美團(3690)每季有進步嘅軌跡，2023年業績相當樂觀？
同比一年前數字
1. 分析Q3業績時，因為管理層都直接講明2022年9月、10月、11月，國內疫情高峰，我預計佢2022年Q4業績麻麻。
2. 喺一路等緊佢出Q4業績嘅呢段時間，都驚有沖擊，但出到嚟啲數又唔錯喎。
3. 收入方面，核心本地商業人民幣（下同）435億，同比升17%；新業務167億，同比升33%，再創歷史新高。
4. 經營利潤方面，本地核心商業72億，同比升成41%，新業務虧損64億，跌38%，虧損再創歷史新低。
環比一季前數字
5. 環比2022年Q3，核心本地商業收入係跌6%，經營利潤跌23%。
6. 呢個當然係一個警號，本業環比做得差，但都係嗰句，上季業績已經預告咗Q4會係艱難，所以市場預咗。
7. 而另一個原因係Q3核心本地商業嘅經營利潤93億，係歷史新高。拉長啲睇，今次Q4嘅經營利潤72億，都係歷史第三高，所以點解同比都有41%增長，代表2022年嘅美團，喺核心本業同2021年比都係另一個層次。
8. 呢個位下季可以再留意，究竟係2022年Q4整體市場特別差，定係佢自己走下坡，但我呢一刻唔係太擔心。
9. 而2022年Q4嘅新業務收人，環比Q3都仲有得升2%，算好堅韌。經營虧損，上面講咗係創歷史新低，即係就算環比都有進步，減少6%。
最直接反映經營效率嘅經營利潤率（核心業務）、經營虧損率（新業務）表現
10. 核心本地商業近8季，由2021年Q1開始睇，分別係：14%、18%、11%、14%；
11. 而2022年Q1開始分別係：16%、22%、20%、17%，即係2022Q4有所回落，但都係近8季第三高，相比2021年，效率明顯升咗一個層次。
12. 而我一直最關注嘅新業務經營虧損率，近8季，由2021年Q1開始睇分別係：-82%、-87%、86%、-75%；
13. 而2022年Q1開始分別係-62%、-48%、-42%、-38%（連續6季創歷史新低），個trend又係我當初所講，蝕錢唔緊要，係唔係一路行緊進步軌跡？當然係。
14. 2022年Q4係艱難嘅一季，但無阻佢進步趨勢，所以2023年有4個季度再提升效率，朝住2023年底內，新業務可以有經營利潤目標進發，正如上季我所講唔係無可能。
未分配經營虧損
15. 我有留意到佢個未分配經營虧損2022年Q4有16億，最主要係股份支付人工、無形資產攤銷、金融產品公允價值變化，都係包喺呢部份。
16. 呢個數唔知有冇食咗啲新業務嘅費用，令佢新業務嘅經營虧損不斷下跌。
17. 但只要佢嘅分配口徑咁多季一直都係一致嘅，咁都係有可比性，但街外人唔會睇得到。
18. 咁要睇未分配虧損會唔會有伏，就只可以睇整體經營利潤，因為整體經營利潤係全包所有業務收入同費用，無得撥嚟撥去，修飾某個業務表現。
19. 整體經營利潤，2022Q4係 -7億，即係虧損，同比一年前減少85%，好大進步。環比Q3嘅9.9億，就當然係倒退好多。
20. 如果有睇我上次分析Q3業績：
解讀美團(3690) 2022Q3業績：騰訊派美團可能走寶
會有印象其實佢Q3實現整體經營利潤9.9億，係因為有有17億左右匯兌收益做成。如果無呢個數，Q3佢都依然係整體經營虧損。
21. 而Q4匯兌收益就得5.6億。所以Q3同Q4同時撇除匯兌收益，經營虧損分別係7.1億同12.6億，其實實際經營表現差距並不大，但Q4經營環境因為疫情係差好多。呢個先係真正睇到佢狀態嘅數據。
22. 另外，當總收入同比升21%之下，整體費用佔收入比率係全線下跌（睇下圖），即係賺多一蚊收入要洗嘅費用少咗。
23. 其他大型科投股係喺收入增長乏力要靠cut cost榨取利潤，但美團係收入增長之下，邊際費用升幅減少，完全處於唔同嘅趨勢當中。
另一個顯示增長軌道嘅數據就係佢嘅經營現金流
24. 2019年係淨流入56億，年底現金水平134億；2020年係淨流入85億，年底現金水平171億；
25. 到2021年，集中火力攪新業務，所以經營現金流係淨流出40億，但年底現金水平係325億。因為當年配股集資453億，如果唔係現金水平會穿底。
26. 而到2022年，經營現金流淨流入係114億，現金水平有202億，唔計2021年配股因素，經營現金流同現金水平，都係近四年最高、最健康。
結論
27. 騰訊上篇講咗，都係近期所持觀點，增長無活力，無新驚喜，始終基數太大，2021年做得太好，見頂趨勢。
28. 阿里巴巴同比增長弱，環比今次做得幾好，但始終睇環比，阿里業務都好有季節性因素。
29. 相對之下憧憬美團2023年將會有突破，新業務實現經營利潤（整體有番PE），係最實際。
30. 因為收入增長喺艱難嘅Q4都保持活力，經營效率持續創新高（經營虧損率持續創新低）。ATM，2023最值得期待嘅我始終覺得係美團。
31. 你會話抖音做外賣，會蠶食美團市場。一來十劃未有一撇，二來實際啲，佢個業模務式都唔知係點，真正面對競爭嘅都唔會係美團一個。
32. 起碼今年內我覺得美團新業務實現經營利潤嘅機會應該快過佢俾抖音蠶食市場嘅機會。
33. 結論係美團的確要每季睇進度，始終佢仲蝕緊錢，市場競爭激烈，會係有風險。但都係嗰句，呢一刻，連最差嘅2022年Q4都只係咁樣，咁嚟緊一、兩季繼續增長嘅機會應該唔細，始終基數都無AT咁大隻。
聲明：以上內容純屬個人意見及分享，並不構成投資、買賣建議或推薦
Credit: CFO講年報
