領展(823)發表供股後第一份業績，利息成本是關鍵因素

領展前景要睇可分派金額增長

1. 領展2023財年（2022年4月至2023年3月）業績，總收入港幣（下同）122億，同比升5.4%，其實係上市以嚟新高。但扣完經營費用後，可分派總額63億，同比跌咗1.68%。
2. 如果計每基金單位分派（即係每股股息），得HK$2.74，跌咗10%；而如果只計供股後末期分派，每股係HK$1.19，同比更係跌18.7%。
3. 呢個應該係今次業績表面最eye catching位，唔知係唔係呢樣嘢，定剩住大市跌勢，股價當日插到落45蚊。

以5供1 供股攤簿效應

4. 假設可分派總額（份子）上年係HK$100，跌1.68%，即係今年HK$98.32；發行股數（份母）上年係100股，因為供股增加20%（5供1），供股後會變120股。
5. 所以上年每股分派係HK$100/100股= HK$1；今年係HK$98.32/120股= HK$0.82；同比跌幅就係（HK$1-HK$0.82）/HK$1=18%，就係上面實際跌幅嘅絕大部份原因。現有股東如果有參與供股，就唔會受呢部份攤簿影響
6. 而2023年度跌1.68%可分派總額，如果撇除2022年來自無guarantee嘅酌情分派1.5億後，其實同比係持平（升0.6%），而且63億係上市以嚟最高，所以表現叫做不過不失。
7. 你可能會諗：持平都已經令人失望，佢明明收入都有5%增長，反而可分派金額得0.6%增長，即係費用增長多好多，下年會唔會更差？

業績平穩，主要受利息成本影響

8. 其實佢收入有5%增長嘅同時，一般經營費用今年同比係跌3.6%，表代經營效率提升咗唔少。
9. 最大問題係佢財務費用有成1.8億，同比竟然增長75%，佔比收入14%。呢個數，2022年只係1億，佔比收入係8.7%；2020年同2021年分別只係6.3億、7.7億，佔比6%-7%。
10. 呢個先係佢整體經營效率提升之下，可分派金額只能同上年無酌情分派睇齊嘅主因。

財務費用急升原因

11. 呢個當然同美國加息有關：領展借款600幾億，有53%係港元借款。而港元借款實質利率2023年係3.51%，同2022年嘅2.21%比足足升咗59%。
12. 港息升就係因為美息喺過去一年升咗好多，咁當然港息會慢過美息升嘅時間。
13. 上次講，供股令股東唔順氣，但佢用咗供股188億嘅其中92億還借款，喺佢總借款平均實質利率3%左右嘅情況下，2024年財年可以幫佢慳到差唔多3億財務成本。
14. 3億係咩概念？如果2023年嘅可分派多3億，即係66億，同比增長就會有5%。

經營情況無問題

15. 其實有冇留意，喺財務成本離譜地高嘅年度，佢嘅可分派總額（已扣除財務成本），再加無酌情分派嘅掩護下，醜醜地都叫上市以嚟新高。
16. 如果唔計利息成本，佢整體經營效率係比疫情前仲要好，因為疫情前嘅2019年，費用佔比係38%，而2023年係34%，但收入比當年升咗22%。

利息成本最關鍵

17. 當然實質上無得唔計財務成本，而佢本身嘅借款規模的確大咗好多，2020年到2023年由300億升到600億，一個double。
18. 咁呢個都係市場一直片佢地管理層衝出香港亂買嘢洗大咗，而另一個重點係佢地估唔到美國一係唔加息，一加就由2022年3月開始累計加咗十次息，總共升咗5%。
19. 所以佢地供完今次股咋咋林先還92億，而且喺業績度confirm 市場：一年內都唔會再需要融資。
20. 即係如果以而家利率水平去睇2024財年，因為實質我無breakdown計唔準，但佢嘅財務費用起碼唔會再大幅增長，可能有些微減少都唔出奇。
21. 咁呢個就係imply 緊2024財年，佢可分派總額比2023年起碼唔會明顯減少，樂觀啲或者會比今年升幅（0.6%）多。所以以現價計嘅yield，下年都係可以維持嘅機會好大。
22. 呢個市場大概都計到數，但呢個就係佢地不滿嘅地方，因為利息成本高踞不下，令領展派息好難有明顯增長。
23. 呢個就係佢嘅最大隱憂，但短期唔會可以解決，一來美國嗰邊短期一係就keep住而家個息率，一係就可能會再加少少（因為就業市場做得好好）；二來佢自己借貸規模都好難短時間內再縮細。
24. 所以實際上計，2024年要維持而家個yield，好方面諗，相當穩陣，壞方面諗就係無增長。

結論

25. 所以如果真係想部署領展嘅，一年隱陣收息加穩定yield無題不大，股價可能時有波動。
26. 但想要股價可以有所作為，就要再等一段時間，等到美國嗰邊似有跡象減息（當然我覺得2023年內機會唔大，除非有出乎意料嘅大獲嘢爆煲。）
27. 因為當利率下調，會直接影響佢嘅財務成本，財務成本減少又好直接會增加佢嘅實質可分派金額，咁市場又係好容易計到數，咁股價就會有正面刺激，不過可能要2024年。