美團(3690)2022中期業績點評

1. 美團第二季業績，感覺真係做得好好。第一季叫做經營虧損改善緊，第二季係去到好marginal嘅經營虧損，實現真正盈利唔係得個講字。
2. 第二季整體收入有509億，同比增長16%，環比增長10%。本身預咗佢第二季因為四、五月封城影響令到佢收入增長都會有困難，但係無論同比同環比，都有雙位數增幅，超出預期好出色。

3. 整體經營虧損只係得5億人民幣（下同），比起上年同期33億，或者係上季嘅56億，都係有大幅明顯嘅收窄同改善。
4. 就咁睇整體增長動力，收入環比、同比增長，阿里巴巴感覺真係俾人後浪推前浪，因為阿里巴巴今季業績，環比、同比收入都係持平冇增長。
5. 如果睇經營利潤，美團因為近幾年都要搞零售電商嘅新業務，所以一直有重大虧損，有一季甚至季度虧損接近100億（2021年7-9月）。
6. 上季都有成56億虧損，而上年第二季都有33億虧損，而到2022年4-6月嘅今季，虧損大幅減少，只係5億（就算扣番9億嘅匯兌收益呢個非經常性收益，都只係14億虧損），開始轉向嘅跡象，即係今年係有機會做到包埋新業務，整體有經營利潤，呢下就好勁喇。
7. 如果今年得，我都會幾感動，證明王興當初嘅眼光係無錯，執行力都係極高！
8. 再細分業務睇，佢本身核心業務美團點評大眾點評呢啲不嬲都賺好多錢，今季都有增長唔使點講。所以今季佢將美團外賣、到店遊遊合併統稱做“核心本地商業”披露，另外一個就係新業務，所以佢呢個披露嘅調整根本同我一開始講睇美團重點就係睇新業務嘅思維一致。以後每季主力就係望住佢個新業務做成點。

9. 新業務今季虧損68 億，同比上年同期虧損88億，減少23%。而我覺得最令我覺得驚喜嘅係，個經營虧損率以往2021年嘅時候，都係差唔多去到80%以上，去到近兩季就降低到60%以上，而到今季在縮減到48%。

10. 呢個降幅，就係由燒錢燒變成慳錢大逆轉。我之前一直都話「你蝕咁多，我好難可以相信你會轉虧為盈」，到而家佢可以掉轉講，「咁你而家信我係有能力，真係之後可以做到盈利啦。」
11. 嚟緊下半年我諗佢嘅目標首先要整體可唔可以做到經營盈利。但整體經營虧損已經由以往幾十億，降到今季5億，即係由核心舊有業務嘅經營利潤增長，同埋新業務嘅經營虧損大幅下降，令到整體虧損大幅改善。
12. 所以，跟住呢個走勢，嚟緊一、兩季就算整體實現有經營利潤，我覺得並唔係太大驚喜，但市場到時可能會好雀耀。
13. 再下一步就係美團嘅真正挑戰：佢幾時可以真正做到佢個新業務有自己嘅盈利。
14. 理性啲睇，起碼要等2023年。但呢個都係重大不確定嘅嘢，始終而家國內整體經濟都差，個餅唔會短期變大，佢可以改善虧損已經好勁，除非佢可以再搶到多啲阿里巴巴嘅利潤，咁就有機會。
15. 如果2023年做到新業務有經營利潤，咁美團就真係發達啦！
16. 不過唯一擔心就係有陣時疫情嚴峻反而有利佢外賣業務同埋線上零售電商新業務。我覺得第三季疫情仲會係起起伏伏，第四季就大局已定，疫情都應該好似外國咁可以收工。

17. 所以係有啲隱憂如果當2023年，防疫封城不再是主調，會唔會反而令佢外賣生意會差咗呢？（因為外國好多公司都早一步證明咗係咁樣）？所以2023年對美團好關鍵。

聲明：以上內容純屬個人意見及分享，並不構成投資、買賣建議或推薦
Credit: CFO講年報