阿里巴巴(9988)2022第二季業績點評
1. 要分析巴巴最新業績狀態，先睇管理層近兩季嘅說法、再睇一啲梳理好嘅數字，就會好有感覺。
2. 2022年1-3月業績關鍵字眼係：「我們在戰略性領域的持續投入，正展現出積極的增長勢頭。」
3. 一季後…..2022年4-6月業績：
「始終聚焦長期戰略」；「進入六月已經看到向好跡象」；
「對未來長期增長充滿信心」；
「通過持續改善運營效率，更專注優化成本，業務虧損收窄。」
管理層心理
4. 佢地劈頭業績第一段就用：「始終聚焦長期戰略」、「六月已經看到向好跡象」、「對未來長期增長充滿信心」、「收入同比表現穩健」，完全感覺到佢地無乜信心業績短期可以有大幅、明顯改善。
5. 明明而家都8月，但就只講6月睇到向好跡象，但就唔提7月情況。就算今季好過上季，佢地都無大肆宣揚嘅感覺。
6. 即係反映緊佢地對嚟緊一、兩季可以持續增長，都唔係好樂觀。可能佢地睇到自身業務近況走勢疲弱、又可能睇到國內經濟好差。
7. 上季仲講緊「持續投入」係要建立「積極增長勢頭」，但今季目標已轉到「虧損收窄」。
8. 佢地唔敢講得太樂觀，感覺因為佢地都驚下季又會差番、到時更加無得賴防疫封城。所以我地都係要有心理準備，巴巴短期幾季業績不會有太大驚喜。
業績數據
9. 阿里巴巴今季（4-6月）整體收入2056億，同比上年同期2057億幾乎冇分別。
10. 而經營利潤就由上年同期嘅308億，減少19%至249億。經營利潤率都由15%降至12%。
11. 純利更加係由428億，下降到203億下降幅度係53%。
12. 純利跌咁多又唔使太擔心，因為係最主要係佢嘅投資及利息收益，由上年同期嘅140億減少到53億，足足減少咗約90億。
13. 正常科網股海內外都股價弱勢，所以佢蝕好多，畢菲特都係，所以唔怪得巴巴。
14. 如果睇返環比上季1-3月數字，總收入有2041億、經營利潤有167億，經營利潤率8%。
15. 即係環比上季表現，今季無論係收入同經營利潤、利潤率都有增長。
16. 仲要係考慮到今季4-6月，國內經濟受到疫情封城嘅影響，4月同5月嘅零售生意都係慘淡，所以還比數字我覺得係反映緊巴巴嘅總體業務喺今年第二季係有明顯改善。
17. 經營利潤率 8% 係藏咗一個非經營性、非經常性、因股份支付嘅估值問題而產生左一個負數嘅費用，即係係收入，有130億。
18. 如果撇除呢個因素影響，即係上季經營利潤就只得37億（167-130），咁佢上季嘅實際經營利潤率只係得1.8.%。
19. 所以我覺得比起上一季，佢今季嘅營運效益效率整體上係有明顯改善，或者話上季真係好差好差。而最主要原因係今個季度成本節流加強咗好多，巴巴都要面對現實。
20. 深入啲睇業務情況，網上電商零售有一個奇怪現象：服務電商收入同比上年跌10%，直營電商收入同比上年升8%，總體同比跌2%。
21. 服務電商即係淘寶、天貓呢啲只連接商家同買家，巴巴自己唔入貨嘅服務型電商平台，直營電商即係係盒馬、高鑫零售呢啲巴巴自己入貨嘅平台。
22. 如果環比上季，啱啱掉轉，服務電商升13.9%、直營電商跌10.7%，總體環比都係跌2.4%。呢個現象我估係巴巴內部資源調配問題？唔肯定。
23. 但點都好，呢個佔巴巴成個集團收入60%、70%嘅核心零售電商業務，無論同比定係環比，都係下跌，始終未重拾動力。
24. 同時管理層繼續管理緊市場預期，需要更長時間去回復強勁增長。所以點解我一開始講，呢一刻，我仲係唔會睇好巴巴。
25. 另外，直營電商相對要有存貨風險，毛利率比服務電商低。而巴巴近年嘅策略，係要搶佔多啲直營電商嘅市佔，所以長遠，巴巴整體利潤會提升，但整體利潤率可能會慢慢下降。
雲業務
26. 一個市場憧憬嘅增長點，雲業務，今季同比上年同期係有10%增長，喺失去左抖音呢個大客之下竟然都有雙位數增長，算唔錯。
27. 但如果環比上一季，雲業務收入係跌6.8%。上季已經開始無抖音，所以跌；今季再跌，即係唔係單一原因，而係整體雲業務都係無乜增長動力。
28. 佢業績有提，雲業務同比增長10%係因為非互聯網企業客戶嘅需求同比上年提升，部份被互聯網企業客戶需求下跌所抵消。
29. 而我覺得呢個情況亦都說明咗，實際上同比增長係因為比較一年前巴巴積極開發非互聯網企業客戶市場，所以同比有增長都係正常嘅。
30. 但係當你拉返近少少，睇環比數來衡量佢雲業務收入嘅最新增長動力，竟然係下跌6.8%。互聯網客戶一定係弱㗎喇，但係非互聯網客戶嘅收入，增長動力都唔強喎，整體環比要跌已經說明咗。
31. 所以雲業務今季整體都係保持唔上唔落、無乜作為嘅狀態。
總結
32. 整體嘅利潤率，今季好過上季，係有一個改善嘅跡象。
33. 考慮到佢4、5月係經營環境非常困難，所以寄望佢7-9月，喺冇呢個疫情封城嘅負面因素干擾之下，應該會做得更加好。
34. 但又係嗰句，管理層無大肆宣揚嚟緊會好好多，即係有機會嚟緊都做得麻麻地。
35. 始終經營環境或者經營能力冇全面改善嘅跡象，都係嗰種某啲業務有增長、某啲業務有下降、拉上補下，最終做咗一個冇下跌亦都冇增長嘅總收入。
36. 之後睇埋京東、美團就會更加睇到巴巴嘅業績情況係自身問題定係行業問題。
聲明：以上內容純屬個人意見及分享，並不構成投資、買賣建議或推薦
Credit: CFO講年報
