解讀Google 2022Q3業績：經營利潤開始倒退

Google 2022 Q3業績重點

1. 收入691億（美元，下同），同比上年增長6%，環比上季開始見負數，跌1%。管理層解釋最主要係2021年有lapping，其次係advertiser pull back budget。
2. 研發費同市場營銷費，同比分別都大幅上升34%同26%；環比上季就同時升4%。管理層解釋最主要係headcount增加咗好多去做研發同業務推廣。
3. 收入增長疲弱，費用大幅增加，個結果當然係一如預料，經營利潤同比下跌18.5%，環比上一季都要跌11.9%。
4. 經營利潤率得24.8%，無論比較上季嘅27.9%或者上年Q3嘅32.3%，都係有明顯下跌。
5. 經營利潤下跌主因當然係Google Services（主力係廣告業務），因為Google Services經營利潤大跌17.5%。
6. 因為其他雲業務、Other bets 燒錢嘢，本身都係蝕緊錢，兩個加埋都只佔總業務10%。

管理層解釋嘅盲點

7. Lapping，之前講過，因為2021年嘅時候，疫情緩和令當時收入增長反彈強勁，基數變大，所以2022年同比增長就相對弱好多。
8. Pull back 其實就係人地落廣告budget少咗， 即係係需求減弱。
9. 無論係咩原因，最客觀嘅效果係收入增長放緩。但重點係你要解釋點解會睇到最大影響係lapping而唔係pull back?

10. 當然管理層無詳細講點解，但佢地喺業績會度就經常有意無意都將收入增長放緩主因賴落lapping度，由Q1講到Q3，疫情影響，好使好用，因為唔關佢地嘅經營事。
11. 仲有，同比上年你話lapping都算啦，咁上季Q2明明都係lapping嘅受害者，今季收入下跌，你又賴上季都係有lapping，咁就說不過去啦。
12. 就當所有嘢係lapping，咁點解費用又無跟住增幅放緩?反而增幅擴大。因為請多咗人， 咁其實季季都話lapping，但季季都係咁增加人手。
13. 所以Morgan Stanely分析師都忍唔住問：管理層係用乜嘢K P I去支持佢哋由上年開始大量增加人手嘅決定？同埋增加人手有無令投資者增加回報？
14. 經營利潤都跌緊，點樣增加回報？即係擺明串管理層呢幾季，尤其是今季收入增長疲弱，但費用都仲要大幅增長去增加人手，你地之前究竟有無計好數？
15. 管理層見勢色唔對，又強調番佢地話嚟緊Q4 headcount 上升嘅速度會大幅回落、2023年就會cut 人手。但又不忙強調人才最緊要。
16. 你會俾我覺得一係仲有其他原因令費用大增，一係真係上年開始你地就睇錯哂個市場前景，要一年內由大幅增加人手到要cut人。

結論

17. 收入下跌可以係因為同比基數大、lapping，但pull back一定都佔好大影響，因為而家整體macro climate is challenging，online adverting 感覺需求相對弱。
18. 同埋我覺得費用增加唔會只係因為人手增加咁無規劃，反而我會覺得係經營環境開始困難，佢地想保住個收入就要用更多嘅錢去做marketing，同時又要提供更多嘅google services俾用家。
19. 所以點解經營利潤率一直下跌，代表緊生意難做。
20. 而嚟緊嘅Q4、2023年開始減人手，就係真正節約成本嘅開始，因為管理層自己都睇唔清個前境。
21. 就正如另一個分析師問CEO：其實你喺公司都服務咗好耐，以往亦都見過類似增幅放緩嘅cycles，同今次比較有咩唔同？
22. CEO只能夠講there is more uncertainty as we go through。即係其實佢地都覺得google前景都仲係好難預測，因為本身廣告業務放緩，宏觀經濟不確定。

23. 至少喺嚟緊Q4收入應該都會同比、環比都下跌，而整體經營利潤同比都一定下跌，環比就睇佢可唔可以控制到成本好啲。

聲明：以上內容純屬個人意見及分享，並不構成投資、買賣建議或推薦
Credit: CFO講年報