蘋果(AAPL)迎來穩定及具持續性的業績
蘋果(AAPL)業績重點
- 硬件銷售跌4.4%、iPhone 銷售跌2.5%
- 服務收入連續兩季創歷史高212億升8%
- 新興市場iPhone 銷售強勁、創季度收入高位
- 毛利364億升1.5%、毛利率44.5%創季度歷史新高
- 股價績後兩日累跌超過5%
1. 蘋果2023年4-6月季績，iPhone銷售跌、總收跌，股價績後跌。但唔使荒，我覺得蘋果依然係最穩陣嗰隻。今時今日唔只關注iPhone 銷量，而係要睇到佢硬變軟嘅軌跡。
2. 蘋果前景重點三樣嘢：1）硬件銷售、2）服務業務、3）新興市場。要記住而家唔係少咗人用iPhone，而係少咁啲人買新iPhone。用iPhone嘅人每日除咗訓覺無時無刻都用緊部iPhone。
硬件銷售北美市場飽和
3. 蘋果2023年4-6月季度，硬件銷售606億跌4.4%，其中iPhone 銷售397億跌2.5%、iPad跌得最甘成20%。
4. 除咗每年10-12月季度新iPhone旺季外，蘋果其他季度硬件銷售無乜增長其實市場預咗。
5. 一來智能手機市場疲弱，二來iPhone賣得貴，如果唔洗每年換新款機，可以用好耐。所以最成熟北美市場，銷量持續倒退。
蘋果iPhone喺非主力新興市場，近兩季都做得好好
6. 上季度（1-3月），墨西哥、印尼、菲律賓、沙地、土耳其同阿聯猶收入都創歷史新高；巴西、馬來西亞、印度就創3月季度新高。
7. 而今季受iPhone 銷售強勁帶動，印度、印尼、墨西哥、菲律賓、波蘭、沙地、土耳其、阿聯猶，收入創6月季度新高；非新興市場法國、荷蘭、奧地利都創6月季度新高。
8. 中國市場今季收入都由上季同比跌3%，回復增長到升8%。而且整體轉會人數（由Android 轉IOS）都創咗4-6月季度新高。
9. 種種跡象都說明，智能手機市場低迷最要擔心係喺新興市佔優嘅小米、Samsung，因為蘋果踩場越踩越深。除非全世界都唔用智能手機，咁就真係驚 。
服務業務
10. 服務收入212億，增長8%，係連續兩季創歷史新高。硬件銷售下跌下，但整體毛利、毛利率都升，就係因為有70%毛利率嘅服務業務再創新高帶動。
11. 令整體毛利去到364億升1.4%、毛利率44.5%更係6月季度歷史新高。而服務收入26%嘅創新高佔比總收入，亦係僅次於佔比48%嘅iphone收入，成為蘋果第二大收入來源。
12. 但服務業務最大優勢係佢70%嘅極高毛利率。唔計iPhone，將其他硬件產品（iPaid、Mac、可穿帶）加埋一齊，今季收入係209億，以硬件毛利率35%計毛利約73億。
13. 服務收入212億，已經超越其他硬件銷售總和，而佢嘅148億毛利，都足足係其他硬件毛利嘅2倍。
14. 服務收入表現強勁唔係一、兩樣服務種類做得好，而係全部都做得好：
「We had all-time records in cloud, in video, in AppleCare, in payments and June quarter records in App Store, advertising and Music」
15. 服務毛利率係70.5%，點解咁高，講過好多次，服務唔係無本生利，但邊際成本好低。即無serve 1 個客同 serve 一萬個客，可能成本都差唔多。而且服務無硬件產品淡旺季之分，更穩定增長。
16. 我覺得服務收入唔會一季半季爆升，但就慢慢慢慢創新高，因為個勢似係越嚟越多人用越嚟越多服務。
蘋果潛在增長在於服務業務嘅IOS生態系統概念
17. 呢個生態系統其實係一個虛擬經濟圈，建基於10億付費用戶、20億活躍IOS硬件用戶（包埋10億付費）。
18. 呢啲用戶流量建基於多年蘋果用戶，真金白銀對蘋果產品嘅購買量，所以忠誠度極高，唔係求其免費注冊個account。
19. 亦都係蘋果一直堅持硬件、軟件兩樣都自家製嘅成果，講咗好多次，用慣咗 Android 可以轉唔同品牌Android 機，但用慣咗IOS就好難返轉頭，呢個係最強護城河！
20. 你入咗嚟，我地慢慢服侍你
「I would say the biggest opportunity is that we know that there's a lot of customers that we have that are very familiar with our ecosystem. They are engaged in the ecosystem. But still today, they're using only the portion of the ecosystem that is free.」
「And so we think that by offering better content and more content over time, we're going to be able to attract more of them as paid customers.」
