雅居樂核數師辭職 注意停牌風險

1. 最近雅居樂動作頻繁：11月配股集資港幣（下同）7.8億、尋日再配股集多6.2億、10日前又賣子公司雅生活（3319）3.42%股份，收4.9億、仲要換埋核數師，當然同債務纏身，連環利息都要周圍撲水有關。
2. 其實加加埋埋，最近喺市場撲咗成15億水，債務壓力，應該短期鬆口氣啦，點解羅兵咸咁驚仲要辭職？
3. 雅居樂核數師辭任公告，劈頭第一句講羅兵咸已經幫公司做咗17年核數師，好明顯想引導讀者覺得今次辭任係做得太耐，獨立性削弱咗所以要換。

4. 不過仔細睇，原來係佢嘅仔雅生活唔生性，喺阿媽債務纏身嘅時候，有幾筆街數洗咗出去，又俾唔到資料，搞到核數師同時要向阿媽同個仔遞辭職信。
5. 嗰幾筆街數分別係1）投咗人民幣（下同）16億喺基金信托、2）借9.42億俾有業務合作嘅第三方、3）俾咗只係有合作意向嘅第三方2.5億誠意金。
6. 而羅兵咸其實都係樂正常問緊嗰16億基金信托有咩underlying嘅標的資產（即係驚你買咗垃圾資產嘅基金）、借錢俾生意伙伴9.42億同俾誠意金2.5億嘅商業理由（驚你唔係真係借錢或者收唔番）。

7. 咁多錢，正常公司仲驚過核數師啦，一定有好強嘅商業理由啦，管理層一定叫CFO做哂分析，內部阿總高管一定傾咗好多轉啦。咁核數師問，你應該好容易將個內部審核流程資料俾佢啦。
8. 羅兵咸封辭職信講咗就係拎唔到呢三樣嘢嘅資料，所以辭職。明顯就係你雅生活管理層無俾到或者俾唔到羅兵咸想要嘅嘢啦。
9. 但其都只係三筆數，唔複雜，之後解釋到就得啦，你羅兵咸一年收人三千幾萬audit fee，咁小事，點解要咁衝動呢個時候辭職，無咗成三千幾萬audit fee呀喎？
10. 好明顯羅兵咸就係聞到味啦，三千幾萬都唔要，即係個風險仲大過三千幾萬啦！
11. 雅居樂管理層都係好疑惑，佢哋喺公告度都講咗嗰16億基金信托有部份已經收返啦（嗱，收到一蚊都叫咗部份收番），未收返嗰啲個市價都高過佢哋投資嘅歷史成本。
12. 嗰9.42億都係有部份已經收返啦（都係無講收到幾多，即係1蚊都叫收咗部份），而嗰2.5億就收返晒啦（可能呢個誠意金個明目太離譜，自己都唔好意思唔收番）。
13. 同時管理層公告暗示，係羅兵咸未實質開始審核工作，先未攞齊嘢。

14. 做核數唔係話過咗年結12月31日之後先可以實質開始。根本羅兵咸開始左幾個月做預審工作（通常係年結前2、3個月），所以先發現呢啲重大問題。
15. 管理層喺公告嘅辯解，係唔合邏輯。大佬呀，一年收你3000幾萬錢，你叫我幾時開工都得啦。唔通我專登唔開工，就係為咗唔想賺你三千幾萬？唔好玩啦大佬。
16. 實際情況係羅兵咸根本就係開始實質審核工作好耐，因為呢啲數係由7月嘅中期報告已經有，我肯定嗰時羅兵咸已經問緊你攞資料，而家已經12月，成半年你都一直俾唔到嘢。
17. 講咗咁耐，阿媽又冇錢，點解個仔仲要咁闊綽，唔通真係二世祖特別易呃，投資高風險嘅基金信托，又借錢俾人？
18. 你估出嚟做生意個個都係傻嘅咩，成日話輸錢、撇帳。真實原因係乜嘢冇人知，我只係斷估。
19. 仲記唔記得恆大物管子公司，又有134億嘅錢唔知去鬼咗邊度？
20. 好明顯今次亦都好大機會就係阿媽唔夠錢要搵阿仔度水幫手。

21. 但阿媽、阿仔係兩間上市公司，有唔同嘅股東基礎。阿媽同阿仔之間嘅錢銀往來，都係要由佢哋各自嘅股東批准。
22. 但係阿媽啲債到期還息，點樣等得切阿仔開股東大會批呀（而且都唔會批准）？
23. 咁點算呀？咁咪由阿仔嘅經營業務範圍出發囉，透過借錢俾業務伙伴，再由業務伴轉手俾返錢阿媽，真係一日攪掂。
24. 同時阿仔又可以買吓理財產品，其實就係當抵壓品，轉個頭啲相熟券商咪可以轉啲錢出嚟俾阿媽囉，以上純粹個人猜測，不過都係非常之大機會係呢個情況。
25. 點解？因為投資基金、借錢俾業務伙伴呢啲嘢，商業世界係好common，正常係好容易提供到資料、解釋到原因，但管理層竟然半年都滿足唔到核數師要求。
26. 同埋，而家阿媽風頭火勢，又點會咁求其唔睇住個仔，俾佢亂咁洗咁大舊錢？除非舊錢係俾阿媽。
27. 咁點解羅兵咸唔等耐啲，睇吓管理層之後俾唔俾到多啲嘢？話哂真係成三千幾萬審計費喎。
28. 所以真正令羅兵咸辭職嘅唔係佢拎唔到佢想要嘅資料，而可能係管理層俾咗太多資料，同羅兵咸講呢啲數嘅商業理由就係科水俾阿媽幫佢還債。
29. 呢個位先真正令到羅兵咸驚，因為佢都唔知除咗呢啲數外，仲有冇其他數，如果佢唔跳船，之後爆咗煲，阿仔小股東告阿媽，要佢還番十幾廿億，羅兵咸都唔知要幫手賠幾多。
30. 咁可能你會問，點解安永咁進取，夠膽接呢啲嘢？
31. 佢都係搏架咋，佢係有一個優勢，就係以前所有嘢都係唔關佢事，而且因為羅兵咸辭職，佢對雅居樂變得好重要，因為好難可以再搵到其他四大做佢核數師。
32. 所以雅居樂會極度配合安永做核數工作，當然啦，有邊個唔想賺嗰3000萬？ 安永梗係想嘗試去賺呢3000萬。
33. 所以佢就要步步為營，有啲嘢佢只可以off record叫個管理層去攪番掂啲文件，砌番個合法嘅商業理由。
34. 之後安永就會俾內部風險審核部門睇，睇吓過唔過到。但無人話過安永包生仔，如果賺你3000萬，但要賠過億，無人會咁戇居同你包生仔。
35. 點解羅兵咸唔可以咁做呀？因為羅兵咸可能知得更多更全面，安永所以一定係步步為營，佢心諗我咪先收你1000 幾百萬Deposit之後同你做核數，到真係發覺搞唔掂，出唔到業績，佢都係可以辭職跳船唔做。
36. 呢個我一開始講點解，就算換咗安永都可以出年第一季出唔到年度業績之後停牌，安永唔會沉船都唔跳嘅。

聲明：以上內容純屬個人意見及分享，並不構成投資、買賣建議或推薦
Credit: CFO講年報