比亞迪(1211)具長遠潛力

睇車股，其實相對容易啲緊貼行情。因為佢地每個月都會出一個產量同銷售量數據，去比較究竟佢地賣車賣得好唔好，造車跟唔跟得上賣嘅車速度。

我睇過咁多間數據，正常產、銷量每月、每季都會相當貼近，咁先正常。

1. 首先，要講吓比亞迪最主要業務除咗汽車外、仲手機零件代工裝嵌、電池同光伏。汽車、電池同光伏業務無另外獨立上市，不過手機零件代工裝嵌係有獨立上市，285比亞迪電子。
2. 所以你想買比亞迪，係因為佢汽車業務，你就要搭單買埋佢低端啲嘅手機零件代工裝嵌業務，不過比亞迪只係揸比亞迪電子(285)65%股份。

3. 關於產、銷最新數據：

比亞迪數據
5月銷量114,943架，同比增長148%；產量118,135，同比增長141%
1-5月累積銷量512,363架，同比增長162%；累積產量517,778，同比增長155%

相比電動車三傻五月數據：
蔚來：銷量 37,866 架，同比增長11.8%(無產量數據）
小鵬：銷量 10,125 架，同比增長78% (無產量數據）
理想：銷量 11,496 架，同比增長165.9% (無產量數據）

4. 當然無得比，三傻規模細，係BB班，連個電池都未完全攪得掂，比亞迪2008年已經開始造電動車啦，但係我就係想大家感受吓差幾遠。
5. 如果只計absolute amount， 三間加埋嘅銷售數都唔夠一間比亞迪多因為規模唔同，但就算係計增幅百份比，基數雖然大，都有明顯優勢（理想算增長得好啲）。
6. 相比傳統燃油車廠：

吉利
5月銷量 89,070 架 ，同比下降7.4% (無產量數據）
1-5月累計銷量下降8%

長城
5月銷量80,062 架 ，同比下降7.9%；產量 84,288架，同比升4.1%
1-5月累計銷量下降19%

廣汽
5月銷量183,061架，同比增長3.54%；產量192,400 架，同比增長16.12%
1-5月累計銷量升6.4%
呢幾間規模大好多，不過主力做傳統燃油車，5月或者係1-5月整體銷量慘淡。

7. 即係個汽車市場整體氣氛都唔係太好，因為規模大嘅車廠，吉利同長城銷量都係keep住下跌，廣汽只係微升。
8. 但電動車市場就做得幾好，喺國內經濟環境唔係太好嘅情況之下，銷售都有大幅增長，所以電動車嘅需求其實都幾強勁，或者叫做不斷蠶食緊傳統燃油車市場份額。
9. 所以有另一個細微位：今年三月，比亞迪傳統燃油車嘅產、銷量都變零。我覺得呢個係一個好重要嘅轉捩點。佢地覺得係時候完全投入電動車市場，唔需要理會傳統車嘅包袱，可能係開展高速增長嘅開端，而近期數據都完全支持到。

10. 其實，呢十年八年，比亞迪本身都有做傳統燃油車，可能佢地覺得電動車市場之前未完全成熟，所以唔可以一下子狂谷。就好似傳統車企，都係近幾年先開始谷電動車。個分別係，Tesla 同比亞迪都係一早睇好同押注電動車市場，2008大家都已經有自己嘅電動車，傳統大型車企，就唔多睇好電動車市場，所以只係觀望，到而家先叫做力追。
11. 咁比亞迪除咗一早睇好電動車市場外，佢同其他電動車廠喺競爭上有咩最大嘅優勢？個優勢上面都有提過，就係佢自己都有做電池。
12. 比亞迪個創始人，曾經嘅中國首富王傳福，本身就係做電池起家，係一個科學家，做咗幾廿年電池。
13. 我記得2008年睇過佢本書，當年佢已經講過，做電動車，舊電太大，所以做唔起，如果做到好似手機電池咁細，咁先可以顛覆成個汽車市場。
14. 電動車最核心嘅部件，亦都係最難克服嘅部份，就係電池，以前係，而家依然係。一架電動車嘅成本有30%就係舊電池。
15. 而家成個市場都係不斷推動研究點樣改進個電池，從改變物料組合（磷酸鐵鋰到三元、四元電池，從鋰子到納離子，甚至係氫）或者係改變形態（液態到固態、刀片） 做嘅每一種改變都係為咗降低成本、提升續航力、減少體積重量，提升安全性。
16. 邊個車廠掌握做電池披術，邊個就會有好大優勢。市場整體印象寧德時代係做高端啲嘅電池，好似三元電池，比亞迪係做次少少嘅磷酸鐵鋰，但係比亞迪除咗做電池外，自己都做車，而且係主力做車，而且2008年已經出第一款電動車，寧德時代唔識做車。
17. 所以呢種十幾年嘅造電池、同時造車嘅經歷，除咗Tesla外，個市場無乜邊間係可以同佢比。
18. 喺供應鏈緊絕嘅年代，就要好靈活分配資源，Tesla 識得減少生產車型種類，簡化生產程序，比亞迪都識調渡到內部資源，去化解或者係要做最少化呢個危機嘅成本：
19. 因為比亞迪嘅電池業務，有賣俾街外人嘅同時，都有內部供應俾比亞迪汽車業務。
20. 睇番最近幾年嘅年報對外電池銷售，三年嘅收入增長係咁：2019年增長12%、2020年增長20%、2021年增長32%。個市場對電池需求龐大，尤其係2021年，你睇個增長就知。
21. 但當你睇埋佢內部銷售嘅變化，你就會明白個市場對佢嘅電動車需求更大。內部電池銷售， 2019年下跌28%，2020年下跌14%， 2021年係上升121%。
22. 內部銷售有成230億，比佢賣俾街外嘅154億仲要多好多。
23. 呢種變化，好明顯係一種要應付「內需」、搶佔最核心嘅電動車市場份額嘅策略，因為你冇理由自己都唔夠用，就供應俾出面街㗎嘛。
24. 呢個體現咗佢點解做電動車好有優勢，點解今年嘅產銷量都保持到增長。因為佢唔使為電池等運到。
25. 一間車廠，自己無生產電池（大部份車廠都無，如果唔係寧德時代唔會咁發），到供應鏈緊張嗰陣時，你就會等運到，接唔切啲order，浪費晒你嘅產能， end user唔會等你（除非你係Tesla）做咗架車出嚟，佢地會喺呢段空檔期，買其他品牌嘅電動車。
26. 自己做電池，就算連Tesla都冇呢一個優勢，當然佢哋自己有生產電池，但主力都要靠外面供應商，而其中一個就係比亞迪。

