解讀Apple 2022Q4業績：強美元因素創歷史最佳業績

業績：單季vs全年

1. 單睇第4財季，收入901億，同比升8%， 其中產品升9%、服務升5%，由產品帶動整體收入。毛利率42%，同比持平。經營利潤率好穩定，有27.6%，同比少於1%差距。
2. 如果睇2022全年財政年度業績（2021年10-12月+2022年1-9月）收入3943億，同比都係升8%，但產品升6%、服務升14%，即係全年係服務帶動整體銷售收入。
3. 全年毛利率43.3%，比2021年嘅41.8%係明顯有所提升。無論產品同服務嘅毛利率都有升，無話邊個拉起邊個，其實係好冇效率！經營利潤率都好穩定，30.29%，同上年29.93%有少少進步。
4. 全年數其實係更準確反映蘋果業務催勢，就係硬件銷售漸漸飽和，而真正嘅增長動力係轉移緊去服務收入。

第4財季硬件表現更好，因為季節性嘅扭曲

5. 當被問到點解喺強美元同宏觀經濟疲弱嘅情況之下，MacBook仲可以創歷史高位？Tim Cook清析地答咗，首先係今季推出安裝咗M2晶片嘅MacBook Air同 MacBook Pro。
6. 其次，係有部份係對上一個季度（4-6月）訂單，因為供應鏈問題，當時未能交付，所以推到落7-9月季度。睇落都幾誠實，唔係單純吹話佢哋嘅Mac機呢一季度大受歡迎，而係一季賣咗兩季嘢。
7. 當一季賣咗兩季嘢，咁MacBook收入歷史新高，又變得無咁可喜可賀啦。醒目嘅分析員當然會問：咁增幅有幾多係推新機造成，有幾多係賣上季訂單造成？管理層就答佔比都一樣。
8. 但當同一時間，管理層好斬釘截鐵咁講下一季MacBook銷售收入一定跌，仲要係substantially decline嘅時候，你就會心中有個底，今季嘅歷史新高係咩原因。
9. iPad收入同比下跌13%，主要原因都係因為推出時間點兩年唔同。即係上年係9月推出新iPad，但今年係10月先出，所以下一季iPad銷售就應該會做得好啲。
10. 同一道理，下季嘅iPhone 收入都會強，因為iPhone 14喺9月推出，10-12月先真正全面反應個效果。所以睇蘋果硬件收入，睇全年數會更客觀，即係增長6%，疲弱當中。
11. 而服務收入無乜季節性影響，所以第4財季得5%增長，真係代表呢一刻佢嘅服務收入好弱，因為上年同期有成26%增長。因為宏觀經濟差，online advertising同遊戲都疲弱。

盈利能力依然保持到

12. 自從2018年開始，蘋果毛利率係年年都仲升緊，就算係喺今年嘅強美元環境之下。由2019至2022，分別係37.8%、38.2%、41.8%同43.3%。
13. 冇錯，美元強，所有海外收入轉換成美元時，都會轉少咗。但同一時間，佢哋海外業務成本，轉換成美元時，都係會減少，某程度上係會抵消咗收入減少嘅影響。
14. 所以收入因為強美元而減少嘅同時，毛利或者毛利率係相對影響無咁大。但Netflix 就做唔到呢個效果，因為佢地話佢地主要成本係美元計價，管理不善。
15. 而蘋果原材料供應、組裝生產線都喺中國同東南亞，所以成本會因為強美元而降低。同時，佢都有做外幣對沖，尤其是人民幣，從而大大縮減匯率波動對業績影響。呢樣嘢絕對係佢喺而定強美元時代嘅競爭優勢。

蘋果業績睇出芯片業嚟緊需求疲弱

16. CEOTim Cook 今次第一次提到：「silicon-related supply constraint is not significant」，再加上數字上蘋果又真係已經連續三季都係存貨水平減少，而整個2022財年，亦係自2018財年後，再次出現全年存貨水平減少。
17. 呢個說明嚟緊嘅芯片訂單策略唔會好似上年咁進取，因為佢地已入夠哂晶片貨，而家要去庫存，即係TSM呢兩季成日講嘅inventory adjustment。
18. 即係之前落得太多芯片訂單，而家唔單只夠用，可能未來幾季都無咁快俾iPhone生產需求消耗哂。所以調返轉TSM嚟緊嘅銷售都係疲弱，同TSM所講起碼要2023下半年先有起色嘅說法一致。
下季業績表現唔好寄望太高
19. 管理層對下一季（10-12月），亦即係佢2023財政年度嘅第一季，預期收入會有增長，但係應該好微薄，一定低過今季8%，我估可能會低過5%。
20. 因為2021年同期表現強勁，創左所有季度收入新高嘅1239億，所以下季只要有1蚊增長都會再創歷史，所以唔容易。
21. 另外，強美元會斷續大大削弱收入增長幅度，起碼有-10%影響。而MacBook 收入會有明顯嘅下跌(substantial decline)，原因上面講咗。
22. 利好嘅iPhone 14係喺2022年9月推出，即係真正達到銷售高峰嘅係2022年嘅10至12月嘅下季。
23. 服務收入可持平或者減少，呢個係我估，佢無講。因為今季已經得5%增長，稍有差池就會倒推。一來宏觀經濟差，二來匯率影響。
24. 毛利率同經營利率，應該都係相當穩定，因為蘋果管理層嘅經營效率真係長期保持穩定。
25. 管理層係喺10月27日作出上面指引；呢一刻喺鄭州發生嘅富士康工人疫情逃忙事件。
26. 新聞話富士康鄭州廠佔蘋果iPhone產量50%，要睇事態發展，先會知會唔會影響蘋果下季嘅供貨。
27. 可以肯定嘅一點係，管理層喺作出上述嘅指引時，係仲未考慮或知道鄭州事件。

結論

28. 智能手機市場係有飽和，但佢逆市下都做到接近雙位數增長，證明佢喺行業有好大競爭優勢。
29. 高效管理同盈利能力、用戶IOS使用慣性都係佢依然存在嘅優勢，平價手機蠶食低端手機市場，令佢喺硬件業務上仲可以有個位數增長空間。
30. 但睇長遠增長，就一定係要著墨喺服務收入度，呢一刻疲弱嘅宏觀經濟係一個hurdle，長遠就有待觀察。
31. 好個人嘅感覺，睇咁多間美股公司，蘋果嘅經營管理比到我嘅感覺真係好有水準，所以我傾向佢服務方面長遠增長都係樂觀。

聲明：以上內容純屬個人意見及分享，並不構成投資、買賣建議或推薦
Credit: CFO講年報