測試，轉頭又話黨慶有份應邀出席，應該無事啦，劇情反轉再反轉。

如果恒大爆，內銀及若干保險公司固然會中伏，但香港一眾華資企業相信亦不好過，大家應該即時會諗到甘比及華置(0127)，手持大量股份及其債券，所以華置昨天創52周新低，首當其衝，但別忘記好多上市華資都有份買恒大的債券，可能因為同許生係friend底，亦可能單純因為回報吸引，十幾廿厘息看似博得過吖，如果孖沙們私人買了，條數計唔到，但記憶中唔少上市公司買恒大債時，都有出通告，原因唔係透明度高，而係買的銀碼相對其市值及資產等，超過了若干百分比，按上市條例要作公佈，好喇，如果恒大係堅爆，債券持有人即使不是全數write off，都有排搞先拎得返錢，對於這些上市公司，撥備及日後發盈警，應在所難免。

如戰友們持有中小型股份，不妨為自己的持股作一個health check，睇吓最近的年報及近年的通告，究竟有冇揸住恒大債劵，有的話就要自己計吓撥備條數，間公司是否頂得住，否則要股價作反應後才如夢初醒，恐怕就太遲了。

聲明：以上內容純屬個人意見及分享，並不構成投資、買賣建議或推薦
Credit: 青冰投資