仲有一個細微位：
27. 其實佢嘅4月出嘅季度業績唔係有太多訊息，因為佢三個主要業務版塊嘅收入份額都無分開披露，所以我冇即時講佢季度業績。
28. 但我留意到一個數據，其實上年已經係咁：就係佢嘅毛利率依然好低，得11、12%左右（當然手機代工低毛利率係一個原因，但本身造車都係低）。
29. 你見理想、蔚來最近都有17%-20%，傳統燃油車175吉利都有17%， Tesla唔使講，最近一季30%。
30. 所以睇比亞迪每月產銷量你會預期佢今年、或者最起碼上半年中期業績，收入同盈利都會大升，但係毛利率或者係經營利潤率可唔可以做好啲，就會係一個問號。
31. 佢汽車賣得好，但其實冇乜錢賺，呢個我明白，市場而家都受，因為佢而家要搶市場，喺呢個電動車市場開始高速增長嘅時期，佢唔介意燒錢，因為佢都大把錢，4、5百億現金喺手。
32. 咁所以嚟緊中期業績，如果可以睇到佢汽車業務毛利率改善到，就會完美。因為如果你有留意，佢而家PE有成232倍， Tesla都只係100倍，咁如果要買電動車股，點解我唔買Tesla，要買BYD？
33. 比亞迪面對嘅主要係中國市場，Tesla面對嘅係中國加海外市場。
34. Tesla PE而家低咗好多，你可以話係最近佢股價跌，但係相比起佢拆股前，其實個股價都係好高，佢最主要PE跌，係佢每季嘅盈利都大升，令到佢嘅PE下降。
35. 所以比亞迪，理論上，因為佢銷量大增，純利都會升得多，所以中期業績之後PE應該會有所下跌，行緊Tesla嘅軌跡。但係佢個效率始終好低，如果個毛利率今年內連15%都去唔到，我會覺得唔係好合格。
36. 不過市場依然肯俾200幾倍PE佢，可能係因為覺得以佢嘅規模，對佢有信心提升利潤率，利潤率提升咗，收入又升，個EPS自然會大升，到時個PE就會低好多。
37. 仲有少少補充：佢係有海外業務嘅，但係暫時都唔係好睇到明顯嘅吸引之處。數據方面，我覺得佢係集中火力打國內市場為重心。2020年汽車業務佢全年中國有500 億銷售，海外有300億銷售。到2021年，佢汽車業務全年中國有1000億銷售，海外有77億銷售。喺策略上好明顯啱啱過去一年佢係主力搶佔國內市場，可能都係資源分配問題佢作咗個取捨。
38. 要留意番，中國今年第一季新能源汽車對中國整個汽車市場滲透率已經由上年同期嘅個位數增加到今年嘅19%，成個市場嘅產、銷量分別係125萬架同埋129 萬架。而比亞迪今年第一季產、銷量分別係 29 架同埋29萬架。
39. 即係市佔22%-23%，我相信以佢嘅生產配套完善嘅優勢，嚟緊幾季會再見到市佔嘅增長。先唔理海外市場，淨係中國市場，新能源汽車喺個汽車市場嘅滲透率仲有好大上升空間，而比亞迪嘅市佔都會繼續升，所以呢個從實質數字上睇，佢都有幾大嘅優勢。
40. 王傳福股東大會上都有提出嚟緊會增加資源拓展海外市場，暫時數據上應該未睇到成效係點，睇吓嚟緊中期業績會唔會有一個變化。
41. 另外佢都有講就係話電動車上半場係硬件，下半場就係個軟件，咁呢個都係一個潛力嚟嘅，因為佢本身都做緊一個半導體業務將會分拆喺深圳上市，同一時間佢都有同Nvidia合作做一個智能駕駛系統嘅六年計劃，呢啲都係可以係一啲憧憬，但實質上未睇到佢有優勢。
42. 結論係佢做車嘅配套同埋技術係相對地好完善及完整，有自己嘅電池、自己嘅芯片、自己嘅造車技術，但係喺每個領域係咪叫做最領先呢又未必係。所以佢係中國市場有絕對優勢，喺個海外市場我覺得只可以講拭目以待。

呢隻我都係會長期追蹤嘅一隻股份。

聲明：以上內容純屬個人意見及分享，並不構成投資、買賣建議或推薦
Credit: CFO講年報