電視廣播(511) 帶貨瘋炒冇得沽空

本周的股王，非電視廣播(511)莫屬，一場由明星藝員陳豪及陳敏之領銜的直播帶貨，最後做了二千多萬生意，總觀眾數字聲稱有幾百萬人，風頭一時無兩。

整件事由上月底開始，當時TVB宣佈跟淘寶合作，該台藝人將在淘寶帶貨，全年共安排48場直播，首場直播就在本周二舉行，但這事先張揚的消息並沒對股價立即有刺激，頭兩日仲係4蚊樓下徘徊，直至星期五忽然吹雞，暴升五成，最終周二的直播算是非常成功，股價在周三再升85%，短短幾日暴漲兩倍幾。

市場瘋狂炒作今次帶貨商機，究竟最終生意量能否持續暢旺，還是過份憧憬炒過籠，留返畀衝入場的勇者慢慢計。青冰只係覺得整件事甚有美股內meme股影子，不過當中最大的分別，是meme股有得沽空，甚至有相關期權買賣，散戶瘋狂追入後，的確有機會人踩人踩死沽空的基金大戶，反觀本周熱炒的一眾帶貨概念股，除了香港科技探索(1137)外，其餘無一是在港交所的沽空名單。不過其實電視廣播，曾長期在可沽空股票之列，直至港交所在2月公佈將53隻股份於名單中剔除，TVB正是其一，並於2月10日生效，今次瘋炒，某些股民可能慨歎無得沽空，無咗操作機會，但短時間內升幾倍，無得沽空變相亦救返唔少勇士，以免招致巨大損失。

近年TVB被網民長期恥笑及鄙視，股價亦拾級而下，從2021年4月的高位9.86元見頂，跌至去年10月低位2.65元，累跌73%，但翻查證監會定期公佈的未平倉累積沽空數字，在2021年4月時沽空數字只有276萬股，當時約值2293萬元，兩年多以來雖然股價續跌，未平倉沽空數並無明顯增多，只是價值隨股價下跌而變得愈來愈少，直至被港交所剔除出沽空名單前，都係得二百零萬股未平倉沽空，可見大家都係食花生，多於實際操作去獲利。

如果TVB今天仲可以沽空，你估你現價敢唔敢做呢？

聲明：以上內容純屬個人意見及分享，並不構成投資、買賣建議或推薦
Credit: 青冰投資