渣打銀行(2888)股價強勢之原因

1. 要衡量渣打前景可以睇兩樣嘢：1）佢業務規模同盈利能力有冇去返疫情前水平？2）未來一兩年仲有冇較高確定性增長？

疫情前水平比較

2. 渣打2022全年業績同比2021年係做得幾好，收入163億，同比升11%；其中淨利息收入76億，升12%、非利息收入87億，升10%。
3. 股東應佔利潤29億，同比升12%，利潤率18%；有形權益回報8%，比2021年6.8%升咗1.2 個百份點；淨息差1.41%，2021年係1.21%，有明顯升幅。
4. 疫情前嘅2019年，收入154億，其中淨利息收入77億、非利息收入78億；股東應佔利潤25億，利潤率16%；有形權益回報6.4%。
5. 將2022年同2019年泊埋一齊睇，淨利息收入其實已經好接近，都係77、78億，而非利息收入相比升12%，大幅超出疫情前水平。
6. 反映盈利能力嘅利潤率係18% vs 16%，都係好過疫情前。有形權益回報率，都由6.4%升到8%。
7. 有形權益可理解為當公司清盤時股東應佔權益真係拎得走嘅嘢。即係普通權益減無形資產價值、優先股溢價呢啲拎唔走嘅嘢。總之就股東回報率係升，效益大咗。
8. 所以佢2022年整體業務規模同盈利能力都可以講係番返去，甚至超越疫情前水平。

未來兩年預期-淨利息收入

9. 渣打計息淨資產2022年同比只升2.3%，即係借貸規模無乜增加，所以point 1 講嘅淨利息收入升12%，最主要當然係受惠美國加息周期。
10. 聯儲局主席Powell最近講嘅 beginning of de-inflationary process 係講通脹增幅開始減慢，但係依然向上升緊，仲係通脹緊。記住de-inflationary 唔係通縮，通縮係deflation。
11. 雖然預期聯儲局加息放緩，但而家通脹仲有成6.2%，高過佢地long run目標通脹率2%好多。
12. 再加上美國就業暫時仲好強勁，所以預期2023年、甚至2024年頭，聯儲局都仲會緩和地加息。
13. 再加埋美國加息，香港都有成幾季滯後效應，所以點解渣打管理層喺業績度好有信心講： 2023年淨息差會由1.41%升到1.75%，而2024年會再升到1.8%，2024年之就無人知啦。
14. 所以淨利息收入按目前個走勢，都幾確定2023年會升得幾明顯，因為淨息差係1.41%去到1.75%，增加34個點子，亦都係近年高位。而2024年，就相比2023年只有小小增長。

未來兩年預期-非利息收入

15. 至於非利息收入，增長12%主要來自金融市場收入同比升17%，創歷史新高嘅57億所致（佔整體非利息收入66%，係主力業務）。
16. 但又同一時間，俾財富管理收入22億，同比下跌19%所部份抵消。
17. 金融市場主要經營嘅係：1）項目及運輸融資、2）債務資本市場及槓桿融資、3）宏觀、商品及信貸交易、4）融資及證券服務、5） 銷售及結構。
18. 望落感覺係高風險，炒嘢多。而佢收入創歷史新高，業績披露主要係因為宏觀事件導致買賣差價擴大，例如油價波動、外匯波動，令到佢地收入大增。
19. 唔可以話下年呢個收入一定跌，只係以佢靠市場波動大而得益，所以高度不確定。
20. 同時又因為叫做創咗歷史新高，所以嚟緊向下機會應該大啲，好難話係高確定嘅長期持續增長業務。
21. 財富管理，就係渣打幫客戶做投資，而家全球整體投資環境都係波動，比較多潛在風險，所以投資者較為觀望、保守，導致交易量下跌，所以收入大跌。
22. 講真如果覺得上年個市係最差，理論上佢呢個業務範疇收入今年升嘅機會較大，但升幾多無人知。
23. 即係非利息收入嘅變化，比較無咁確定、好難預。但如果睇番近5年情況，除咗咁2018年得70億收入外，其餘最差嘅2019年都有78億，2020年有79億，最好係2022年嘅87億。我會傾向下跌但唔會大跌嘅機會最大。

預期信貸減值撥備

24. 呢個數係銀行預期借出去嘅錢，有幾多收唔番嚟會變壞帳。銀行每年年尾都會審視番、比較上一年，會唔會有多啲預期壞帳。如果有，多咗部份就要入當年損益做費用。
25. 所以近5年最高嘅2020年，有23億預期信貸減值撥備入損益。因為當時全地球對疫情都好恐懼，唔確定疫情對營商環境有幾大負面影響，所以相對2019年，額外增加23億預啲債仔會還唔到錢。
26. 2018年係7億，2019年係9億，2022年係8億都比較正常。只係2021年嘅2億相對低。梗係啦，理論上要做撥備嘅大部份喺2020年做咗，所以2021年再加嘅數就少咗。
27. 但要認真考慮一樣嘢，2022年8億撥備費用，有5.8億係針對中國房地產企業。而扣除已經做咗減值撥備同扣埋已抵押資產價值後，佢面對嘅房地產企業風險承擔都仲有87億。
28. 呢87億，係無遮無掩，因為抵押資產無cover，又未做減值撥備。佢而家一年股東應佔利潤29億，如果2023年形勢變差灰犀牛出現，87億都可以再額外撥多10億8億唔出奇，咁就好影響個利潤啦。

派息、回購

29. 而派息加回購嘅總分派額度，2024年底前目標係派50億。2022年已分派加確定將會分派已經總共有28億，股價理論上反映咗。
30. 即係潛在有22億未確定，業務唔係走樣得太過份都係會派同派到，所以呢個當佢喺今年中期業績宣布落實分派時，都會對股價有啲支持作用。

結論

31. 未來兩年主力靠淨利息收入增長，管理層俾哂tips 2023淨息差1.75%、2024增幅較少去到1.8%，因為宏觀嘢，佢地控制唔到，但又係幾確定。非利息收入較為不確定，可能會下跌，但都唔會跌太多。
32. 底數股東應佔利潤，2023年都可以有10幾、20%增長，因為管理層都確實地講咗，個2023年有形權益預期有10%。
33. 2022年29億有8%，假設有形權益2023年無大變，10%回報，即係個股東應佔利潤就要做到37億，即係27%增長。但求神拜佛中國房地產唔好系統性爆獲。
34. 而2024個股東應佔利潤可能最好都係增長8%，因為有形權益回報率預期只得11%，即係個股東應佔利潤可能得40億。
35. 仲有一樣嘢，俄烏戰爭中國有冇援助俄羅斯？香港、香港銀行角色係點？如果因為呢啲嘢美國金融制裁中國、香港，銀行股都會瀨哂嘢，可能係我諗多咗，但發生機會唔係無。

相關閱讀：
滙豐(5) 恢復季度派息，可以安樂收息？
解析四大內銀股

聲明：以上內容純屬個人意見及分享，並不構成投資、買賣建議或推薦
Credit: CFO講年報