小米(1810)2022中期業績點評

1. 小米不嬲鍾意喺業績裏面用好長編幅去介紹佢新產品、活躍用戶人數增長、同埋「好有希望」嘅未來發展方向。


2. 其實擾亂視線，因為呢啲「好嘢」都完全無、或者未反映到人喺財務數字度。

3. 其實簡單啲睇財務數字，你就會感受到佢業務狀態點解係咁差啦。

業績數字重點
4. 佢今季收入702億 （人民幣、同下），同比上年同期下跌20%，環比上季都下跌4.3%。
5. 當然同整體智能手機市場需求疲弱有關，不過佢嘅問題係「價、量齊跌」。
6. 上年同期出貨量係5290萬部，今季減少26%到3910萬部。最慘嘅係，佢係平均機價（其實本身已經好平）都要由上年同期$1116一部，跌3.1%到今季嘅$1081一部；環比仲慘，上季係$1188一部，即係跌9%。
7. 全球手機市場需求疲弱，市場對小米手機需求更加疲弱，小米手機整體除咗個價錢之外真係唔夠競爭力。市場只肯俾1千蚊去買嘅手機，其實用戶黏性真係無乜。
8. 所以整體手機毛利率由上年同期11.8%跌到8.7%，環比上季嘅9.9%都要差，直情走回頭路，回復2020年時嘅盈利水平，因為2020全年嘅手機毛利率都係樣得8.7%。
9. 咁其實呢幾年佢推出咁多款唔同機型，原來個定位策略同產品水平都係無乜長進，一遇到宏觀經濟差，就完全表露咗個競爭力不足問題。
10. 講咗好多次，毛利率高低反映產品質素同叫價能力，你唔會喺蘋果業績睇到佢係咁講佢啲手機又乜又物，佢剩係俾個毛利率35%嘅數你，而且比較2020、2021年仲係升緊。

11. 而小米，本身都係低，得10零%，而家又返番去2020年水平，已經唔係整體市場需求低迷問題，係佢不計成本，要割價求出貨嘅問題，因為佢驚再過多一、兩季，賣得更差。
12. 呢個睇法係有跡可尋，2022年4-6月嘅存貨減值準備，同比升188%，而如果計2022年1-6月嘅存貨減值準備，同比升254%。顯示出貨量大減，出唔到貨嘅較舊機型，就喺之後幾季更加無運行。

13. 毛利率下跌，所以今季毛利只得118億，同比下跌22%、環比都係下跌7%。亦都係因為咁，經營利潤同比上年亦都下跌83.8%。
14. 如果環比上一季嘅經營虧損，表面上今季嘅經營利潤係有增長有改善，但係只要撇除返佢一啲股權投資公允價值變化，呢啲非經營性項目，環比上季經營利潤都係下跌左49%。

15. 就算用同一個方法去比較上年同期，都下跌左74%，經營做得差係無得爭辯。
16. ATMJX之中，MJ未出業績，但唔使等MJ出業績，都可以斷定X係最差狀態！

關於印度嘅官司
17. 小米今次業績有提到佢哋自2021年12月，收到印度稅務部門嘅通知對佢哋進行調查。
18. 直到2022年8月佢哋到進一步收到指令，印度執法部門將小米喺印度銀行部份存款凍結咗。

19. 因為當局覺得佢哋某啲業務嘅費用係冇找到數嘅，所以先扣起佢哋啲錢唔俾佢地轉走，等到調查完結之後，再決定係咪要小米支付相關費用。
20. 小米當然覺得佢哋有合理辯解，所以喺財務報表上冇作出相關嘅撥備。喺會計角度上佢哋呢個做法係唔可以話錯嘅，因為喺法院未正式判決之前，佢哋都可以話好難準確估算究竟要唔要作撥備。
21. 但係個細節位係由上年年底開始，執法部門由通知佢哋去展開調查，到今年八月進展到開始凍結小米喺印度銀行嘅存款，你就知執法部門開始掌握更多嘅證據去指控小米。
22. 即係個官司嘅進展，從小米嘅角度出發，肯定變得差咗。而最緊要嘅係印度嘅出貨量佔小米總出貨量約15%，係小米海外其中兩個最大嘅市場所。
23. 所以個風險係，如果呢單官司小米輸咗，除咗可能賠款外，會唔會影響佢地喺印度業務嘅發展呢？只要印度政府話要增加佢地某啲費用，都會影響佢長遠喺印度嘅經營利潤。
24. 管理層喺業績嘅表述，實質無提到佢地有乜嘢充份理據去抗辯，只係簡單話「有正當理由回應印度政府部門」，即係好明顯自己都無把握，但人地已經進一步凍結你啲錢，呢個一定係一個大嘅潛在風險。

展望
25. 小米而家嘅狀態有啲似Facebook。就係核心本業開始遇到樽頸，無論收入定毛利率都倒退緊。
26. 最慘嘅係佢自己都知個本業長遠再重拾高速增長機會唔大，所以要投入大量研發成本去搵第二啲新業務增長。
27. 因為佢本身只係做低端手機，技術含量不嬲都唔高，而家就話去做都唔知識唔識做，唔知信唔信佢好嘅智能電動車或者仿生機械人。
28. 聽落好有story，但呢一刻客觀效果見到嘅只會係投入重大金額嘅研發費用，今季就增加咗22%到38億、以及預咗長時間背負住（起碼去到2024）要為呢啲新業務長期投入成本嘅包袱。
29. 今次季績無再提2024年上半年量產電動車，無人知2024年佢係唔係真係得，我就唔信啦。
30. 就算得，到時其他一早入場嘅車廠都已經去到另一個層次。就算真係賣到車，會唔會又係量多但低端低價？
31. 當一間公司研發費用喺一段期間增加咁多，你可以講佢好有決心去開發一啲新嘅高科技業務。

32. 但係大前提你要睇到佢本業係咪都穩穩陣陣，叫做有增長有盈利？如果本業，即係最叻嗰樣嘢都攪唔掂，無論係收入定係毛利率都係倒退緊，咁點解我要信佢可以喺另一個極度競爭激烈嘅電動車市場？

聲明：以上內容純屬個人意見及分享，並不構成投資、買賣建議或推薦
Credit: CFO講年報