解讀Amazon 2022Q3業績：唔合理、不可思議

1. 上星期Amazon Q3業績，不符市場預期，股價下跌13%；相同情況4月都出現過，股價嗰時跌14%。當時PE 55倍，已經覺得好貴，而家PE係升到82倍，當然，PE升最最主要係個份母E跌得好離譜。
2. META嗰啲係低業務能力，所以低估值，已price in；但因AMZN係高估值、低業務能力，我覺得未完全price in。

其實Amazon係受惠強美元

3. Q3總收入1271億 （美元下同），同比升15%，撇除強美元因素，升19%；經營利潤得25億，跌48%，如果撇除強美元因素跌55%。
4. 強美元令外幣收入轉美元時會減少，但同時，外幣費用轉美元時都會減少，係會幫補番個經營利潤。
5. 所以，當科網股成日話業務受強美元負面影響，但其實睇經營利潤，Amazon係受惠於強美元，計匯率跌48%，唔計跌55%。
6. 因為強美元，費用減少幅度仲大過收入減少幅度，亦都說明，唔計匯率因素，佢業務係做得仲差。

經營電商嘅困難

7. 三大業務中北美電商收入788億，同比升20.3%、國際電商收入277億，同比跌4.9%。雲業務AWS有205億收入，同比升27.5%。
8. 北美電商經營虧損4億、國際電商經營虧損25億，AWS有經營利潤54億。即係話，唔做電商，只做雲業務其實賺得仲多。
9. 北美、國際電商分別已經連續4個、5個季度有經營虧損。就算退到去4、5季前，當北美、國際電商有經營利潤時，個經營利潤率都係得幾個%，利潤非常微薄。
10. 所以你一見到point 3講收入1271億，經營利潤 25億，唔知你有冇感覺個利潤率好低，得2%。由始至於，Amazon電商業務規模好大，每季千零億收入，但經營利潤就得嗰10零、20億。做得大，做得辛苦。利潤微薄，一季半季一個唔小心，失預算，就好容就會有虧損。
11. 點解？佢貨品種類太多，要預測市場方向而備貨，成本先定。之後如果銷售唔理想，即係唔小心預錯貨，成本好難再調整，就好易會有虧損。

而家嘅狀態有幾差？

12. 今季經營利潤25億，仲低過2018年Q3嘅37億，但當時收入只係566億，今季呢？
13. 即係收入多咗一倍幾，經營利潤反而仲少咗，利潤率呢？當年係5.4%， 而家2%。其實當年都唔係高。
14. 今季費用增長都誇張，雲業務相關嘅 Technology & Content 今季升35%，你可以話因為雲業務仲增長緊（雖然收入得27%增長，係少過費用增長）。但市場營銷費同行政費分別升38%及42%。
15. 原因？人工貴咗、做多咗推廣。做得咁辛苦，但整體收入都只係得15%增長，好明顯係經營越嚟越困難，感覺佢受惠唔到越做越大而產生嘅規模效應，真係不解。
16. 今季已經連續第4季係負自由現金流，主因雲業務基建同電商物流嘅投資每季要500億以上。即係呢4季現金流都唔夠派息、回購回饋股東或者還債。

17. 以前正數自由現金流，係因為經營現金流都仲頂得住，但近幾季，經營現金流持續減少（因為利潤持續減少），cover唔哂投資性現金流出，而投資性現金流出本身又減唔到，所以變負數。

18. 即係投資性支出，係諗住做大業務，產生更多經營現金流。但實況係季季500億投資支出，睇唔出好大效益。我搵到去2017年，除咗呢幾季，其實都係無見過有負自由現金流，可見而家狀態有幾差。

美股科網股估值比較，你會更有感覺

19. 蘋果同季收入901億，增長10%，經營利潤249億，增長5%，利潤率 28.5%， PE 22倍，PEG係1.75倍。
20. Google同季收入697億，增長12.6%， 經營利潤195億，冇升冇跌，利潤率27.9%，PE 17倍，PEG係1.62倍。
21. 微軟同季收入501億，增長11%， 經營利潤215億，增長6%，利潤率43%，PE 23倍，PEG係2.13倍。
22. Tesla 同季收入215億，增長56%， 經營利潤37億，增長84%，利潤率17.2%，PE 66倍，PEG係1.83倍。
23. Netflix 同季收入79億，增長5.9%， 經營利潤15億，跌13%，利潤率19.3%，PE 25倍，PEG係1.3倍。
24. Meta同季收入277億，下跌4%， 經營利潤56億，跌46%，利潤率20%，PE 8倍，PEG係1.24倍。
25. Amazon收入1271億，增長15%，經營利潤得25億，跌48%，利潤率2%，但PE竟然有82倍，PEG係7.28倍。
26. PE係股價除歷史利潤，PEG個G係growth，係股價除以考慮咗預期增長嘅未來利潤，即係P/(ExG)。所以通常PEG會細過PE， 無論係80倍PE 定係7.28倍PEG，Amazon 比其他big tech都高出好多。咁突出，但…..賣點係咩？

Amazon雲業務又係唔係好強勁呢？

27. 你可能話市場睇重嘅唔係佢電商業務，而係雲業務AWS。因為AWS係全球行業務龍頭，有壟斷性地位，市場會俾高估值佢，覺得佢雲業務未來可能仲有好大增長空間。
28. 我唔識太技術性的雲技術，咁我只好客觀地攞佢唯一可匹敵嘅競爭對手，微軟雲業務Azure去比較一下。
29. 用2022年7至9月同季比較，AWS 收入205億、Azure收入203億，大家差唔多啦。收入升幅，AWS係27.5%，Azure 係20.2%。增長動力，AWS勝一籌。
30. 經營利潤方面，AWS做到54億，經營利潤率26.3%； Azure有 90億，經營利潤率44.2%。
31. 你好容易睇到，業務規模上，其實AWS同Azure係差唔多，但一去到利潤，完全唔係Azure對手。Azure個盈利能力，高過AWS差唔多67%。
32. 你可能話AWS感覺增長動力好啲喎？但扣埋費用後，AWS嘅經營利潤只有10%增長，但Azure有16.9%增長。
33. 收入增長點叻都好，最終要睇利潤增長，人地收入增長少啲，但費用好制得好啲，咪又係贏你。
34. 其實乜都假，盈利能力最緊要。兩者業務規模差唔多，但無論喺1)經營利潤absolute amount （90億 vs 54億）、2）利潤率 (44.2% vs 26.3%)定係利潤增長 （16.9% vs 10%)， Azure都係完勝。

結論

35. Amazon電商業務本身真係唔吸引，利潤微簿，而家仲持續蝕錢。你可以話佢嘅壟斷電商平台，可以有好多業務發展嘅可能性。
36. 可能係，但我暫時見到佢只係經營個平台，都越嚟越高成本，亦都睇唔出有咩新攪作。踩隻腳去投資電動皮卡車Rivian，比較2021年，都減值咗成100億。
37. 如果有人買Amazon係睇中佢電商業務，可能佢獨具慧眼；如果係因為佢雲業務而買，咁你又要諗吓佢雲業務盈利能力係唔係好好？
38. 同埋仲要記住，你買雲業務係一定要搭單買埋佢規模超大，好差盈利能力嘅電商業務。

聲明：以上內容純屬個人意見及分享，並不構成投資、買賣建議或推薦
Credit: CFO講年報