分析香港第一隻人工智能AI科技：商湯科技(20)
1. 商湯2022年收入人民幣（下同）38億，同比2021年跌 19%。全年虧損61億，同比減少65%。
2. 2021年虧損有成172億，最主要費用係優先股公允價值虧損135億，2022年相對得700萬，對損益影響減少好多。（正如我上年7月所寫）。
3. 優先股公允價值虧損一定會喺半新股見到，通常上市頭一、兩年股價升個虧損就會大。
4. 後期股價回落、或者優先股已經轉為普通股，虧損就會細好多，呢個係大部份新上市公司都要俾pre-IPO investor 賺嘅。
5. 如果撇除呢筆以後會無嘅費用後，2021年嘅虧損就只有37億，而2022年嘅虧損就有61億。
6. 即係實際上2022年嘅虧損係要比2021年多24億、多65%。所以實際上商湯業績係雙線齊跌。
7. 商湯發展的AI科技是燒錢，未產生利潤唔算太最大問題，但業務生意額理應要高增長才對。
Topline收入大跌差唔多兩成，原因何在？
8. 商湯主要業務分4大部份1）智慧商業（佔比38%）、2）智慧城市（佔比29%）、3）智慧生活（佔比25%）、4）智能汽車（佔比8%）。
9. 佔比最大嘅智慧商業、智慧城市同比分別下跌25%、49%。業績話係因為疫情關係：
「這主要反映2022年由於COVID-19疫情及中國內地若干城市的封控措施，延遲了客戶的人工智能支出以及我們產品的現場部署」
「我們的收入受到COVID-19疫情的負面影響，乃由於中國內地部分城市優先防疫，智慧城市項目的建設進度有所推遲」
10. 上述的影響肯定有，只是核心原因呢一刻無人知。但商湯都強調「延遲」、「推遲」，咁即係而家疫情完結，理論上一定要追工趕工。
11. 所以好簡單，過多兩個幾月就會出嘅中期業績嘅收入理應可以大升。如果到時見到嘅都係頹，咁你就會意識到商湯生意真係差，唔係疫情嘅暫時性影響。
真正核心問題
12. 佢毛利率其實好高，2021年有69.7%，2022年跌咗都有66.8%。呢個當然係反映緊AI高科技業務嘅價值所在，所以可以收客戶好高價錢。
13. 個概念係收客戶100蚊，成本為40元，所以有 60% 毛利率。但係如果人地用咗你服務後都唔找數，咁個高毛利率意義何在？
14. 我所講就是睇到應收款有問題。應收款就係商湯為客戶提供咗服務後，喺損益表確認收入，但客戶未找錢，所以同一時間確認應收款。
15. 2022年佢應收款有52億，同比增長2%，增幅唔多；但壞帳撥備就增加163%到26億。即係無做撥備嘅應收款同做咗撥備嘅比例係2比1（52億 vs 26億）。佔比唔細，但呢個都唔係最大問題。
16. 最大問題係由商湯提供服務確認收入計起，超過一年都未找數嘅客戶就有50億，2021年超過一年未找數嘅只有24億，升咗一倍。
17. 呢個一定係風險信號，拖數拖一年都好大問題，即係生意做咗，成本費用嘅錢洗咗，但資金一年都回唔到籠。
18. 啲客拖你一年數係大問題，拖一年數金額同比升一倍就係更大問題，更高風險。
19. 不過睇完佢業績解釋後仲驚：「主要由於COVID-19相關干擾及部分客戶的近期預算限制而導致客戶現金收取現延遲」
20. 即係本來啲客內部批咗找錢嘅預算，而家唔俾用、或者無錢用，呢個意思一係就係啲客本身因為疫情好唔掂，一係就好賴皮唔跟合約找數。
業績可以披露更多數據讓人安心……
21. 佢年結係2022年12月31日，嗰一刻拖數超過一年嘅應收款有50億，而佢出業嘅日子係2023年3月28日，即係距離2022年底已經過咗三個月。
22. 咁呢50億應收款喺出業績嗰一日（3月28日）有冇收番幾多%？即係個疫情完結、防控都唔攪三個月啦，啲客都係時候要找應俾未俾超過一年嘅數啦，當然佢業績冇講（可能想講但收錢唔多，講咗仲嚇襯人）…..
23. 睇完你係股東都會驚，即係個客問你買完嘢之後先話預算唔批喎，遲啲先俾錢？不過又係嗰句，中期業績你就會睇到佢應收款有無找快咗錢，我覺得唔會，因為呢個情況2021年已經有，2022年係更嚴重。
24. 從另一個角度諗，佢2021年收入47億，2021年未扣壞帳撥備嘅應收款係61億；應收款大過收入14億。 2022年收入38億，2022年未扣壞帳撥備嘅應收78億，應收款大過收入40億。
25. 成件事就係你同人講我一年做幾十億生意，但未收到嘅錢多過我生意額一倍，上年啲錢都仲拖緊數。即係佢嘅收入絕大部入都係帳面數，以淨額嚟睇，就係收入無現金流支持。
26. 你會問啲收入係唔係流架？又係我成日講嘅嗰句，我地唔使理佢啲數真定假，但做完生意收唔到錢，個商業模式好極有限。
27. 仲有個現金水平，2021年底有165億，到2022年底得番80億，即係一年用咗85億錢。
28. 呢個係已經加咗3億融資所得嘅現金流入。如果佢2023年keep 住呢個淨流出速度（85億），佢2023年就會無哂可用現金因為佢現金得番80億。
29. 可能要用埋定期先夠cover。呢個梗係啦：錢一直燒、收入又跌、收入確認咗又收唔到錢、整體又有虧損。
結論
30. 呢嘢隻本身我都覺得長遠係睇好嘅，但而家就覺得風險處處，好鬼死虛，收入升幾多都好，毛利率幾高都好，啲錢收唔番就冇意義。如果想玩係高難度操作。
31. 基本要點係睇中期收入會唔會回升，最緊要嘅係佢啲應收款幾時收得番？我已經無再要求佢要有盈利啦。