21. 俾多啲服務內，其實真係唔使要好創新，但要方便、日常生活用緊嘅嘢搬去IOS度，唔使要急，後發先至。
22. 212億季度服務收入，除開10億付費用戶，平均每人每季21.2美元、160蚊港紙，即係一個月50蚊左右。
23. 唔係好多錢，只要你繼續俾啲簡單、已經成熟嘅服務，但擺喺IOS度。每季加多2、3蚊美元（新服務+新付費用戶），服務收入已經可以有雙位數增長。
24. High-yield saving account 已經有100億存款，呢個係蘋果最新服務，其實又係舊概念。只不過擺咗入IOS度（後面咪又係擺落銀行Goldman Sachs度），但又免卻你多一樣煩嘢， 一個iPhone 攪掂。
25. 唔同Netflix訂閱之後賺錢過程就完咗，蘋果賣咗硬件先賺咗一筆。因為IOS你唔會咁易走，於是就喺IOS呢個平台，慢慢再推各種服務去賺你第二筆錢、第三筆錢。
26. 你而家可能會睇到，Android平台服務係Google賺，Android機係Samsung、小米賺。但IOS平台服務同iPhone都係蘋果賺哂。
蘋果唔出下季指引，但業績會有透露方向
27. 嚟緊7-9月季度，iPhone銷售將會上升、服務收入都會上升；但iPad、Mac銷售會雙位數下跌；毛利率同今季持平。
28. iPad 、Mac收入下季會雙位數下跌，因為上年6月季度停產，銷售延期到上年九月季度，所以今年九月季度無呢樣突發性shift，導致同比上年會下跌。
29. 服務增長趨勢持續強勁係用戶Enagement
「We think the situation will continue to improve as we go through September. And that's very positive because not only good for the financial results, but obviously, it shows a high level of engagement of our customers in the ecosystem, which is very important for us]
30. iPhone 睇管層說法，北美市場iPhone低迷可能未見底，但歐洲、新興市場，中國都樂觀。所以iPhone銷售都係要等10-12月季度旺季。
關於GEN AI
31. 我上次都有講：CEO Tim嘅說法令我覺得最實在:「Generative AI對蘋果非常重要，幾乎每樣蘋果產品都可以涉及Gen AI」
「And as you know, we tend to announce things as they come to market, and that's our MO, and I'd like to stick to that.」
32. 可能你會覺得佢未ready好，但經過今輪業績期，有邊間可以好實在見到GEN AI所貢獻嘅收入？無。
33. 間間都係好積極、主動講GEN AI，但一問到細數有無嘢睇？即刻就會話呢啲講長遠、仲需要不斷投入資源資本，我又會諗到Nvidia最著數。
34. 講得多反而令我覺得佢地急、驚人地唔記得佢地有GEN AI 概念，自然洗錢開發AI都會急。蘋果唔多講，反而令我覺得佢地係最有信心嘅一間，更加穩陣實在地發展，唔需要急住講啲未有嘅嘢。
總結
35. 講真，今季業績數、趨勢變化同上季核心重點分別不大：唔靠Gen AI，硬件積極打新興市場，服務業務就坐定粒六創新高。
36. 如果你上季蘋果業績分析文都有睇，可能你都開始上腦、識背，但就係呢種持續性，先更令你對佢核心價值有信心同有實在感，更堅定踏實安心長揸。
37. 點解股神buy佢？除咗係佢產品、服務深入用戶生活每一個角落，IOS護城河好深外，仲要係佢嗰種處變不驚嘅穩陣作風。
38. 高科技嘢佢會攪但唔急推，一步步，唔燒大錢但後發先至。朱克伯格嘅Reality Lab元宇宙可能最終真係有料到，但實在念得太遠，無理過用戶感受同適應力，一廂情願要將人從現實帶到虛擬。
39. 但蘋果Vision Pro玩AR，又係玩簡化、退一步，做虛擬同現實結合概念，更加容易令人接受，賣得超貴，係因為佢都根本未量產。
40. 股價績後跌咗5%？今年智能手機銷售疲弱嘅市況下股價都創歷史新高，回調一吓、抖一抖好正常啫！
41. 當然又係嗰句：短期股價無人估得準，跌咗可以再跌。可能過完今輪業績之後七大科技股升勢冇上半年咁強勁，始終上半年升得太多。
42. 但相對嚟講，佢係最可以令你實實在在（你自己用緊）、簡單容易睇到（唔會講好多你未必識嘅AI科技名詞），睇到佢嘅長遠增長價值，同埋長期持續穩定經營作風嘅一間公司。
