騰訊(700)2022第二季業績點評

1. 收入1340億，同比上年同期跌3%，衰過爸爸嘅冇升冇跌。毛利579億，同比跌8%、毛利率都由上年同期嘅45.4%下降到43.2%。經營利潤300億，直程下跌43%。
2. 同比收入下降當然最主要係因為廣告收入跌18%。一睇呢啲數據感覺騰訊好差，但係其實呢個情況佢冇surprise the market 。因為佢真係一早講咗，上年第四季業績已經講晒。
3. 遊戲要今年下半年先有啲起色、廣告直程要2023年先好再諗。


4. 其實望返環比上一季，收入雖然都跌咗1%，但係其實毛利率係有進步嘅。由上季嘅42.1%提升到43.2%。
5. 經營盈利潤下跌19%，係因為上季賣咗SEA部份股權而賺咗180億。如果唔計呢啲非經常性發生嘅收益，環比嘅經營利潤升6%。
6. 整體感覺今年冇乜希望㗎啦，但係叫做都顯示到控制成本同埋產生利潤嘅能力呢一季係提升緊。

分析騰訊各業務板塊狀態、預計最新前景：
7. 遊戲板塊俾我嘅感覺都算幾差。無論係本土定係國際，同比上年都係下跌1%。而環比上一季，本土遊戲更加係下跌4%，國際遊戲就上升1%。
8. 國際遊戲同比下跌係因為而家疫情緩和後，遊戲玩家進行線上遊戲時間少咗，但係近呢兩季比較，有少少上升，即係個疫情緩和嘅不利因素，應該消化得七七八八。
9. 但本土遊戲市場就真係令人憂慮，唔係因為未成年遊戲玩家保護措施，因為佔比唔大。真正長遠影響嘅係今季業績新提到嘅兩個因素：
10 一個係新遊戲發佈量減少，呢個係政府唔批咁多俾你，你係完全控制唔到幾時可以改善，真係睇阿爺幾時肯放你一馬。另外一個係遊戲玩家消費都真係減少咗，呢個可能同經濟差有關係。
11. 呢兩個不利因素，都唔係騰訊自己可以控制、短期能夠大幅改善嘅範圍，再加上其實國內遊戲市場佔總遊戲收入75%，咁你就會明白，管理層俾到咗個訊息出嚟：遊戲業務嘅前景比上一、兩季預測嘅時候更差。

12. 至於廣告業務，同比上年大跌18%。呢個都預咗，因為互聯網、金融、教育同時受到監管、經濟差影響，所以呢啲板塊嘅公司落廣告預算大幅減少。
13. 對廣告業務本身今年都無乜希望，但估唔到環比上季竟然有個位4%增長。我諗係因為佢多咗個新廣告模式，例如微信朋友圈多咗啲叫出框式廣告（即係朋友圈大格廣告）、又大力推微訊視頻號（即係喺微訊裏面嘅短視頻）。
14. 我少用微訊朋友圈，所以唔覺得有咩特別，攪短視頻會唔會快手、抖音勁好多？如果佢業績唔提，我都唔會特登去微訊搵視頻號個位。
15. 所以一季輕微改善，唔能夠代表啲乜嘢，因為佢呢啲短視頻啊、出框式廣告都唔係佢嘅強項。
16. 所以我覺得嚟緊呢兩季都係叫苦苦掙扎唔好大跌已經算好，始終整體網落廣告板塊暫時見唔到回穩跡象。

17. 金融科技、企業服務就真係好睇整體宏觀經濟。無論同比、環比都係正負1%，好聽啲叫做好穩定、實際啲都係無乜方法提升。
18. 關於員工人數，好多財經媒體只提今季減少5000幾人。呢個係事實，不過其實佢本身上季有11.6萬，而家減到11.1萬，減幅只係4.5%，如果同比上年同期嘅9.4萬人，其實都多咗成17.5%。
19. 呢啲時勢收入增長乏力，暫時都攪唔清楚前景，cut 員工成本都好正常。而其實佢cut嘅最主要係行政部門人員同埋營銷活動，而研發部門係反而加緊員工成本。

未來減持科網公司嘅趨勢
20. 我覺得騰訊未來係有可能再減持科網公司股權，因為本身佢投呢啲公司嘅目的都係好似風投公司，透過資本操作想喺資本市場賺取回報。
下面係最主要騰訊持有嘅上市公司，唔係100%準，因為呢個世界上除咗騰訊內部真係冇人有最準確嘅資料佢哋揸咗幾多股權投資，但係就可以作為一個參考。

21. 而呢啲股權投資，好多時以成本價入帳，直到佢減持到失去重大影響或者控制權，先至會喺佢帳面反映市價。好似最近嘅京東就賺咗800億，Sea就賺咗180億。
22. 咁佢而家本業增長乏力，而呢啲大手沽貨行為一來可以應付反壟斷監管要求、二來又真係可以提升利潤增長，好大誘因繼續沽。
23. 不過應該唔會好頻密。可能一、兩季一次。因為佢想大批出貨，搵買家、傾價錢條款都係個好複雜嘅過程。沽美團走漏風聲，都唔知係唔係個潛在買家放吓風，壓低個市價再同騰訊傾。

點解成日話騰訊今年都係冇希望？
24. 除咗今年業務增長疲弱之外，仲有一個原因就係基數效應。因為今年2022年啲數同比嘅係2021年嘅數。
25. 2021年頭三季嘅數字，都差唔多係高位，增張點都會有個盡頭，更何況喺環境咁差嘅2022年。
26. 但係環比上一季數，雖然都係苦苦掙扎，但相對都叫做係持平。即係好似已經見到個低位咁。
27. 所以去到2023年，佢業績嘅同比數就係2022年嘅數，2022年做得差，咁2023年同比增長就有希望啦。
28. 感覺就好似洗太平地咁樣，捱一年寄望下年啲數因為基數效應開始有番增長。

第三季展望
29. 所以亦都係因為基數效應，展望嚟緊第三季業績，大數總收入都幾乎可以預咗同比跌幅會再差啲。
30. 因為大家要知道2021年第三季，即係七至九月總收入有1424億，係仲要好過2021年第二季，即係四至六月嘅1384億。
31. 2022年第二季同比2021年第二季都要下跌，而2022年第三季預咗同2022第二季比較都唔會有太大起色，所以當今年第三季出業績嗰陣時，如果你見到財經新聞標題話騰訊第三季同比跌幅擴大，唔需要覺得意外。
32. 業績後騰訊股價好似有啲回升跡象，但係我嘅睇法都係上上落落走波幅。有一樣嘢可以肯定嘅就係佢嘅股價係十分之波動，因為業績基本面做得唔好，所以呢一刻，市場對佢嘅信心會係好脆弱，一有少少負面消息可能就會轉向。

聲明：以上內容純屬個人意見及分享，並不構成投資、買賣建議或推薦
Credit: CFO講年報