美股ETF資金流向 (2022年5月25日)

上周美股再插水，標普按周跌3.05%，納指跌3.8%，兩者都是連續七周下跌，災情嚴重，不過上周的ETF資金流，就不是太悲，按周錄得139億美元流入，是近月以來較多的一周，跌咗咁耐，有資金撈貨絕對唔奇嘅。

圖一是以資產值排序的ETF，三大標普ETF都錄得淨流入，SPY有18.4億美元，IVV有53億美元，VOO有6億美元，三者合共有77億美元，比上周更多；QQQ有16億美元流入，納指ETF近期是較為反覆，資金時出時入，但納指100就一直反覆向下，勢頭明顯不及標普，留意返QQQ是納指100，其實已是較頂尖，較多成份股是有盈利的，但當NVDA、TSLA及GOOG等大股，都可以輕易地跌5%，QQQ想好都難，標普有銀行、農業及石油股等頂住，自然無死得咁甘。

圖二是以單周資金流出作排序，排首位的是羅素2000指數ETF的IWM，有18億美元流出，第二位是IJR，是小型股ETF，有15億美元流出，第三位是XLF，有10億美元流出，雖然銀行股不是跌得太慘，但XLF近期都係流出居多，第四位是VLUE，是價值股ETF，第五位就較少上榜，ESGE，有8億美元流出，睇個名都知是以ESG為選股因素，但在熊市之下，究竟環唔環保，有冇企業責任，其實都並非太重要，但ESGE今年只係跌16%，算是跑贏大市，但細心睇成份股，主力係三星、台積電、港股的ATM等新興市場的龍頭股，原來係屬於新興市場的ESG股。

圖三是以單周資金流入作排序，IVV有53億美元流入，而第二位是HDV，是高息股，有19億美元流入，第三、四位是SPY及QQQ，第五位是較少上榜的EEMV，股份是新興市場內較低波幅的股份，有14億美元流入，恐怕是資金被美股嚇到驚，要走去搵低波幅股票買了。

聲明：以上內容純屬個人意見及分享，並不構成投資、買賣建議或推薦
Credit: 青冰投資